Македонија
Заев: УНДП е наш постојан партнер за одржлив развој на државата и остварување на европската интеграција

Претседателот на Владата, Зоран Заев, се сретна со Мирјана Спољариќ-Егер, помошничка на администратор на Програмата за развој на Обединетите нации (УНДП) и директорка на Регионалното биро за Европа и Заедницата на независни држави, која престојува во дводневна официјална посета на земјата.
На средбата беше изразено заемно задоволство од одличната и плодна соработка што постои меѓу и претставниците на системот на ОН во земјата и беа разменети мислења и за тековните активности од соработката со УНДП кои, како што истакнаа двете страни, се голема поддршка за остварување на приоритетите и исполнување на евроинтегративниот процес на Северна Македонија.
Премиерот Заев информираше за најновите настани во државата, потенцирајќи дека Владата по решавањето на долгогодишниот спор со Грција е посветена на процесот на остварување на стратешките цели на државата, полноправна членка на НАТО и Европската Унија.
„Соработката со УНДП е многу плодна и изразувам задоволство за партнерството што е создадено со Владата на Северна Македонија за проектите што се однесуваат на модернизацијата на образованието, поддршката во проектите за вклучување на младите и нивно полесно вработување, користејќи ги моделите на УНДП за занимања кои ја зголемуваат вработеноста и го помагаат претприемништвото, како и градењето на капацитетите на организациите на граѓанското општество“, истакна премиерот Заев, потенцирајќи дека главната цел е економски развој на земјата, поттикнување на инвестициите и просперитет за нејзините граѓани, но и за земјите од целиот регион.
Премиерот Заев потенцираше дека успешните примери од заедничката соработка и начинот на кој Македонија ги решава развојните прашања може да бидат споделени преку мрежата на УНДП. Исто така беше изразена подготвеност за поттикнување и подобрување на дигиталната соработка во регионот, посочувајќи ја дигиталната трансформација, која е и една од приоритетите на Стратегијата на ЕУ како неопходна за зголемување на квалитетот на животот на сите граѓани.
Соговорниците изразија очекување и уверување за продолжување на успешната соработка во однос на заедничко дефинирање на стратешките приоритети, тековните активности, имплементацијата на постоечките проекти од интерес на државата и граѓаните, кои се значајни и од аспект на приближување на земјата кон стандардите на Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Средба Тошковски – Ходулин: Интензивна поддршка од ЕУ преку ИПА проектите за креирање полиција со европски стандарди

Министерот за внатрешни работи Панче Тошковски денеска оствари работна средба со претставници на Делегацијата на Европската унија, предводени од Стефан Ходулин, раководител на Одделот за соработка и Даница Стошевска, програм менаџер во канцеларијата.
На состанокот беше разгледана досегашната соработка помеѓу Министерството за внатрешни работи и Делегацијата на Европската унија во делот на спроведувањето на проектите финансирани преку Инструментот за претпристапна помош (ИПА).
Од страна на господинот Ходулин беше изразено задоволство од постигнатото во рамките на веќе спроведените проекти кои се имплементираат во министерството и изрази надеж дека посветеноста ќе продолжи со ист интензитет.
Министерот Тошковски во име на Министерството за внатрешни работи и се заблагодари на Делегацијата на ЕУ за досегашната поддршка и потенцираше дека истата е од исклучителна важност за министерството, и дека од наша страна ќе бидат обезбедени сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
За време на состанокот исто така се разговараше и за идните проекти кои се дел од Националната ИПА програма за 2025 година и следниот период, по што заеднички беше донесен заклучок дека ќе се продолжи со интензивни активности во наредниот период со цел финализирање плановите и проектите како основа за идното програмирање и обезбедување на сите неопходни предуслови од страна на министерството за внатрешни работи и целосна посветеност во нивната подготовка.
Двајцата соговорници изразија уверување и подготвеност за продолжување на одличната соработка и во иднина.
Македонија
Сиљановска-Давкова на средба со Радев: во фокусот трагедијата во Кочани и евроинтегративниот пат

Претседателката Гордана Силјановска-Давкова која е во Бугарија за да учествува во „Процесот Акаба“, пред медиумите соопшти дека ги посетила повредените пациенти кои настрадаа во трагедијата во Кочани и сега се на лекување во болницата „Пирогов“.
Рече дека се чувствуваат многу подобро. Таа оствари средба и со бугарскиот претседател Румен Радев.
Фокусот бил на трагедијата во Кочани, но се разговарало и за одблокирање на нашиот евроинтегративен пат, при што двајцата заклучиле дека се неопходни позачестени средби. Претседателката нагласила дека се можни компромиси и очекува исчекор на тој план.
Оддавајќи му признание на Радев таа кажа дека тој бил првиот претседател којшто утрото по трагедијата во Кочани и се јавил и и понудил секаков вид на помош.
„Прв ми се јави претседателот Радев. Благодарам. За жал или за добро, понекогаш трагедијата го вади доброто во сите нас, не политичкото, туку човечкото. Ова нема да може да го заборави ниту еден политичар од двете страни“, ја пренесуваат изјавата на Силјановска-Давкова бугарските медиуми.
Македонија
Отежнато се одвива сообраќајот на патниот правец Валандово – Струмица поради одрони

На патниот правец Валандово – Струмица, кај Костурино поради одрони сообраќајот е одвива отежнато и забавено.
Патниот правец Крушево-с.Долно Дивјаци -с.Кочиша е небезбеден за сообраќај и претсавува опасност за нормално одвивање на сообраќајот и поради таа причина истиот од 15.00 часот на 04.04.2025 година до негово санирање истиот ќе биде затворен за секаков вид на сообраќај, а граѓаните од населените места ќе користат регионален пат с.Пуста Река -Крушево.
Сообраќајот на државните патишта се одвивa непречено, по претежно влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.