Засега немаме стриктна препорака за дополнително скратување на полицискиот час, рече министерот за здравство, Венко Филипче, кој не ја исклучи можноста дополнително да се дискутира на владината седница и за тоа.

„Ја следиме состојбата. Доколку треба, ќе го предложиме тоа до Владата, но засега не“, рече Филипче.

Тој рече дека во контекст на скринингот на населението, од утре ќе почне тестирањето на коронавирусот на вработените во градинките. Станува збор за речиси 2.000 вработени во градинките за кои Филипче очекува дека може да бидат тестирани за една недела.

„Пред нас е еден мирен период, видливи се резултатите од рестрикциите, така што сите овие мерки што досега беа во сила ги дадоа овие резултати. Пред нас е период што може да се менаџира од страна на здравствениот систем. Има мали варијации во изминатите неколку дена, но сите тие се поврзани со одредени настани“.

Тој рече дека во последните денови имало зголемување на случаите на Ковид-19 поради поврзани настани. Па, така, на пример, еден кластер е од погреб, кој бил одржан во Тетово, а другите случаи од Скопје биле поврзани со семеен настан, кој бил одржан во околината на Скопје.

Министерот за здравство наброја повеќе причини што довеле до сегашната состојба на намалувањето на интензитетот на коронавирусот, а и повеќе фактори поради кои може да се очекува дека вирусот е ставенот под контрола.

Силно изразените посткарантински ефекти кога беше ограничено движењето, затворењето на границите, случаите со локална трансмисија. Фактот што белодробните епидемии најчесто траат 8-12 недели, а кај нас е 11-та недела. Очекувањата се дека високите температури ќе придонесат да се намали преносот.

„Може да бидете спокојни дека сите досегашни мерки ги носевме врз основа на стручни медицински анализи, кои очигледно дадоа резултат. Уште еднаш апелирам да се почитуваат трите клучни препораки – држење дистанца, носење маска и редовна дезинфекција на рацете. Во согласност со нашите трендови, се очекува стабилизација на ширењето на вирусот, но свесни сме дека целосно исчезнување на вирусот тешко е да се очекува“, рече Филипче.