Македонија
Зајкова: За 20 години требаше да имаме 80 отсто усогласеност на законодавството со ЕУ, да креираме единствен национален план

Претседателката на Либерално-демократската партија (ЛДП) и пратеничка во македонското Собрание, Моника Зајкова, во излагањето пред Националниот совет за евроинтеграции (НСЕИ), порача дека доколку сите политички чинители се сложни за препораките од оценската комисија, реформите да се направат заеднички, без мешање на партиските ставови.
„Една година е помината откако се добиени извештаите од скрининг процесот. И до каде сме? Не треба само да седиме и анализираме или да се обвинуваме и бараме виновници, ама треба да направиме Национален план за имплементација на она што е нотирано во скрининг извештаите, но и по однос на препораките дадени во Извештаите“, посочува Зајкова
Зајкова додава дека секоја година ги анализираме извештаите и дамо збориме, но во одредени полиња нема напредок, ниту имплементација и иако Македонија веќе 20 години е земја – кандидат за членство, досега требаше да имаме 80% усогласеност на законодавството, но ЕУ скринингот покажа дека усогласеноста за жал, не ни е ни до половина.
„Марта Кос е европски комесар за проширување, Каја Калас е висок претставник за надворешна политика и безбедност, јас исто така сум Претседател на ЛИБСЕН, можам да лобирам за државата, не за партиите но за државата. И ВМРО ДПМНЕ и СДСМ членуваат во европските политички семејства и сметам дека мора сите да лобираме со единствени позиции за државата и процесите. Да не пропуштиме уште еден поволен моментум, затоа што времето не работи секогаш за нас“, посочува претседателката на ЛДП и пратеничка, Моника Зајкова.
Вие знаете што е национален приоритет?!? Ако ЕУ е национален приоритет, додава Зајкова, треба да знаеме дека националниот приоритет не се жалби или партиски обвинувања, туку правење Национален план со конкретни рокови, многу работа и видливи резултати.
„Процесите не треба да се одвиваат само во Брисел, тие се водат и решаваат дома. Зошто имаме ‘преговори’, ако не можеме да се согласиме за единствени позиции дома? Ако навистина 95% од пратениците сме за членство во ЕУ, дајте да седнеме и да донесеме план како да го забрзаме процесот и да имплементираме суштински реформи, а не само популистички наративи“, заклучува претседателката на ЛДП.
Зајкова повторно упати апел за сработување на нотираното во извештаите, градење на единствени позиции и покажување на конкретни резултати во однос на реализацијата на суштинските реформи.
„Сонот за ЕУ на мојата генерација е нарушен, да не го рушиме сонот на идните генрации или пак да не се залажуваме веќе сите за националните приоритети“, порачува Зајкова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.