Министерот за здравство, Венко Филипче, сè уште не најде долготрајно решение за проблемот со недостиг на инсулин за дијабетичарите. По неговото доаѓање на чело на Mинистерството, беа извршени две вонредни набавки на инсулин, првата во декември 2017, а потоа и во јуни оваа година.

Од Министерството за здравство, вчера, по објавата на „Макфакс“ за недостиг од инсулин, соопштија дека уште денеска ќе биде распишан тендерот за набавка на лекот. Но, сепак, останува отворено прашањето зошто министерот за здравство цели пет месеци распишува тендер и покрај сознанијата дека има недостиг на инсулин. Уште во март годинава од Министерството најавуваа дека се прават последните подготовки и анализа за потребните количини инсулини, но тендерот не беше пуштен.

„Макфакс“ се обиде да стапи во контакт со министерот Филипче, но тој не одговори на нашите повици за разлика од вчера кога вети дека денеска ќе даде одговор на нашите прашања.

Националниот координатор за здравство, Гоце Чакаровски, за „Макфакс“ рече дека тендерот за набавка на инсулин е изготвен, но нема информација зошто се чека да се објави по што нè препрати да се обратиме до кабинетот на министерот Филипче.

Оттаму ни потврдија дека тендерот ќе биде објавен во текот на денот, односно дека се чека на министерот да се врати од владината седница за да го потпише. На прашањето зошто толку долго се чекаше за објавување на тендерот, од кабинетот образложија дека причината за задоцнувањето е тоа што било потребно подолго време бидејќи се собирале детаљни информации за бројот на пациенти, се вршеле процени, точна анализа и проверка на потребната количина сè со цел да не се дојде до ситуација да има потреба од интервентен увоз.

Претходниот редовен тендер беше распишан во 2016 година од страна на ексминситерот за здравство, Никола Тодоров, кој беше цел на напад на јавноста поради критериумите што беа поставени на тендерот. Дијабетичарите се жалат дека добиваат неквалитетен инсулин што не ги задоволува ИСО-стандардите, а исто така има жалби и за квалитетот на глукометрите со кои се мери висината на шеќерот во крвта.

Претседателката на Здружението на лицата со дијабетес, „Алегрија“, Рената Јакимовиќ, вчера за „Макфакс“ истакна дека дијабетичарите се принудени меѓу себе да си позајмуваат инсулин бидејќи не може да го најдат во аптеките. Министерството за здравство по оваа изјава испрати реакција во која се вели дека на повидок нема никаква инсулинска криза, односно дека има доволно инсулин во инсулинските аптеки и покрај сведочењата на лицата со дијабетес дека во аптеките каде што го набавуваат лекот нема доволно инсулин.

Виктор Јованов