Македонија
Петровска на одбележувањето на денот на Дирекцијата за заштита и спасување: Вие сте дел од системот кој обезбедува сигурност за граѓаните
Министерката за одбрана, Славјанка Петровска, денеска, во касарната „Гоце Делчев“ се обрати на свеченото одбележување на 18-годишнината од формирањето на Дирекцијата за заштита и спасување за која порача дека е дел од системот чиј императив е ефикасна и економична цивилна заштита, која гарантира сигурност за граѓаните.
„Вие ги градите оперативните капацитети за справување со заканите и опасностите што произлегуваат од природните непогоди, но и другите видови несреќи и затоа вие сте составен дел од системот кој мора континуирано и да се развива, модернизира и опремува. Знам дека тоа се приоритети и на раководството на Дирекцијата за заштита и спасување“, рече Петровска.
За вработените во Дирекцијата, кои секојдневно се на терен во поддршка и помош на граѓаните, Петровска истакна дека тоа се вистински професионалци со долгогодишно искуство, кое го пренесуваат и на следните генерации што ја носат одговорноста за функционалноста на оваа значајна институција.
„Токму вашата професионалност и вештини можевме да ги видиме кога вие заедно со армиските и полициските припадници се боревте со огнените стихии што ја зафатија нашата земја во 2021 година, но се борите со пожарите во земјата речиси секоја година во летниот период, со големите поплави, со ковид-пандемијата, а својата одлучност и посветеност ја покажавте и неодамна во Турција кога несебично помагавте во спасување и извлекување колку што е можно повеќе лица, кои, за жал, беа затрупани под урнатините од разорните земјотреси што ја зафатија оваа наша пријателска и сојузничка земја“, истакна таа.
Се осврна и на работата на мултисекторскиот поткомитет, кој е во фаза на финализирање на предлогот за реформа на системот за цивилна заштита, со кој треба да се обезбеди уште поголема ефикасност на овој систем.
Петровска на вработените во Дирекцијата им порача дека одбраната и Армијата се секогаш подготвени да им помогнат и со искуство и знаење и во процесот на обука и развојот на интероперабилноста, која е исклучително важна и помеѓу домашните институции зашто нас нè поврзуваат многу заеднички активности, од кои најважни се заштитата, сигурноста и безбедноста на секој граѓанин.
„Остануваме подготвени секогаш да сме во ваша поддршка кога се борите за секој човечки живот, за секој дом, секое материјално и културно добро на нашата татковина“, заклучи Петровска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нестабилно време со дожд и грмежи до среда
По врнежите и невремето по кое во текот на ноќта полавени беа подруми во Охрид, од УХМР најавуваат дека до среда ќе се задржи нестабилно време, претежно во попладневните часови со локален пороен дожд и грмежи.
Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.
Македонија
Скопските и тетовските пожарникари гасеа три огнови на отворено, соопшти ЦУК
Во изминатото деноноќие Центарот за управување со кризи информира дека биле евидентирани три пожари на отворено.
Регионалниот ЦУК Скопје соопштил дека БППЗ на Град Скопје во изминатото деноноќие имала две помали интервенции поради запалено ѓубре и тоа на ул. „Ферид Заири“ во Општина Чаир и кај Езерото Треска во Општина Сарај.
Регионалниот ЦУК Тетово известил дека ТППЕ Тетово имала една помала интервенција поради запалена ниска вегетација кај село Чифлик во Општина Желино.
Центарот за управување со кризи соопшти дека изминатите 24 часа имало вкупно 1.491 повици на Единствениот повикувачки број за итни случаи 112. Од нив „реални“ повици биле 62,84 отсто, а 37,16 отсто биле за други потреби на граѓаните што не биле итни.
Кон полиција биле упатени 63,18 отсто, кон итната медицинска помош 29,09 проценти, кон пожарникарите 2,73 отсто, a кон АМСМ 1,36 отсто од повиците кон бројот 112.