Со интонирање на државната химна и говор на лидерот на СДСМ, почна 23. конгрес на владејачката СДСМ на која треба да биде потврден Стево Пендаровски како кандидат за претседател предложен од коалицијата од 30-ина партии. 783 делегати се присутни на денешниот конгрес кој се одржува по утринскиот централен и извршен одбор на партијата.

„Нашата партија заедно со нејзините лидери и членство никогаш не отстапи пред предизвиците. Секогаш ја преземаше одговорноста донесуваше одлуки и спроведуваше рационални политики што се покажаа како историски. Тоа беше во 1991 година, кога заедно со граѓаните на нашата земја учествуваме во процесот на прогласување на независноста на нашата земја. Тоа беше и во 2001 кога презедовме одговорност да го запреме меѓуетничкиот конфлик и со дијалог и со Охридскиот рамковен договор да почнеме да ја градиме новата вредност на нашата општествена заедница концептот „Едно општество за сите“. Така беше и во 2005 кога им дадовме силен имплус на европските вредности и нашите аспирации за членство во ЕУ и ни беше доделен кандидатскиот статус. Така беше и во 2015 година кога со „Вистината за Македонија“ со граѓантие на Македонија во кампот на слободата со шарената револуција тргнавме низ улиците на нашите градови. Кога трпеливо и мудро низ политичките процеси верувајќи во слобода, вистина, правда, еднаквост, напредок и кога социјалдемократските вредности ги здруживме со цивилизациските вредности за да си ја ослободиме заробената ни држава. Така беше и во 2017 и 2018 година кога на 27 април се спротивставивме на насилството и кога новата владина коалиција донесе одлука да постигне договор за пријателство со Бугарија и ќе го реши тридеценискиот спор со Грција“, рече Заев на Конгресот.

Тој нагласи дека во парламентот ги разбиле сите дилеми и потврдиле дека заедно ја движат земјата во иднината што сите ја посакуваат: Признаена и ценета држава, земја членка на европското семејство и членка на НАТО.

„Не прифатија како Mакедонци, со свој идентитет и своја гордост. Како земја во чиј идентитет се вградени и идентитетите и на сите нејзини граѓани, Албанци, Турци, Роми, Срби, Власи, Бошњаци, и сите други кои што живеат во нашата земја. Заедно со нашиот пријател, прво Република Бугарија, а потоа и со Република Грција, ги отфрливме изолацијата и недоразбирањата. Презедовме одговорност, и покажавме капацитети да решаваме, а не да одлагаме и да профитираме на штета на интересите на граѓаните и на стратешките цели на државата. Граѓаните избраа иднина, просперитет, НАТО и ЕУ“ порача Заев.

Тој потенцираше дека овој економски и интеграциски поход ќе даде вистински резултат само ако се обезбеди во земјата да се работи чесно и одговорно, нагласувајќи дека мора да се стави крај на корупцијата.

„Да работиме посветено и внимателно, да внимаваме на етичките и морални норми, да покажеме интегритет и да ги поддржиме институциите да му пркосат на секој кој има намера да стекнува корист врз грбот на граѓаните“ посочи Заев.

Тој пред присутните го претстави Стево Пендароваки како најдобар избор за победа на претседателските избори.

“Убедени сме дека тоа е наш избор за победа”, рече Заев во воведниот говор на конгресот. Лидерот на партијата рече дека Пендаровски е кандидат за претседател за сите граѓани.

“Ќе одиме долж и попреку за да го поддржиме Стево”, кажа Заев.

“Стево е личност со интегритет, со темелно политичко и професионално искуство”, рече Заев пред присутните делегати и гости и дополни дека Пендаровски е најдобрата опција за концептот “Едно општество за сите”.

Заев им заблагодари и на Радмила Шекеринска, Оливер Спасовски и Никола Димитров и рече дека тие биле “предната влеча” во водењето на процесите во земјата.

Пендаровски беше поздравен со громогласен аплауз од присутните делегати. Тој е најавено дека ќе се обрати на крајот на конгресот.