Македонија
И пет минути да се намали чекањето на Табановце е добро за транспортерите, Муратовска реагира зошто има две контроли од полицијата место една

Транспортерите, кои стојат заглавени на граничниот премин Табановце по пет-шест часа, денес добија уште едно ветување за скратување на времето на чекање, овој пат од новиот директор на Царинската управа, Бобан Николовски. Тој, денес, на граничниот премин Табановце се сретна со Билјана Муратовска од Асоцијацијата на превозниците „Макам транс“.
„Имаме две контроли од полицијата наместо една. Јас барам службениците во заднина да си разменуваат податоци и кога влегуваат возила кај нас, да ги проверува нашата, македонската полиција, а кога излегуваат, само српската и тука ќе добиеме најмалку десетина минути. Има технички процедури што мора да се средат и да се најде најоптималниот начин како може да соработуваме. Треба да го намалиме чекањето со преземање одредени активности, како што е забрзувањето при влез во Агенцијата за ветеринарство со другите инспектори и слично. Јас велам, и пет минути да се намали времето за чекање е добро за сите нас“, рече Муратовска.
Таа нагласи дека превозниците на овој граничен премин чекаат и по повеќе од пет-шест часа во периоди на зголемена фреквенција на граничниот премин. Токму затоа смета дека секоја минута чекање што ќе се скрати е битна за превозниците.
„Инаку, пет часа во споредба со тоа што ние чекаме за влез во Хрватска, за влез во Унгарија, се како награда. Бидејќи таму се чека по 30 часа, по 40 часа, по два-три дена, што е страшно, и тоа се нестандардни мерки што ги спроведуваат. Од тој аспект како државна институција Царинската управа и другите треба навистина да нè поддржуваат, да ни дадат можности да се почувствуваме важни во самата држава за да можеме и понатаму да одиме и да се бориме“, рече Муратовска.
Усогласување на работното време на инспекциските служби на граничните премини, автоматизација на терминалите на граничните премини со грант од ЕУ и негово поврзување со новиот систем за видеонадзор и препознавање на регистарските таблички, што се имплементира во моментот, како и унапредување на дигитализацијата и поврзување на институциите во рамките на државата, но и на ниво на држави, се трите главни реформски мерки на кои ќе работи Царинската управа во следниот период.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Наскоро зонско паркирање во Автокоманда

Во скопската населба Автокоманда наскоро ќе биде воведено зонско паркирање, најави кандидатот за градоначалник на Општина Гази Баба, Бобан Стефковски.
„ Со особено задоволство ги информирам жителите на Автокоманда дека е донесено Решение за утврдување на режим на сообраќај во Автокоманда. Со ова официјално се одобрува воведувањето на зонско паркирање – решение кое жителите на Автокоманда го очекуваат повеќе од една деценија“, рече Стефковски.
Тој додава дека во моментов интензивно се работи на изработка на проектот за обележување на улиците и поставување на потребната сигнализација, а активностите на терен ќе започнат во најкус можен рок.
Стефковски најави дека секое домаќинство ќе добие две бесплатни картички за паркирање.
Македонија
Уапсена сопругата на докторот кој беше застрелан во Куманово, била вмешана во обидот за неговото убиство

Полицијата ја уапси сопругата на докторот кој беше застрелан вчера во Куманово. Тој со повреди беше пренесен во болница, но се наоѓа во стабилна состојба. Според информациите на МВР, сопругата е осомничена дека е вмешана во обидот за неговото убиство.
„Вчера полициски службеници од СВР Куманово ја лишија од слобода А.А. (43) од Тетово, поради основи на сомнение дека е поврзана со обидот за убиство на нејзиниот сопруг З.Ш. (43) од село Слупчане, липковско“, велат од МВР.
Исто така, во врска со настанот на службен разговор во СВР Куманово се повикани шест лица, а во домот на Б.С. (50) од Куманово по судска наредба, е извршен претрес.
По целосно документирање на случајот, против сопругата ќе следува соодветна пријава, додека против Љ.Ф. (36) од Гостивар, кој се сомничи за обид за убиство и се уште е во бегство, по консултација со Основното јавно обвинителство, исто така ќе биде поднесена кривична пријава.
Од Министерството за здравство вчера соопштија дека во вооружениот напад во Куманово е повреден докторот Зекирија Шаини. Од таму известија дека повредите не се животно-загрозувачки и дека докторот е во стабилна состојба и се опоравува.
Од ДУИ, пак, информираа дека станува збор за нивен кандидат и носител на листата во Општина Липково.
Македонија
Евакуации во објектите околу плоштадот „ВМРО“ поради куфер оставен на плочникот, полицијата утврди дека е празен

Обезбедувањето на Јавното претпријатие за државни патишта пријавило во полиција дека две лица денес оставиле куфер на плочникот пред нивниот објект сместен на плоштадот „ВМРО“ веднаш до седиштето на владејачката партија ВМРО-ДПМНЕ. Полицијата веднаш излегла на терен, почнала евакуација на вработените од објектите околу плоштадот, а проверките покажале дека куферот е празен.
„Денеска (08.10.2025) во 12.55 часот лице од обезбедувањето на ЈП ‘Државни патишта’ пријавило дека на видеонадзор пред канцелариите на ЈП ‘Државни патишта’ на плоштадот ‘ВМРО’ во Скопје биле забележани две лица како го разгледуваат местото, а едно од лицата оставило куфер. Веднаш по добиената пријава, преземени се соодветни мерки и активности, извршени се потребните проверки и утврдено е дека куферот е празен“, соопшти МВР.