Македонија
„Исчезнатото девојче не е тема со која може да се забавуваме“ – Спасовски најави казни за објавените лажни вести

Профилите што шират лажни вести во медиумите, на „Фејсбук“ и на другите јавни мрежи за исчезнатото девојче се детектирани и против нив ќе се преземат мерки во соработка со јавниот обвинител, рече денес министерот за внатрешни работи, Оливер Спасовски.
Во медиумите што објективно информираат Спасовски гледа сојузници во борбата против лажните вести, но полицијата веќе открила и такви што прават сензација од исчезнувањето на 14-годишната Вања Ѓорчевска.
„Морам да кажам дека сите тие профили што објавуваат какви било лажни вести се детектираат и сите ќе бидат, а некои веќе се и повикани во полициска станица. Таму каде што ќе се утврди дека ја загрозуваат истрагата и придонесуваат да имаме сериозна штета во јавноста, ќе се преземаат мерки заедно со јавниот обвинител. Ова го укажувам затоа што сметам дека ваквите работи не се тема што може да се смета како несериозна или како тема со која ние можеме да се забавуваме како луѓе. Напротив, сметам дека максимално треба да бидеме посветени во добивање резултат од она што ние го работиме“, рече Спасовски.
По исчезнатото девојче се трага петти ден. Полицијата во електронските уреди на семејството, како што извести денес министерот Спасовски, нашла податоци што помагаат во истрагата, но детали нема да соопшти за да не ја загрози. Најави дека во следниот период на дневна база ќе информираат за исчезнатото девојче.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Цената на парното останува иста

Не се менува цената на топлинската енергија – одлучи Регулаторната комисија за енергетика, водни услуги и услуги за управување со комунален отпад на Република Северна Македонија.
РКЕ донесе одлука со која продолжуваат да важат актуелните цени за топлинска енергија се до донесување на нова одлука.
„РКЕ изврши длабинска анализа на доставените податоци за работата на компаниите кои вршат производство, дистрибуција и снабдување со топлинска енергија во Градот Скопје. Констатиравме дека за донесување на одлука која ќе ги рефлектира во целост реалните трошоци на сите регулирани дејности, посебно производство на топлинска енергија, дополнително е потребна проценка на вредноста на основните средства – топланите. РКЕ во февруари испрати барање за процена на основните средства за дејноста производство до Бирото за процена, но до денес го немаме добиено извештајот за процена и поради тоа не може да се направи финална пресметка. Со цел овозможување на еднаков третман на сите потрошувачи на топлинска енергија на територијата на Град Скопје, РКЕ донесе одлуки да продолжат да важат истите тарифи, односно сметките за парно не се менуваат, се до нова одлука “ изјави Марко Бислимоски, претседател на РКЕ.
Инаку со последната одлука од 1 февруари цената за потрошувачите на топлинска енергија во Град Скопје беше зголемена за 5,03 %, како резултат на зголемената цена на природниот гас на светските берзи за 16 % во последниот квартал од 2024 година.
Македонија
Започна реализацијата на пречистителната станица за отпадни води во Битола

Министерството за животна средина и просторно планирање го најави официјалниот почеток на реализацијата на проектот за проектирање и изградба на пречистителна станица за отпадни води во општина Битола, еден од клучните еколошки проекти во државата.
Проектот опфаќа изградба на пречистителна станица, рехабилитација и надградба на канализациска мрежа и целосно подобрување на условите за управување со урбани отпадни води.
‘Проектот ќе обезбеди подобри санитарни услови, заштита на реката Драгор и Вардарскиот слив, како и заштита на подземните води. Пречистителната станица е проектирана за да им служи на над 110 илјади жители’, изјави првиот заменик претседател на Владата и министер за животна средина и просторно планирање Изет Меџити.
Вкупна вредност на изградбата на пречистителна станица е 21,7 милиони евра, а истиот ќе го изведуваат компаниите Лантаниа од Шпанија, Стентон Градба од Македонија, Карканиас од Грција, и тоа во времетраење од 2 години. Надзор на изградбата ќе изврши компанијата Ептиса од Шпанија, со договор вреден 1,06 милиони евра за период од 2025 до 2028 година.
Проектот е финансиран од Европската Унија и општата цел е да се подобри инфраструктурата за собирање и третман на комунални отпадни води во согласност со директивата за третман на третман на отпадни води и националниот закон.
Меџити исто така најави и дека дополнително, во најскоро време се очекува склучување на Договорот за градежни работи за рехабилитација и надградба на канализационата мрежа во општина Битола.
Македонија
СДСМ: Македонија е прва во Европа по изгорена територија во однос на површината

Целосното потфрлање на ВМРО-ДПМНЕ во справување со пожарите минатата и оваа година донесе невидена катастрофа. Податоците се аларманти. Минатата 2024 година, изгореле 95.181 хектари во Македонија. Дури 8 пати повеќе отколку од просекот во последните 17 години, објави СДСМ.
Од таму велат дека изгорените 95.000 хектари зеленило, шуми пасишта ја става Македонија прва во Европа ако се спореди соодносот меѓу изгорената површина со површината на земјата.
„Статистиката покажува дека во 2024 година најмногу изгорена површина имало во Португалија, околу 140 илјади хектари, па во Турција, околу 119 илјади хектари и во Македонија 95 илјади хектари изгорена површина. Но Португалија е значително поголема со површина од 92.000 километри квадратни површина, Турција има речиси 800.0000 километри квадратни а Македонија околу 25.000 квадратни километри површина. Тоа значи дека во однос на површината на земјата во Македонија има изгорено убедливо најмногу територија во Европа! Ова е огромна риродна и еколошка катастрофа“, велат од СДСМ.
Од опозицијата велат дека изгорени се повеќе од 20% од вкупната површина на македонските шуми и пасишта.