Македонија
Зајкова: Системот треба да се гради така што ќе обезбедиме рана детекција и рана превенција на проблемите со менталното здравје

Менталното здравје не е тема што ја засега само Македонија, туку и Европа и светот. Во последните години почна многу поотворено да се зборува и да се бараат системски решенија за луѓето да може да се чувствуваат слободно да зборуваат за својот проблем, но и да го превенираат и секако да се грижат за тоа, без да бидат осудувани од колегите, пријателите, семејството. За да го зачуваме менталното здравје, треба и позитивни информации да ѝ пласираме на јавноста затоа што светот на постојана негативност и тензија создава чувство на несигурност кај луѓето, а сето тоа влијае на менталното здравје. Сè уште голем проблем е стигматизацијата од општеството, особено кај младите од врсниците и затоа ние имаме многу случаи на анксиозност на која луѓето воопшто не обрнуваат внимание, а која полесно може да еволуира во депресија, подлабока депресија и други форми на ментални нарушувања. Системот треба да се гради така што да обезбедиме рана детекција и рана превенција, да не дојдеме до случаи на самоубиството, истакна Моника Зајкова, пратеничка и претседателка на Либерално-демократска партија на конференцијата за подигнување на свеста за менталното здравје во основните и средните училишта во организација на Либерален институт – Скопје.
„Треба да сме свесни дека глобалните трендови се менуваат и дека навистина сега генерациите живеат под поголем притисок, поголем стрес, а до тоа доведува и брзиот пристап на информации, социјалните мрежи итн. Факт е дека повеќето од луѓето не може да си дозволат психотерапија, токму затоа ни треба закон што ќе гарантира бесплатни сесии за советување, а веќе работиме и на национална стратегија за ментално здравје кај младите луѓе, но и подобрување на законот за ментално здравје, кој засега ги третира само душевните и менталните растројства“, рече претседателката на Либерално-демократска партија, Моника Зајкова.
Таа додаде дека сè повеќе познати личности и во светот и во Македонија ги споделуваат јавно своите проблеми со менталното здравје, но дека табуата постојат, особено во руралните средини, каде што овие проблеми се решаваат тајно. Зајкова ја потенцира и потребата од повеќе конференции на овие теми, повеќе кампањи, затоа што законот е едно, меѓутоа тој ќе треба да се имплементира и да се менува свесноста кај луѓето за темата ментално здравје.
„Менталното здравје не го опфаќа само врсничкото насилство, тоа влијае и во постпородилниот период кај жените. Исто така, влијае во секојдневните односи, најчесто младите се жалат на неприфаќање на нивните врски од страна на родителите, секојдневниот булинг што го имаме во училиштата и што го гледаме на социјалните мрежи, сето тоа се рефлектира да имаме нарушено ментално здравје кај помладите и тие да почнуваат да размислуваат во негативен контекст, односно да имаме бројки и проценти што покажуваат дека значително незанемарувачки број на луѓе размислуваат дури на самоубиство, што навистина е загрижувачко“, вели Зајкова.
Таа додава дека исто се случува и со студентите, таму е пострашно бидејќи нема служба во високото образование која може да детектира доколку некој има проблем, тие сакаат некаде да го кажат. Но, кога се зборува за отворање такви канцеларии, повеќето од студентите и средношколците бараат тие да бидат надвор од округот на универзитетите бидејќи се плашат дека ако бидат видени од своите врсници, бараат помош, ќе бидат предмет на потсмев или критика дека нешто не е во ред со нив.
„Најголемите ѕвезди, кои имаат и финансиска и општествена моќ, баш поради тоа може да страдаат од депресии и анксиозност поради брзата динамика на живот.
Музичарот Авичи во филмот снимен за него зборуваше колку веќе му е товар славата и никој не го ислушува и разбира за да се заврши приказната со самоубиство, да не дозволиме и да превенираме вакви идни приказни, додаде Зајкова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Не ми паѓа на памет да размислувам за било какви уставни измени, без гаранции

Без гаранции не ми паѓа на памет да размислувам за уставни измени. Нашата позиција е јасна, ние не ги игнорираме обврските што претходната влада на СДСМ ги прифатила, за жал, но исто така не гледаме дека нашиот источен сосед прави нешто во насока на испорака на своите обврски. Очекуваме поробусна акција од ЕУ и кај нашиот источен сосед, односно кај нивниот партнер во рамки на европското семејство зашто сме виделе во минатото многу пати – кога се сакало се се можело, порача денеска премиерот Христијан Мицкоски.
„Вчера дадов еден краток коментар, денес бидејќи ме прашувате ќе дадам одговор на вашето прашање и ќе го поделам одговорот во два дела,“ изјави Мицкоски, одговарајќи на новинарско прашање во врска со неговиот став во однос на Резолуцијата и на решението да се донесат уставни измени до февруари поднесена од страна на претседателот на опозициската СДСМ Венко Филипче.
„Првиот дел е дека, за жал и ова раководство на СДСМ ја продолжува практиката на претходните раководства на СДСМ да ги руши позициите на македонската Влада и на државата, да ги распродава идентитетските и националните приоритети, од, за мене, неразбирливи причини. Ако на времето тоа го правеа за да се одржат на власт, за да можат да ги злоупотребуваат институциите и ресурсите на државата, не го оправдував се разбира за тоа има одговорност, но и некако ги разбирав. Сега не ги разбирам од опозиција зошто мора да ги подриваат позициите на Владата којашто грчевито се бори, тоа што тие го распродадоа, изминатите 7 години кога беа во влада, да го поправи. И на меѓународен и на домашен план,“ истакна Мицкоски и додаде:
„Второ, Резолуцијата, таканаречена, којашто ја видов и текстот внатре ќе се разгледува после изборите, така го разбрав раководството на СДСМ.
Трето, таму има историски фалсификати. Во годината кога славиме 80 години од кодификацијата на македонскиот јазик, тие не убедуваат во Резолуцијата дека тој во Обединетите нации бил прифатен во 19-тата година, мислам, не знам што да кажам. И вчера го кажав фактот дека во 2005-тата година, не доби Северна Македонија дата за почеток на преговори, туку доби Република Македонија. Тоа се историски фалсификати, јас не знам до кога овие луѓе ќе се служат со историски фалсификати“.
„И конечно, нашата позиција е јасна. Ние не ги игнорираме обврските што таа влада ги прифатила, за жал. Но, исто така, не гледаме дека нашиот источен сосед прави нешто во насока на испорака на нивните обврски и очекуваме исто така, поробусна акција од страна на Европската комисија и Европската Унија и кај нашиот источен сосед, односно кај нивниот партнер во рамките на европското семејство. Затоа што сме виделе во минатото многу пати дека кога се сакало, се можело.
Ние имаме јасна позиција – гаранции, коишто ги спомена претседателот на Европскиот совет, бидејќи македонскиот народ и граѓаните во Македонија без разлика на етничката припадност, многу дадоа во името на таа европска иднина на државата, многу дадоа, како ниеден друг народ во Европа. Сакате да тргнеме од 18-ти, 19-ти век па наваму да анализираме. Сега веќе да не зборуваме, последниов. Без такви гаранции, на памет не ми паѓа да размислувам за било какви уставни измени,“ истакна Мицкоски.
Тој е дециден дека никогаш нема да се откаже од македонскиот народ во соседството и насекаде во светот.
„Што со Македонците од другата страна на таа граница? Што со нив? Ќе се откажуваме ли секогаш како влади од македонскиот народ во соседството и насекаде во светот? Тоа јас нема да го направам. Никогаш. А треба само едноставно да се применат пресудите од Стразбур, ништо повеќе не треба да прават. Тоа е меѓународно право, Бугарија е потписник на тие конвенции. Само треба да го применат она коешто го донел Европскиот суд за човекови права во Стразбур, којшто е европска темелна вредност. Да може ОМО Илинден – Пирин да функционира како здружение на Македонците во Бугарија. И со тоа ќе се стекне ОМО Илинден – Пирин со право да претстави свој човек во Министерскиот совет за малцинства во Бугарија, како што имаат Евреите, Ерменците, Турците, Ромите итн. Заслужиле Македонците коишто, според пописот во 56-та година биле мнозинство во Западна Бугарија, а во 65-та магично 200 илјади исчезнуваат, во следниот попис да имаат свој претставник тамо. И јасно држење до Резолуцијата од јули 2022-та година којашто ја гласаше Парламентот заеднички со 95 гласа. Ништо друго не бараме. Ова е тоа што го бараме. Ова се се факти. Кога ќе видиме подготвеност од другата страна, и ние сме подготвени да седнеме и да разговараме. А за оваа Резолуција, тоа малку што имаме да го кажеме ќе го кажеме после изборите,“ рече Мицкоски.
На новинарското прашање дали ги прифаќа црвените линии на Филипче тој одговори дека не прифатиле негови црвени линии, прифаќа македонски црвени линии: „не би го коментирал тоа, можеме да растураме пердуви колку сакаме, ниту сме прифатиле црвени линии негови, јас прифаќам македонски црвени линии“.
Македонија
„OCR Кучково 2025“: во недела петто издание на трка со препреки во Македонија

На 28 септември 2025 година, во с. Кучково, Општина Ѓорче Петров (кај Крстот), ќе се одржи петтото издание на единствената трка со препреки во Македонија, организирана од Спортското здружение ОТАКУ СКОПЈЕ.
Оваа трка претставува уникатно спортско и адреналинско доживување за сите учесници, кои ќе можат да ја тестираат својата физичка и психичка подготвеност на патека долга преку 8 км која има повеќе од 20 предизвикувачки препреки. Трката вклучува качување по јаже, преминување преку високи ѕидови, ползење низ кал, носење товар, трчање низ природен терен, како и многу други предизвици кои остануваат изненадување, најави организаторот.
„OCR Кучково“ е многу повеќе од спортска трка – тоа е тест за издржливост, самонадминување и тимски дух, кој создава незаборавни моменти за секој што ќе застане на стартната линија.
По завршувањето на трката ќе се одржи церемонија за наградување на најдобрите во категориите: мажи, жени и тимови“.
Организаторите ги покануваат сите љубители на спортот, авантурата и природата, да ги бодрат натпреварувачите и да уживаат во единствената трка со препреки во земјава, која ќе се одржи во недела (28 септември, во 10:00 часот), кај Крстот во с. Кучково.
Македонија
Доста е со декларации и резолуции, да се фатиме за работа, порачува Демократскиот сојуз

Демократскиот сојуз предлага конкретна активност, а не резолуции или декларации ко според нив се користат за дневно политички препукувања, манипулации и политички маркетинг.
Демократскиот сојуз бара да се престане со носење на резолуции и декларации кои никого не го обврзуваат и никој не ги разгледува или чита.
Демократскиот сојуз предлага македонскиот Парламент да се обрати до Советот на Европската Унија со следните барања:
Советот на Европската Унија да ги донесе следните заклучоци:
Прво, по приемот на Македонија во Европската Унија, Македонскиот јазик да биде официјален јазик.
Второ, историските, идентитетските и јазичните прашања да не можат да бидат основа за блокада на евроинтегративните процеси.
Трето, да ја обврзе Бугарија да ги спроведат одлуките на Меѓународниот суд за човекови права од Стразбур, со кои ќе им се овозможи на Македонците во Бугарија да се здружуваат за афирмација на своите особености поврзани со јазикот, културата, историјата итн“.
На овој начин, како што оценуваат од оваа партија, ќе се покаже национално единство и ќе се предизвика реакција од страна на ЕУ.