Македонија
Изет Меџити на државната церемонија за 17-годишнината од независноста на Косово: „Нашата поддршка никогаш нема да се разниша”

Првиот заменик-претседател на Владата на Северна Македонија, Изет Меџити, присуствуваше на државната церемонија по повод 17-годишнината од независноста на Република Косово, организирана од претседателката Вјоса Османи, претседателот на Собранието Глаук Коњуфца и премиерот Албин Курти.
Во реакција по овој настан, Меџити ја истакна историската важност на независноста на Косово, нарекувајќи ја „доказ за непокорниот дух на Албанците“ и пример на инспирација за сите Албанци, вклучително и за оние во Северна Македонија.
„Косово е приказна за триумфот на посветеноста и жртвата за слобода и градење држава. Во овие 17 години, Косово направи значајни чекори во зајакнувањето на институциите и напредокот кон интеграцијата во Европската Унија. Овој пат е инспирација и за нас во Северна Македонија, каде што Албанците беа и остануваат клучен фактор во демократскиот и европскиот развој на државата“, изјави тој.
Меџити дополнително нагласи дека поддршката за Косово отсекогаш била и ќе остане непоколеблива, потенцирајќи ја важноста на тесната соработка меѓу двете земји.
„Тесната соработка со Косово е должност и аманет од нашата заедничка историја. Само преку силни политички, економски и културни врски можеме да придонесеме за поодржлива, просперитетна и интегрирана иднина за целиот регион“, додаде тој.
На крајот, Меџити ја честиташе годишнината на независноста на Косово, изразувајќи желба „слободното знаме на Косово секогаш да се вее со гордост и достоинство“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Прекинат сообраќајот на патот Мавровска крстосница-Гостивар поради сообраќајна несреќа, возилата се пренасочуваат по споредните патишта

Денеска во ОВР Гостивар во 15:56 часот пријавена е сообраќајна несреќа на магистралниот пат од Мавровска крстосница кон Гостивар, во која учествувале четири мотоцикли и четири патнички возила.
До сега се пријавени пет повредени лица. Сообраќајот на овој магистрален пат е во прекин, а од страна на полициски службеници од ОВР Гостивар сообраќајот се пренасочува по споредни локални патишта (Прогрес каменолом и Панорама кај Вруток).
Македонија
Муртезани на панел за улогата на Албанците во регионалната соработка и европската интеграција

Министерот за европски прашања, Орхан Муртезани, денеска учествуваше на Амбасадорската конференција #Diplo2025, што денес и утре се одржува во Тирана, Албанија. Министерот Муртезани беше говорник на панелот на тема „Албанците во регионот – заеднички идентитет, заедничка европска цел“, во рамки на првиот ден од Конференцијата.
Во своето обраќање, министерот Муртезани нагласи дека патот кон Европската Унија за земјите од Западен Балкан претставува избор на вредности и заедничка иднина, а не само технички процес. Тој истакна дека Северна Македонија останува цврсто посветена на европската агенда преку спроведување суштински реформи поддржани со Инструментот за претпристапна помош и Инструментот за реформи и раст во рамки на Планот за раст за Западен Балкан.
Министерот потсети на значењето на Охридскиот договор од 2001 година, кој ја претвори Северна Македонија во функционална мултиетничка демократија и овозможи активна политичка и институционална улога на Албанците во државата. Овој модел, како што подвлече, е доказ дека различноста претставува сила која ја зајакнува стабилноста и е вредност што се поклопува со европските стандарди. Муртезани се осврна и на потребата од натамошна регионална поврзаност преку заеднички инфраструктурни и културни проекти. Тој го посочи Коридорот 8 како симбол на интеграција и европска поврзаност, кој истовремено ја олеснува трговијата и ја зајакнува соработката меѓу државите од регионот. Во тој контекст, тој ја истакна важноста и на културните и образовните размени кои придонесуваат за создавање на заеднички европски идентитет.
Во своите пораки, Муртезани нагласи дека албанските заедници низ регионот имаат улога на природни мостови за дијалог и разбирање, кои придонесуваат за добрососедски односи; еден од клучните критериуми за членство во Унијата. Тој истакна дека Албанците во регионот отсекогаш биле активни во градењето институции, јакнењето на социјалната кохезија и унапредувањето на владеењето на правото, како и во борбата против корупцијата, што претставува клучна вредност и европска и општествена.
Завршувајќи го своето обраќање, министерот Муртезани се повика на зборовите на писателот Исмаил Кадаре „Европа е нашата куќа и ние немаме друга“, подвлекувајќи дека оваа порака е потврда на заедничката определба за европска иднина на целиот регион.
Македонија
Орце Ѓоргиевски: „EXIT“ доаѓа во Скопје!

Кандидатот за градоначалник на Скопје, Орце Ѓоргиевски, информира дека е постигнат договор со основачот на „EXIT“ фестивалот, Душан Ковачевиќ, од следната година Скопје да биде нова дестинација на една од водечките европски фестивалски групации.
„Убеден сум дека бренд како „EXIT“ значително ќе го зголеми квалитетот на забавниот живот и културната понуда на Скопје и Македонија. Тоа ќе ја стави нашата метропола на мапата на топ дестинации за посета на огромен број туристи, бидејќи граѓаните на Скопје и Македонија го заслужуваат најдоброто“, изјави Ѓоргиевски.
Со ова Скопје ќе се вброи меѓу европските градови кои се дел од мрежата на еден од најпрестижните музички фестивали во Европа, што ќе значи и нова енергија, нови инвестиции и зголемување на туристичкиот потенцијал на главниот град.