Tретообвинетиот за случајот „Рекет“, Зоран Милески-Кичеец е осуден на 3 години затвор откако тој вчера призна вина за случајот и предметот за него беше одвоен од оној против Бојан Јовановски – Боки 13 и Катица Јанева. Милески е осуден за кривично дело примање награда за противзаконско влијание за која е предвидена казна затвор од 1 до 10 години. Тој има право на жалба до Апелациониот суд само во делот на висината на казната.

Судот информираше дека во издржувањето на казната ќе му биде пресметано и времето поминато во притвор и куќен притвор започнувајќи од 15.07.2019 година.

Милески останува во куќен притвор до правосилноста на пресудата и покрај тоа што неговите адвокати бараа куќниот притвор да биде укинат за да може да се грижи за неговиот болен родител.

Неговиот адвокат Александар Новаковски предложи куќниот притвор да биде укинат, бидејќи татко му е во тешка здравствена состојба и нема кој друг да се грижи за него.

„Тој досега покажа и призна вина, мислам дека треба да се укине мерката притвор. За тоа доставивме и документација и како син единец треба да биде пуштен да се брани од слобода и нема каде да се даде во бегство“, рече неговиот адвокат Александар Новаковски.

Милески беше обвинет за примање награда за противзаконско влијание во случајот „Рекет“.

За ексшефицата на СЈО Катица Јанева и за Бојан Јовановски – Боки 13, постапката продолжува в петок, на шести декември, кога ќе сведочат бизнисменот Орце Камчев и неговата сопруга Ана. Јовановски е обвинет за примање награда за противзаконско влијание и за перење пари, а Катица Јанева дека ја злоупотребила службената положба и овластување.

Според обвинението, од ноември 2018 година до април 2019 година, Јовановски го искористил пријателството со шефицата на СЈО, Катица Јанева, и ѝ влијаел да го ослободи од притвор осомничениот бизнисмен, Орце Камчев, во предметот „Империја“.

Јанева му ја олеснила положбата во истрагата на Камчев, па предложила да му се укине притворот и да му се определи поблага мерка, куќен притвор, при неизменети околности.

Во натамошниот тек на постапката Јанева планирала да му даде својство на заштитен сведок и да ја запре истражната постапка или да склучи со него предлог-спогодба за вина за полесни кривични дела, а Камчев да плати незначителен износ на штета и да му се врати пасошот.

Кичеец, пак, договарал средби меѓу Јовановски и брачната двојка Камчеви, а за возврат за посредувањето примиле награда од 1,5 милиони евра. Јанева, според обвинението, ова го прифатила и за себе прибавила мебел од околу пет илјади евра кој за неа го набавил Боки 13, и готовина од 50.000 евра.

На вчерашното прво рочиште за „Рекет“, Јовановски и Јанева се изјаснија дека не чувствуваат вина за делата за кои се товарат.