Македонија
ЗЕРО БРЕНД го прослави првиот роденден – година исполнета со креација, грациозност и уникатни модели во Македонија

Модната куќа ЗЕРО одбележува една година од своето постоење.
По повод првиот роденден, брендот промовираше специјална колекција на свечени тоалети, кои се вистински избор за незаборавните матурски и апсолвентски прослави, како и други значајни настани за младите припаднички на понежниот пол во летната сезона која ни претстои.
Во изминатата година ЗЕРО и понуди па македонската модна сцена уникатни модели, со истакнати нијанси на италијанскиот моден шарм, кои особено ја потенцираат грациозноста и природната убавина на жената. Сите линии доживеаја голем успех, особено кај помладите генерации, кои сакаат да ја покажат својата храброст со носењето на смели парчиња гардероба.
Од ЗЕРО најавуваат нови колекции, кои овојпат ќе понудат модни решенија за жените од различни генерации и за различни пригоди, со цел секоја жена, носејќи ги моделите на ЗЕРО, да се почуствува елегантно, грациозно, но притоа и удобно, како и дека е во тек со светските модни трендови.
„Во текот на мај, како месец на својата годишнина, ЗЕРО БРЕНД во својот ексклузивен салон во центарот на Скопје ќе има специјални понуди и попусти за своите клиенти“, посочува бренд менаџерката Дучевска и ги покани сите девојки да го посетат атељето на ЗЕРО БРЕНД и да пробаат некој од екслузивните модели.
ЗЕРО е дел од групацијата ФЕРОИНВЕСТ/ЦЕНТРАЛИНВЕСТ и одлично се вклопи во имиџот на сериозен бренд и деловен успех изграден во последните две децении.
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Андоновски: Уверенија од судовите сега со неколку клика, без редици и чекање

Министерот за дигитална трансформација, Стефан Андоновски, на денешната прес-конференција пред претставниците на медиумите, ги соопшти новите услуги од Основните судови, кои од сега за граѓаните се достапни на националниот портал за електронски услуги – uslugi.gov.mk.
„Денеска имам чест да означам заокружување на еден значаен чекор кон дигитализирањето на најважните услуги за граѓаните. На Националниот портал за електронски услуги – uslugi.gov.mk – од денес се достапни две нови, долго очекувани услуги од Основните судови, тоа се, Уверение од кривична евиденција за физички лица и Уверение од кривична евиденција за правни лица“, изјави Андоновски
Министерот дополни дека станува збор за најкористените тековни услуги од основните судови, кои заедно со комплетирањето на пакетот на судски потврди што секојдневно им се потребни на граѓаните и компаниите го сочинуваат пакетот за неосудуваност.
Во овој пакет, веќе дигитализирани се и Потврдата од казнена евиденција и Потврдата за изречена забрана на вршење професија, дејност или должност, станува збор за документи кои се често потребни во секојдневниот живот – за вработување, аплицирање за јавни повици, образовни постапки и многу други правни и административни процедури.
Андоновски истакна дека намерата е граѓаните повеќе да не чекаат со часови пред судските шалтери и архиви. Во таа насока истакна дека целта на Министерството е едноставна, но ефикасна: „Граѓаните да поминуваат повеќе време со своите семејства, со своите пријатели, и да придонесуваат кон економијата, а помалку пред административни шалтери.“
Македонија
СДСМ бара оставка од Тошковски, ВМРО-ДПМНЕ им враќа со скандалозни факти

По вооружената пресметка кај Бит Пазар во која животот го загуби 31-годишен маж, СДСМ обвини за распад на безбедносниот систем и побара оставка од министерот за внатрешни работи Панче Тошковски. Од друга страна, владејачката ВМРО-ДПМНЕ возврати дека токму во времето на СДСМ безбедносниот систем бил најмногу нарушен, а дека денес институциите конечно функционираат и се расчистува со криминалот.
Опозициската СДСМ вели дека безбедноста е сериозно нарушена и побара Панче Тошковски да си поднесе оставка.
„Хаос владее на улиците, безбедноста на граѓаните е сериозно нарушена“, обвинија денеска од СДСМ, реагирајќи на вчерашната престрелка кај Бит Пазар.
„Додека Панче Тошковски се изживува врз граѓаните и поднесува кривични пријави за објави на Фејсбук, криминалните банди му праќаат порака дека тој не ја контролира безбедноста и не му се плашат. МВР, под негово водство, е паднато на колена. Вчера сред бел ден, пред полициска станица, се случи мафијашка престрелка со загинати и повредени. Тоа е тотален распад на безбедносниот апарат“, наведуваат од партијата.
Од СДСМ бараат оставка од министерот Тошковски како прв чекор за, како што велат, враќање на безбедноста на улиците.
„Доста беше Тошковски. Време е за оставка, време е за одговорност. Потребни се промени и итни реформи во безбедносниот систем, за да им се врати мирот и сигурноста на граѓаните“, истакнаа од СДСМ.
Од ВМРО-ДПМНЕ остро возвратија дека токму за време на владеењето на СДСМ државата била претворена во „оаза за белосветски криминалци и наркобосови“.
„Во мандатот на нивниот долгогодишен министер за внатрешни работи, Оливер Спасовски, се доделуваа македонски пасоши на светски криминалци, наркобосови, па дури и на припадници на ИСИС. За време на нивното владеење пробивани беа акции за меѓународен шверц на дрога, а мафијата си доби своја држава“, реагираа од ВМРО-ДПМНЕ.
Партијата обвини дека нападите на СДСМ се затоа што денес конечно се расчистува со криминалците.
„Системот почнува да функционира, криминалците се апсат, а секој што се огрешил пред законот ќе одговара. СДС се плаши токму затоа што законот сега важи за сите, без исклучоци“, велат од владејачката партија.
Скопје
Обвинителството собира докази и видео-снимки за расчистување на убиството кај Бит-пазар

По вчерашната вооружена престрелка во близина на Полициската станица во Бит Пазар, во која животот го загуби 31-годишниот А.С. од Скопје, дежурен јавен обвинител од Основното јавно обвинителство Скопје изврши увид на лице место и ги презеде првичните истражни дејствија.
Од обвинителството информираат дека на лице место се прибрани траги кои ќе бидат предмет на понатамошно вештачење, со цел да се расветлат сите околности околу настанот.
„По наредба на јавен обвинител, се обезбедуваат снимки од видео надзор од околните објекти, а издадени се сите потребни наредби и насоки за идентификација на инволвираните лица и целосно расчистување на настанот“, информираат од Основното јавно обвинителство Скопје.
Врз телото на починатиот ќе биде извршена обдукција, со цел прецизно да се утврдат причините за смртта.
Инаку, според досега познатите информации, пукањето се случило попладне на само неколку метри од Полициската станица во Бит Пазар. А.С. бил итно пренесен во Клиничкиот центар во Скопје со тешки прострелни рани на главата, градите и други делови од телото, но, и покрај лекарските напори, им подлегнал на повредите во операционата сала.
Основното јавно обвинителство Скопје најавува дека интензивно ќе продолжи со сите неопходни активности за целосно расчистување на случајот.