Топ
Исчезнатата Вања последен пат забележана кај „Броз кафе“, од каде што ѝ се губи трагата; „Како родители мислиме само на најлошото“, вели мајката

МВР интензивно трага по 14-годишната Вања Ѓорчевска од Скопје откога вчера, во 8.35 часот, мајка ѝ пријавила дека е исчезната.
Мајката на исчезнатото девојче за „Макфакс“ раскажува дека и таа и полицијата го прегледувале нејзиниот компјутер, но дека не пронашле ништо.
Ѓорчевска појаснува дека полицијата ги прегледувала и камерите и сите достапни материјали и докази што би можеле да помогнат во пронаоѓање на исчезнатата Вања.
Мајката реагира на написите и коментарите на јавноста, кои упатуваат критики за работата на полицијата.
„Морав да реагирам затоа што полицијата активно работи на пронаоѓање на нашата Вања. Сите инспектори се вклучени, сите работат. Јас синоќа до три часот по полноќ бев во Полициската станица Беко и сите беа вклучени во потрагата. Вклучени сме сите, и полицијата, и роднини, и пријатели и другарчињата. Сега излепивме и постери со ликот на Вања во Центар за полесно пронаоѓање“, раскажува мајката.
Телефонот на Вања, како што додава, и натаму е исклучен.
„Вања излезе вчераутро во 7.20 часот, а јас излегов по неа во 7.40 часот. Набргу ми се јави нејзината класна и ми кажа дека Вања не е на училиште. Јас веднаш ја побарав, но беше недостапна, телефонот ѝ беше исклучен. Проверив на ‘Гугл мапс’ и видов дека последно е регистрирана во близина на ‘Броз кафе’ на ‘Партизанска’“, појаснува таа.
Вели дека Вања била весела вечерта пред настанот и дека ништо не наведувало оти нешто такво може да се случи.
„Вечерта беше весела, весела си отиде на училиште, не сме се расправале, отворено си разговараме за сè. Ги распрашав сите нејзини другарчиња. Тие доаѓаа и претходно тука, се дружеа, си седеа. Но, никој вчера не ја видел Вања во училиште“, кажува мајката.
„Како родители мислиме само на најлошто. Надлежните ни велат дека досега не памтат сличен ваков случај“, додава Ѓорчевска.
МВР апелира да не се шират дезинформации и дека постојано ќе ја информира јавноста сè до пронаоѓање на малолетничката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Пожарите беа цел на група лица што не ѝ мислат добро на Македонија, СДС, освен што е некрофилски, тој е и пиромански“, велат од ВМРО-ДПМНЕ

„Пожарите кои беа чести изминатава недела, беа организирани од група на лица кои не и мислат добро на Македонија, СДС освен што е некрофилска е и пироманска. За среќа, оваа слика исчезна со брзата реакција на Владата и институциите“, велат од ВМРО-ДПМНЕ.
„Прашањето е дали оваа група на луѓе, која палеше низ државата, имаше за цел да создаде хаос низ Скопје и Македонија?
Прашањето е сосема легитимно, бидејќи на местата на пожарите беа најдени дрва, бензин, гуми, ракавици. Ова не е случајно, туку намерно.
Добро е што институциите веднаш ги реагираа и приведоа неколку лица, кои ги започнале пожарите, но жално е што овие лица се поврзуваат со опозицијата, односно СДС и ДУИ.
Дали СДС и ДУИ посегнаа по најлошото средство за дестабилизација и паника низ државата? Нам ова не не чуди, но е за секаква осуда. Да се посегне по палење на државата и опозицијата да се сити на истото е крајно безобразно и е кривично дело.
Ако ова и била намерата на опозицијата, веднаш треба да одговараат. За среќа, спремноста на кадарот, брзата реакција на институциите и опремата која благодарение на претседателот Мицкоски е ставена во употреба го прекина овој хорор“, се наведува во соопштението на ВМРО-ДПМНЕ.
Свет
Трамп: Путин зборува убаво, а потоа бомбардира сè навечер, испраќаме „Патриоти“

Американскиот претседател Доналд Трамп најави дека ќе испрати ракети за воздушна одбрана „Патриот“ во Украина, велејќи дека тие се потребни за одбрана на земјата бидејќи рускиот претседател Владимир Путин „зборува убаво, но потоа бомбардира сè ноќе“.
Трамп не го прецизираше бројот на ракети што планира да ги испрати во Украина, но рече дека САД ќе бидат надоместени за нивните трошоци од Европската Унија. Американскиот претседател е сè повеќе фрустриран од Путин, бидејќи рускиот лидер се спротивставува на обидите на Трамп да преговара за прекин на огнот меѓу Украина и Русија.
Се очекува Трамп да објави нов план за вооружување на Украина со офанзивно оружје, што е нагло отстапување од неговата претходна позиција, објави „Аксиос“, повикувајќи се на два извори запознаени со ова прашање.
Белата куќа не одговори веднаш на барањето на Ројтерс за коментар. Ројтерс не можеше веднаш да го потврди извештајот. Украинскиот претседател Володимир Зеленски побара оружје за одбрана од секојдневниот бран ракетни и беспилотни напади од Русија.
„Ќе им испратиме Патриоти, кои очајно им се потребни, бидејќи Путин навистина изненади многу луѓе. Тој зборува убаво, а потоа ноќе бомбардира сè. Но, има мал проблем со тоа. Не ми се допаѓа“, изјави Трамп за новинарите во базата Ендрус во близина на Вашингтон.
„Во основа ќе им испратиме разни парчиња многу софистицирана воена опрема. Ќе ни платат 100 проценти за тоа, и така сакаме“, додаде тој.
Трамп планира да се сретне со генералниот секретар на НАТО, Марк Руте, оваа недела за да разговараат за Украина и други прашања.
Македонија
„Охридско лето без албанска култура, уште еден доказ за систематска исклученост“, велат од ДУИ

„Оваа година, државната манифестација „Охридско лето“, финансирана од јавните институции на земјата, се одвива без никакво претставување на албанската култура во официјалната програма. Во една држава каде Албанците претставуваат значаен дел од населението и културниот живот, целосното исклучување на секој албански елемент од еден национален фестивал е неприфатливо и загрижувачко“, велат од ДУИ.
„Официјалната програма на „Охридско лето“ вклучува концерти, театарски претстави и специјални вечери посветени на европски култури, но ниту еден музички настан, театарска изведба или изложба не ја претставува богатата албанска културна традиција. Оваа културна тишина е сама по себе исклучувачка порака и доказ дека пристапот кон албанската култура во државните институции не е застапен, туку маргинализиран.
Иронично, фестивалот беше отворен во присуство на Претседателот на Република Албанија, г. Бајрам Бегај, но ниту тоа не беше доволно за организаторите да размислат за вклучување на албанскиот јазик и култура во програмата. Не само што нема никакво претставување на албански уметници, туку целосно недостига секоја точка што би го одразувала идентитетот, традицијата или современото творештво на Албанците во Северна Македонија.
Албанската култура е и треба да биде природен дел од секоја културна манифестација од национално ниво. Нејзиното отсуство од ваква манифестација не е организациско прашање, туку показател на исклучувачка политика што се вкоренува во институционалниот систем на културата.
Демократската унија за интеграција изразува длабока загриженост за овој исклучувачки пристап и ги повикува одговорните институции да дадат објаснување за ова целосно игнорирање. Владата, Министерството за култура и раководството на фестивалот треба да сносат одговорност за недостигот на претставување на една од главните заедници во оваа земја, не само на јазик, туку и во духот, уметноста и идентитетот.
ДУИ ќе продолжи да го брани културниот диверзитет и, во неговата рамка, достојното претставување на албанската култура на сите институционални нивоа, со убедување дека културата не е средство за исклучување, туку столб на соживотот и општествениот развој“, се наведува во соопштението на ДУИ.