Македонија
Почна капиталниот проект за обнова на улиците во 11 Октомври – бараки во Кисела Вода

Со градежните активности на улицата Петар Драпшин во општина Кисела Вода почна големиот проект за санација на улиците во населбата 11 Октомври – бараки. Се работи за зафат што ќе опфати повеќе од 11.000 квадратни метри површина и ќе донесе подобрување на условите за живеење на жителите што чекаа 30-ина години на оваа активност. За рехабилитацијата на „Петар Драпшин“ средствата се обезбедени од проектот за поврзување локални патишта, кој се реализира од страна на Министерството за транспорт и врски со финансиска поддршка од Светската банка. Покрај оваа, со реконструктивни зафати Општина Кисела Вода ќе ги опфати и улиците Ефтим Спространов, Лазар Димитров и Лав Tолстој.
„Извршивме увид во почнувањето на градежните зафати на улицата Петар Драпшин, со чија санација на површина од 8.000 квадратни метри почнува големиот проект за обнова на улиците во населбата 11 Октомври – бараки. Рехабилитацијата на оваа клучна сообраќајна артерија опфаќа санација на коловозот и тротоарите, што е барање и потреба на жителите веќе 30 години. За оваа значајна градежна активност сакам да му се заблагодарам на Министерството за транспорт и врски, преку чиј проект се обезбеди финансиската поддршка од Светската банка. Подобрувањето на локалната патна инфраструктура е значаен сегмент од развојот на секоја заедница и убаво е кога ќе се најде заеднички јазик за решение на ваков децениски проблем. Паралелно, Општина Кисела Вода ќе санира и други улици во населбата 11 Октомври – бараки. Нов асфалт и тротоари ќе добијат и ‘Ефтим Спространов’, ‘Лазар Димитров’ и ‘Лав Tолстој’. Се работи за градежна интервенција со вкупна површина од речиси 1.1000 м2. кои ќе бидат завршени за приближно три месеци и ќе овозможат нов подобрен лик на улиците и ќе ги направат побезбедни за одвивање на сообраќајот. Дополнително, ќе поставиме и ново модерно штедливо осветление. Досегашните живини ќе ги замениме со ЛЕД-светилки. Како што најавив во текот на вчерашниот ден, ја продолжуваме традицијата со крупни инфраструктурни проекти да ја комплетираме прославата на значајните настани во општина Кисела Вода, па, така, и овој проект е првиот од неколкуте капитални, кои во седмицата што е пред нас ќе ги промовираме во рамките на одбележувањето на патрониот празник 6 Мај“, истакна градоначалникот Ѓорѓиевски при увидот во почнувањето на градежниот зафат на улицата Петар Драпшин.
Инаку, вчерашниот ден, патронатот на Кисела Вода, беше исполнет со најразновидни содржини за сите генерации. Паркот „Македонија“ беше полн со посетители од утрото до вечерта. За најмладите настапија Биби од „Светот на Биби“, „Поточиња“ и танчарите од „Данса латина Стефи“, а повозрасните во вечерните часови уживаа во хуморот на Атанас и Тино, како и во журката што потоа до крајот на вечерта ја приреди ДЈ Напстер. Инфраструктурните проекти, пак, што ќе се реализираат во склоп на одбележувањето на 6 Мај, ќе продолжат во текот на целата седмица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поради пожар, целосно прекинат сообраќајот кон граничниот премин Блаце

Министерството за внатрешни работи известува дека поради ширењето на пожарот во близина на Блаце, целосно е прекинат сообраќајот на патниот правец Стенковец-ГП Блаце, во двата правци, а затворен е и граничниот премин Блаце.
„Министерството за внатрешни работи во координација со другите надлежни институции презема мерки за гасење на пожарот“.
Апелираат до граѓаните да не тргнуваат кон ГП Блаце до гасењето на пожарот и нормализирање на сообраќајот, за што соодветно ќе ја информираат јавноста.
Македонија
Граничниот премин Долно Блаце е целосно затворен за влез и излез

Граничниот премин Долно Блаце е целосно затворен за влез и излез во и од Република Северна Македонија (за сите видови возила и лица) соопшти АМСМ.
Сообраќајот на државните патишта се одвива непречено, по суви коловози.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
(Видео) Спасовски: Власта повторно не покажа ниту одговорност, ниту волја за помош за жртвите во Кочани, не гласаа за амандманот на СДСМ

Владата не само што не покажа слух и не го прифати амандманот на СДСМ, истовремено не понуди ниту образложение зошто нема потреба да се прифаќа амандман за помош на семејствата на настраданите во Кочани, потенцираше координаторот на пратеничката група на СДСМ, Оливер Спасовски на денешната прес-конференција откако на амандманската расправа за ребаланс на Буџетот, пратенците од власта не гласаа за амандманот на СДСМ и коалицијата. Амандамот предвидуваше 934 милиони и 340 илјади денари директна помош на семејствата настраданите и на повредените во Кочани, во најголемата трагедија којашто ја зафати Македонија.
Спасовски посочи дека во Буџетот има пари и дека Владата требаше да покаже добра волја и да го прифати амандманот. Тој дури и понуди како пратеничка група ако се прифати овој амандман, тогаш сите останати амандмани коишто ги предложи СДСМ да ги повлечат и да нема расправа, бидејќи како што кажа, СДСМ смета дека нема поважна тема од оваа во моментот во Македонија.
„Достоинствено до крај разговаравме и ги повикувавме пратениците на ВМРО-ДПМНЕ како мнозинство, заедно со пратениците од ЗНАМ и од ВЛЕН да овозможат и заеднички консензуално да го усвоиме амандманот и да покажеме дека знаеме да го цениме приоритетот на граѓаните, да покажеме единство, да покажеме солидарност, нешто што е потребно овие мигови за државата, но напротив претставникот на владата делеше лекции како парламентот не смеел да разговара или да отвора вакви теми“, рече Спасоски.
За амандманот на СДСМ не гласаа и пратениците на ВМРО-ДПМНЕ.
„Навистина не ми е јасно како е можно народните претставници овде како пратеници во законодавниот дом, за работа за којашто се најповикани, а тоа е да покажат дека институциите, секогаш и во најтешките моменти, се тука за било кој граѓанин, а посебно за една ваква трагедија, која што ја зафати државата во претходниот период и од тоа сметам дека мораше сите ние да покажеме малку поголемо чувство на одговорност“, нагласи Спасовски.
При тоа, Спасовски упати апел до Владата и до владеачките партии при креирањето на новиот Буџет за 2026 година, да предвидат финансиски средства коишто би биле доволни за финансиска поддршка на семејствата на загинатите и на повредените во Кочани.
„Нема поважна тема од оваа во моментот во Македонија, нема поважно нешто од 62 млади изгубени животи и од 250 повредени, нема поважно од иднината на еден град, од иднината на истокот на Македонија и ако сакате и од иднината на Македонија“, порача пратеникот Спасовски.