Македонија
„Исчезнатото девојче не е тема со која може да се забавуваме“ – Спасовски најави казни за објавените лажни вести

Профилите што шират лажни вести во медиумите, на „Фејсбук“ и на другите јавни мрежи за исчезнатото девојче се детектирани и против нив ќе се преземат мерки во соработка со јавниот обвинител, рече денес министерот за внатрешни работи, Оливер Спасовски.
Во медиумите што објективно информираат Спасовски гледа сојузници во борбата против лажните вести, но полицијата веќе открила и такви што прават сензација од исчезнувањето на 14-годишната Вања Ѓорчевска.
„Морам да кажам дека сите тие профили што објавуваат какви било лажни вести се детектираат и сите ќе бидат, а некои веќе се и повикани во полициска станица. Таму каде што ќе се утврди дека ја загрозуваат истрагата и придонесуваат да имаме сериозна штета во јавноста, ќе се преземаат мерки заедно со јавниот обвинител. Ова го укажувам затоа што сметам дека ваквите работи не се тема што може да се смета како несериозна или како тема со која ние можеме да се забавуваме како луѓе. Напротив, сметам дека максимално треба да бидеме посветени во добивање резултат од она што ние го работиме“, рече Спасовски.
По исчезнатото девојче се трага петти ден. Полицијата во електронските уреди на семејството, како што извести денес министерот Спасовски, нашла податоци што помагаат во истрагата, но детали нема да соопшти за да не ја загрози. Најави дека во следниот период на дневна база ќе информираат за исчезнатото девојче.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Вреди“: Земјата се соочи со високи такси од САД поради расипаниот имиџ на државата

Главната причина зошто Северна Македонија се соочува со повисоки такси од САД не е поврзана само со економските фактори, туку пред се со расипувањето на имиџот на државата на меѓународната сцена, велат од коалицијата ВРЕДИ.
Според нив, ваквото влошување на имиџот е директен резултат на недоличното владеење и скандалите на поранешната власт, вклучително и функционери на ДУИ, кои, како што велат, сега се на американската црна листа, кои не се единствените со нив кои се и клеветници од македонскиот табор. Овие нечесници, додаваат од ВРЕДИ, кои денес се заедно на американската црна листа ги обедини корупцијата во соработката за уништување на земјата.
„Америка не ги зголемува такси без причина. Пораката на Вашингтон е јасна: повеќе не можат да се толерираат корупција и злоупотреба на власта. И кои се оние кои најмногу ја нарушија довербата на западните сојузници во оваа земја? Токму оние кои две децении ги злоупотребуваа институциите и денес се кријат зад празната реторика или онаа со бесмислен национализам. Наместо да жалат за последиците од своите постапки, поранешните функционери на ДУИ и другите треба да им се извинат на граѓаните за големата штета што ја нанеле“, се наведува во соопштението.
Според ВРЕДИ На Северна Македонија и требаат нови политики, сериозен пристап кон економијата и обнова на односите со меѓународните партнери, а не, како што велат, лицемерие од оние кои ја уништија оваа земја.
Македонија
Вчера 794 сообраќајни прекршоци на територијата на целата држава, 163 за брзо возење

Од вкупно издадените 794 платни налози во текот на вчерашниот ден од страна на полициските службеници во рамки на сообраќајните контроли на патиштата низ земјата, по основ на прекршоци од делот на неправилно паркирање беа изречени 269 платни налози, по основ на возење со брзина поголема од дозволената 163 санкции, за возење без возачка дозвола изречени се 69 мерки, извести МВР
„Статистички гледано изречени се 57 мерки по основ на неносење сигурносен појас, потоа 20 санкции за користење мобилен телефон при возење, 33 санкции за пешаци и три за неносење заштитен кацига.
Инаку вчера изречени се седум санкции за возење под дејство на алкохол. Согласно пак одредбите од Законот за возила, 12 возила се исклучени од сообраќај заради техничка неисправност, а 10 возила затоа што не биле со важечка регистрација“, соопштуваат од МВР и додаваат дека сообраќајните контроли продолжуваат и во наредните денови.
Македонија
Ѓорѓиевски и „ЕУ за чист воздух“: Се садат чинари во училиштата и градинките во општина Кисела Вода

Градоначалникот на општина Кисела Вода, Орце Ѓорѓиевски, денес присуствуваше на акцијата за садасување на дрвја чинари во ООУ „Кузман Шапкарев“ како дел од големата еколошка иницијатива, што Општината ја спроведува во сите училишта и градинки. Оваа акција се реализира со поддршка на Канцеларијата за проектни услуги во рамките на проектот „ЕУ за чист воздух“, финансиран од Европската Унија, која ги донира садниците.
„Засадувањето на секое дрвце е инвестиција во иднината на нашите деца. Како Општина, континуирано работиме на подобрување на квалитетот на воздухот и животната средина. Оваа донација е особено значајна бидејќи се насочува токму кон училиштата и градинките – местата каде што нашите деца растат и се образоваат. Покрај многуте акции за пошумување, во сите училишта поставивме прочистувачи на воздухот, а во поголемите паркови на отворено – надворешни пречистувачи, достапни за сите граѓани. Нашата заложба за чиста и здрава животна средина нема да запре овде. Продолжуваме со реализација на еколошки проекти, кои ќе донесат подобри услови за сите жители на Кисела Вода“, изјави градоначалникот Ѓорѓиевски изразувајќи голема благодарност до Европската Унија и до Канцеларијата за проектни услуги за донацијата и поддршката на иницијативата.
„Овој проект е уште еден доказ дека споделуваме исти вредности – грижа за околината и за здравјето на идните генерации. Благодарност до сите што придонесуваат за оваа благородна цел. Заедно создаваме почиста, позелена и поздрава Кисела Вода“, додаде Ѓорѓиевски.