Македонија
Имаме контакт со 50 македонски граѓани во Израел, но бројката е поголема, работиме на нивно извлекување, вели Ковачевски

Премиерот Димитар Ковачевски истакна дека поминале тешка непроспиена ноќ и тој и сите во Амбасадата во Тел Авив и во кризниот штаб во Министерството за надворешни работи по нападите во Израел.
„Мојот кабинет контактира со земјите соседи и со другите партнерски земји, кои имаат авиокомпании и кои може да слетуваат на аеродромите или во Израел или во околните држави“, рече тој.
Потврди дека некои од нашите граѓани што беа во Израел се веќе вратени дома.
„Контактите со другите наши граѓани што се таму продолжуваат. Имаме некои од граѓаните што се лоцирани, тие се 50-ина, но и некои со кои не е стапено во контакт и на тоа се работи во моментот. Се работи на нивно извлекување од Израел и безбедно враќање дома. Досега имаме воспоставено контакт со 50 наши граѓани, но бројката се зголемува бидејќи таму има и студенти, како и градежни работници“, нагласи Ковачевски.
Според него, во Амбасадата во Тел Авив деноноќно се работи на воспоставување контакт со граѓаните и, како што рече, ќе биде направено сè што е потребно за секој граѓанин да биде на безбедно и да може да се врати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.