Македонија
Законот за лекови доби зелено светло, ВМРО-ДПМНЕ не гласаше
Измените на Законот за лекови и медицински помагала со кој се уредува набавката на вакцините од компанијата „Фајзер“ го помина првиот филтер во Собранието со поддршка од 60 пратеници.
Овој пат, иако присутни во салата, пратениците на опозициската ВМРО-ДПМНЕ не гласаа за законот. При гласањето немаше против и воздржани. Законот ќе се носи по скратена постапка, при што прво ќе биде разгледан од собраниските комисии за здравство и законодавно-правната, по што се враќа на пленарна седница за дискусија и усвојување.
Предлогот за измена на законот доаѓа од Владата, со образложение дека Собранието треба да го изгласа откако компанијата „Фајзер“ упати специфично барање за обезбедување документација потребна за набавка на конкретниот продукт, вакцината против Ковид-19.
„Република Северна Македонија заради заштита на населението од коронавирусот пристапи кон COVAX механизмот за набавка на вакцини против Ковид-19, преку кој обезбеди 833.000 дози од вакцината. Исто така, во тек се и разговори со Европската комисија за набавка на вакцините против Ковид-19, како и директни разговори со производителите на вакцини. Врз основа на претходнонаведеното, во услови на пандемија на Ковид-19, прогласена од Светска здравствена организација, кога директно се загрозени животот и здравјето на луѓето, се утврди потреба од создавање законски основ за издавање одобрение за ставање во промет на вакцините против Ковид-19, кога подносителот на барањето нема седиште на територијата на Република Северна Македонија, како и за издавање на условно одобрение за ставање во промет во случај кога барателот кон барањето не ја доставил целокупната документација“, стои во образложението на измените на Законот кој пратениците треба да го разгледаат и донесат.
Гласањето на овој закон се случува откако на 18 јануари седницата беше прекината, бидејќи Собранието не можеше да обезбеди кворум од 61 пратеник за работа. На седницата отсутен беше пратеникот Дарко Каевски, кој пријави дека е позитивен на коронавирусот, а опозициската ВМРО-ДПМНЕ не влезе во салата и не гласаше.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Митрески- Ларсон Џеин: Одличните политички односи и пријателство ќе ги зајакнеме и преку сојузништвото во НАТО
Претседателот на Собранието, Јован Митрески, денеска оствари средба со амбасадорката на Кралството Шведска, Ами Ларсон Џеин.
Амбасадорката упати голема благодарност за подршката за членството на Шведска во НАТО, имајќи предвид дека Собранието на Република Северна Македонија беше меѓу првите парламенти на земјите членки на Алијансата, кое уште летото 2022 година, со огромно мнозинтво, го ратификуваше Протоколот за пристап на Шведска и Финска во Алијансата.
Двајцата соговорници се согласија дека во време кога континентот се соочува со голема безбедносна криза, членството на Шведска ќе даде значаен придонес кон заедничката безбедност.
Од своја страна, Митрески изрази задоволство од одличните билатерални односи меѓу двете земји, особено од интензивната соработка меѓу пратениците на двата законодавни дома во изминатиот период, во рамките на меѓупарламентарната соработка за демократски развој. Тој искажа и уверување дека одличните политички односи и пријателство ќе бидат дополнително зајакнати и преку созујзништвото во НАТО.
Митрески се осврна и на престојните претседателски и парламентарни избори и го сподели своето верување дека и во идниот состав македонското Собрание, ќе продолжи блиската меѓупарламентарна соработка и меѓусебната подршка на меѓународен план, особено во контекст на нашиот евроинтеграциски пат.
Амбасадорката Ларсон Џеин нагласи дека Шведска ќе продолжи да дава активен и континуиран придонес кон демократскиот и економскиот развој на нашата држава преку бројни развојни проекти, а особено кон нашата стратешка цел, полноправно членство во Европската Унија.
Македонија
Ковачевски за Европскиот фронт: Дали со некого ќе одите заедно на избори или ќе коалирате постизборно е одлука на политичките партии
Добро е што на претстојните избори ќе има најмалку две коалиции што се залагаат за брза интеграција на земјата во Европската Унија, рече денес лидерот на СДСМ, Димитар Ковачевски. На новинарско прашање зошто СДСМ не е дел од Европскиот фронт, кој го најавуваше и повикуваше на поддршка, Ковачевски одговори дека партиите одлучуваат за коалиции и пред, но и по избори.
„Дали со некого ќе одите заедно на избори или ќе имате постизборна коалиција или нема да имате тоа е сепак одлука на политичките партии, политичките органи“, рече Ковачевски.
Според него, СДСМ веќе има коалиција и е партија што направила најмногу за европскиот пат на земјата.
„Партијата што ги направи најголемите резултати во делот на европските интеграции и интегрирањето во НАТО, а тоа е СДСМ, исто така имаме коалиција што се залага за европски и евро-атлантски интеграции. Ние таа коалиција веќе ја имаме официјализирано. Претседателскиот кандидат Стево Пендаровски веќе доби поддршка од најголемиот дел од тие политички партии и добро е што во државата ќе има најмалку два блока, две коалиции што се залагаат за брза интеграција на Северна Македонија во Европската Унија и што ќе извојуваат победа, со што Северна Македонија непречено ќе го продолжи својот пат во европските интеграции“, рече Ковачевски.
Договор за заеднички настап на изборите потпишаа денеска претседателот на ДУИ, Али Ахмети, и претседателот на Народното движење, Скендер Реџепи.
Македонија
Потпишани барања за екстрадиции на Шеваљ Муареми и Мухамед Чајани
Министерот за правда Кренар Лога ги потпиша барањата за екстрадиција на Шеваљ Муареми и Мухамед Чајани.
Барањата, откога ќе бидат преведени, како што појаснуваат од Министерството за правда, ќе бидат проследени до МНР на натамошно постапување до Обединетите Арапски Емирати.
МВР распиша меѓународна потерница по Шеваљ Муареми, која беше објавена и на веб-страницата на Министерството, а за кој постојат сомненија дека бил дел од меѓународна организирана криминална група осомничена за повеќе кривични дела.
Кривични пријави во јануари годинава беа поднесени против 16 лица што се сомничат за неовластено производство и пуштање во промет наркотични дроги, убиства и обиди за убиства.
Сите биле членови на меѓународна организирана криминална група, што ја предводел Муареми од село Грчец.