Македонија
Заев: Очекувам до средината на декември да добиеме позитивна одлука за влез во ЕУ

Премиерот Зоран Заев, денес, по повторно искажаната поддршка на влез на Македонија во ЕУ, на крајот од самитот во Брдо, Словенија, рече дека следен рок во кој се надева на позитивна одлука е средината на декември. Иако видно разочаран од ставот на Бугарија и на овој самит, премиерот Заев е уверен дека има можност до крајот на годината да се одржи и првата меѓувладина конференција.
„Времето е пред нас. Рековме дека одлуките за проширувањето, односно за нас конкретно, за првата меѓувладина конференција, првиот момент е средината на декември. Тогаш ќе бидат завршени изборите кај нас, ќе бидат завршени изборите во Бугарија и тоа ми дава надеж на вака силни декларации од страна на Европската Унија, како што се испорачаа денеска, и тоа многу прецизни, верувам вака прецизни дури по 2003 година од самитот во Солун, треба да бидат некое охрабрување за нас да продолжиме да бараме решение. Времето е пред нас. Јас останувам во исчекување дека до крајот на годината тоа е средината на декември, можеме да ја добиеме позитивната одука, односно до крајот на годината да ја одржиме и првата меѓувладина конференција“, рече премиерот Заев.
За него, овој самит е само уште една потврда, овој пат со декларација на заложбите на Европската Унија за проширувањето и за интеграцијата на Западен Балкан во ЕУ. Вели дека фокусот е на Македонија затоа што билатерланото прашање со Бугарија влијае на сите други земји кандидати.
„Влијае и на Албанија, директно, затоа што се врзани со нас, но влијае во мотивацијата или демотивацијата на Србија и Црна Гора, на Косово и на Босна и Херцеговина, и тоа е јасно“, вели премиерот Заев.
Тој утрово имаше две средби со претседателот на Бугарија, Румен Радев. Првин беше на заедничи појадок со Радев со премиерот на Словенија, Јанез Јанша, претседателката на Европската комисија, Урсула фон дер Лаен, и еврокомесарот за проширување, Оливер Вархељи. На појадокот премиерот Заев укажа дека народите на Западен Балкан очекуваат декларациите на ЕУ да се преточат во дела и ако ЕУ не дејствува, разочарувањето кај народите од регионот ќе биде непоправливо и на огромна штета на големата европска идеја за заедништво и соработка.
Премиерот Заев и заменик-претседателот за европски прашања, Никола Димитров, заедно со Радев, имаа средба и со претседателот на Франција, Емануел Макрон, и канцеларката на Германија, Ангела Меркел, на која изразиле заедничка подготвеност и интерес од Северна Македонија и Бугарија да го продолжат дијалогот за да се дојде до решение на спорните прашања меѓу двете земји.
По овие две средби, пред почетокот на самитот, претседателот Радев, во изјава за медиумите, рече дека Бугарија не може да каже „да“ за влезот на Македонија во ЕУ сѐ додека неговите сонародници кај нас подлежат на суптилна асимилација, се потиснуваат и нивните права не се целосно интегрирани и додека не се искорени јазикот на омразата, не се смени толкувањето за Бугарија во учебниците, спомениците и државната политика. Тој побара Бугарите во земјата да бидат вброени во пописот и „како што беше призната историската вистина во односите на Северна Македонија со Грција, така да биде призната и историската вистина во односите со Бугарија“.
За премиерот Заев, чекорите и блокадите што Радев ги презема во име на Бугарија се навреда за македонскиот народ. Рече дека ниту една ниту една земја членка на ЕУ нема забелешки за реформите што се направени кај нас, од кои зависи напредокот. Нагласи дека по изборите кај нас и во Бугарија, треба да продолжи дијалогот со преземање одлучни чекори за решавање на отворените прашања, но македонскиот идентитет не може да биде тема за преговарање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце за излез од државата се чека околу 30 минути

Сообраќајот на државните патишта се одвива непречено, по суви коловози. Интензитетот на сообраќајот на патиштата надвор од градските средини е зголемен, извести АМСМ.
Поради летните одмори, се бележи зголемена фреквенција на возила, на ГП Табановце времето на чекање за излез е околу 30 минути. На останатите гранични премини од македонска страна нема подолги задржувања при влез или излез од државата.
Македонија
Дел од Аеродром денеска без струја

Регионалниот центар за управување со кризи на Град Скопје, по добиеното известување од ЕВН Македонија АД, информира дека: поради технички зафати во електродистрибутивната мрежа денеска, без електрична енергија ќе останат:
· од 08:30 до 15:30 часот, корисниците на улица Филип Богдански, општина Аеродром;
· од 09.00 до 13.00 часот, корисниците од дел од улицата Црноризец Храбар, од бр. 2 до бр. 20., општина Аеродром.
Македонија
Сончево со мала до умерена локална облачност, температурата до 32 степени

Времето денеска ќе биде сончево со мала до умерена локална облачност. Ќе дува слаб до умерен ветер претежно од југозападен правец. Попладне во планинските региони ќе има услови за локален слаб дожд.
Минималната температура ќе биде во интервал од 8 до 17, а максималната ќе достигне од 25 до 32 степена.
Во Скопје, сончево со мала до умерена облачност. Ќе дува слаб до умерен југозападен ветер. Минималната температура ќе се спушти до 14, а максималната ќе достигне до 31 степен.
Времео во наредните денови
Во вторник претежно во планинските региони ќе има услови за локален слаб дожд. Дневните температури ќе бидат малку под просекот за овој период од годината. Од средината на следната седмица времето ќе биде сончево и потопло со пораст на дневната температура.