Воено-медицинската академија (ВМА) во Белград утринава изјави дека е достапна за евентуално дополнително сместување на повредените во пожарот во Кочани, доколку има потреба.

„И за оваа задача што ја извршивме, сите мои колеги доброволно се пријавија, доброволно учествуваа во транспортот, кој е еден од најтешките видови транспорт на овие пациенти, па доколку има потреба – стоиме на располагање и тука сме повторно да им помогнеме на луѓето во Северна Македонија“, изјави за РТС потполковник Рондовиќ.

Тој додаде дека 30 пациенти повредени во пожарот се на лекување во Србија, од кои 12 се лекуваат во военото здравство, а останатите во цивилниот здравствен систем.

„Станува збор за изгореници предизвикани од ефектите на висока топлина и повреди од вдишување, кои преовладуваат кај поголемиот дел од повредените во оваа трагедија, бидејќи биле затворени во запалениот простор и изложени на висока топлина“, рече Рондовиќ.

Тој додаде дека е тешко да се предвиди времето на опоравување на пациентите, но дека нивното закрепнување, доколку нема компликации, може да се очекува најмалку за недела или две.

„Би-би-си“ направи реконструкција на пожарот во дискотката „Пулс“ во Кочани, во кое објаснува зошто толку многу луѓе загинале.

Во реконструкцијата „Би-би-си“ се осврнува на просторот кој во минатото бил магацин за теписи, и нема соодветна лиценца за да биде дискотека.

Според нив, два фактори се клучни за тоа зошто и како огнот толку брзо се распространил низ објектот кој како што нагласуваат и тие, имал само еден влез и излез.

„ДНК почнуваат со настапот внатре. На најмалку три различни се гледа пиротехниката пред сцената, со што започнува огнот. Кратко потоа, луѓе се обидуваат со противпожарни апарати да го изгаснат. Првиот смртен фактор е дека таванот е направен од запаливи материјали, а ѕидовите од гипс картон не се отпорни на оган. Пламенот се шири низ зградата. Тука може да видите луѓе како се обидуваат да излезат надвор. Вториот фактор е недостатокот на излези во случај на пожар. Властите велат дека имало само еден излез, а тоа било назад зад главниот влез. Постоел овој наводен излез за итни случаи позади. Но, јавниот обвинител вели дека вратата била заклучена, но и онака немало рачка на вратата од внатре. Тоа значело дека околу 500 луѓе, морале да се обидат да излезат од каде што дошле, со што се создало стампедо и така висок степен на смрттни случаи“, се додава во видеото со реконструкција од катастрофата.

Видеото на ЛИНКОТ.

Од понеделник се очекуваат првите повлекувања од странство на повредените пациенти кои по пожарот во Кочани беа препраќани на лекување. Вака најави директорот на Фондот за здравствено осигурување, Сашо Клековски, синоќа во гостување во централниот дневник на телевизијата „Сител“. Лекувањето на пациентите ќе продолжи кај нас, имајќи предвид дека лекувањето изгореници е процес кој може да трае и неколку месеци.

„Ние мораме да размислуваме за 150-тина повредени на кои ќе им треба продолжена нега и третман. Зборуваме за трансплантација на кожа, зборуваме за рехабилитации. Така да, ние мораме да размислуваме како ќе си ги вратиме децата назад и мислам дека веќе од понеделник ќе ги имаме првите враќања“, рече директорот Клековски.

Тој уверува дека во земјава има лекари кои може да се справат со лекување изгореници оти дел од тимот кој работел во единствениот центар за изгореници во рамки на Клиника по хируршки болести „Св. Наум Охридски“, се уште е активен во болницата иако центарот е затворен од 2016 година. Токму затоа голем дел од повредените во пожарот биле прифатени токму во оваа болница, покрај Клиничкиот центар и Градска општа болница „8 Септември“.

Директорот Клековски и синоќа кажа дека нашите лекари помош имаа и од тим од Воено медицинската академија во Белград кои помагале во „8 Септември“, но по првите два дена морале да заминат оти се зголеми бројот на пациенти во Белград. Помош македонските лекари кажа дека имале и од тим од Чешка кој работел на Клиниката за пластична хирургија, а помагале и три тима од Израел.