Македонија
Заев по стапките на Груевски: Задоцни 30 минути, даваше отчет еден час, без конкретни одговори на прашања
„Премиере доцните како економскиот раст“… вака реагираше еден од новинарите откако премиерот Зоран Заев и министерот Драган Тевдоски се појавија на закажаната прес-конференција со задоцнување од половина час.
Премиерот на забелешката премолче, не коментираше, не образложи зошто доцнат, ниту се извини на медиумите.
По примерот на неговиот претходник Никола Груевски од ВМРО ДПМНЕ, и Заев држеше прес-конференција која траеше повеќе од еден час. Излагаше за сработеното по ресори. Даваше отчет за инвестиции, за економски напредок, здравство, социјала, правда, земјоделие. Го повтори она што го зборува цела година, со една новина дека со собраните пари од прогресивецот ќе има зголемување на социјалната помош.
„Социјалната помош ќе се зголеми за 300%, ќе изнесува 11 700 денари“, рече тој.
Слично како и доскорешниот премиер Груевски, кој 11 години се држеше до оваа пракса, избегнуваше конкретни одговори на новинарски прашања. Ниту Тевдовски ниту Заев не одговорија конкретно како ќе ги задржат фирмите од ИТ-секторот во Македонија и медицинските работници, кои најавија заминување токму поради воведувањето на прогресивниот данок.
Рекоа дека само 1%, односно 9000 граѓани требало да платат повисоки давачи, а во ИТ-компаниите просечна плата била 50 000 денари, така што според нив данокот не бил дестимулативен.
И за амнестираните, новинарите не добија дециден одговор дали со законот се руши принципот на правна држава. Тој само го повтори ставот што го повторува веќе два месеца во медиумите, дека било човечки да се прости ако сакаме да одиме напред.
„Кога се помиривме со комшиите, зошто да не се помириме и дома. И ЕУ нè поддржа во тоа. Да заборавиме и да одиме напред“, рече Заев.
Иако до пред некое време менувањето на кривичниот законик не беше прифатливо за СДСМ, сега тука има промена на став. Но, Заев вети дека нема да имало мешање на извршна со судска власт.
„Ве уверувам дека внимателно ќе ги носиме одлуките и нема да има мешање во ингеренциите на судството. Нема да има никакво влијание или мешање во работата на СЈО.
За волја на вистината, прецизен беше со очекувањата на НАТО. Вети дека Македонија на почетокот на февруари можела да добие стол во алијансата и да почнат процесите за прием, а за тоа добил охрабрување и од Столтенберг.
„Само ќе го исправам генералниот секретар, не во февруари, јас би кажал зошто да не уште во јануари. Ако во Грција се ратификува договорот навреме и кај нас поминат уставните измени, можеме веднаш да го почнеме процесот“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лајка: Скопските општини и покрај обврската не ги исплаќаат парите, заглавени сме во стари долгови
Проблемот со бездомните кучиња за кој се почесто се говори не може да се надмине без системско решение, а законот со кој треба да се регулира несовесното сопствеништво и граѓаните што фрлаат миленици повеќе од четири години е во процедура за донесување.
Јавната свест за вдомување во Македонија е ниска, јавното претпријатие „Лајка“ кое треба да ги стерилизира е заглавено во стари долгови, бидејќи единствениот буџет кој го има е од Град Скопје, а скопските општини скоро воопшто не ги плаќаат средствата за кои имаат обврска да ги исплаќаат.
„Годишно секоја од скопските општини има обврска да исплати по два милиони денари за ЈП “Лајка“, а тие тоа не го прават. Како за пример од вкупно 10 општини во 2022 година средства исплатиле само 3, а за да има резултати Лајка треба да постапува во сите 10 општини. Ако сите општини си ги исполнуваат обврските, претпријатието ќе биде поефикасно. За жал сега штетата за каснување на територија на овие општини ја плаќаат ЈП „Лајка„ и градот Скопје, а општините своите финансиски обврски не ги исплаќаат. Доколку сите 10 скопски општини си ги плаќаат обврските, претпријатието ќе работи сигурно и одржливо, а со тоа би се решил и проблемот со исплаќање оштети за каснување од бездомно куче“, велат од Лајка.
Исто така состојбата се влошува со носењето на голем број бездомни кучиња со комбиња од другите градови во Скопје, затоа што на другите општини тоа им е најлесен и најевтин начин за справување со проблемот. За овој проблем има и пријави до Министерството за внатрешни работи, но досега нема никава интервенција од полицијата.
Дополнителен проблем се и селските кучиња кои имаат неодговорни сопственици и кои ги пуштат слободно се парат. Без соодветно законско решение за регулирање на сопствеништвото сопствениците ниту мораат да ги регистрираат, ниту плаќаат пенали за штетата што ја предизвикуваат.
Македонија
Гази Баба обезбедува бесплатни униформи за сите ученици
Општина Гази Баба и оваа година обезбедува бесплатна униформа за сите ученици од општинските основни училишта.
Проектот за бесплатни униформи на учениците се воведе од минатата учебна година и истото беше ветување во изборната програма на градоначалникот Бобан Стефковски.
Во објава на својата официјална страна на фејсбук, градоначалникот Стефковски ги информираше граѓаните и напиша:
„Со почеток на учебната 2024 / 2025 година, сите ученици од општинските основни училишта на територија на општина Гази Баба ќе добијат бесплатна униформа.
Овој проект започна да се реализира во општина Гази Баба со моето доаѓање за градоначалник со што го исполнив ветувањето кое го дадов за време на изборите, дека сите ученици ќе добиваат бесплатни униформи.
Со реализацијата на овој проект се намалуваат социјалните разлики што ги има во секое општество и се постигнува чувство на еднаквост меѓу децата, без поделби и разлики меѓу нив во начинот на облекување, а притоа се намалуваат и трошоците на родителите на учениците“, напиша Стефковски.
Македонија
Акција на ЈП Водовод – Скопје за отплата на долгови без пресметка на камата до 31 јули 2024
ЈП Водовод и канализација – Скопје ја известува јавноста и граѓаните на град Скопје, дека акцијата за отплата на долговите без пресметка на камата за задоцнето плаќање е во тек.
Акцијата за отплата на долговите на рати без камата за физички и правни лица е со определен временски рок, почнувајќи од 20.06.2024 заклучно до 31.07.2024.
„Ги повикуваме сите корисници кои имаат заостанат долг во овој период да аплицираат за склучување на договори за отплата на долговите на најмногу 48 рати за физички лица и 24 рати за правни лица, во зависност од висината на долгот, без пресметка на камата за задоцнето плаќање“, велат од ЈП Водовод и канализација – Скопје.
Одлуката за спроведување на акцијата за отплата на заостанатите долгови без пресметка на камата не важи за органите на државната и локалната власт и другите државни органи основани согласно Уставот и со закон и институциите кои вршат дејности од јавен интерес.
По истекот на овој период одлуката престанува да важи.
За секоја дополнителна информација за услугите на ЈП Водовод и канализација – Скопје контактирајте на:
02 3073 010, Дежурно Информативен Центар; 02 3240 300, Дирекција; [email protected]; www.vodovod-skopje.com.mk; www.facebook.com/jpvodovod.skopje