Македонија
Кадриески сака да се лекува во Бугарија, бидејќи лекарите во Струга не биле трогнати од неговите повици за помош

Бекир Кадриески, претседателот на бугарското здружение „Шемето“ кој беше претепан во Струга, сака да го продолжи лекувањето во Бугарија, бидејќи како што вели, се сомнева дека ќе му се помогне во Македонија.
Тој за бугарската телевизија БНТ утрово коментира дека денеска се чувствува подобро, но истакна дека во болницата не се направени никакви испитувања, само му биле препишани лекови. Според него, лекарите не биле особено трогнати од неговите повици за помош.
„Рекоа: кога ќе дојде редот, можеш да се сликаш“, вели Кадриески, кој се пожали на стомачни болки и главоболки. Тој посочи дека го видел својот напаѓач, но немал блиски односи со него. Напаѓачот ѝ се предал на полицијата.
Претходно, во изјава за бугарска „Нова“ вели дека не можел повеќе да живее тука и сака да се пресели во Бугарија.
„Добив закани дека ќе ме убијат. Ова е нормално тука. А вчера додека ме тепаше, ми рече: Ако се јавиш во полиција, ќе те убијам, ќе ти го убијам и семејството, вели Кадриески за бугарска „Нова“.
Другиот копретседател на бугарското здружение – Бугаринот Живко Чакракчиев, синоќа замина за Струга да се види со својот колега.
„Денеска ќе се сретнам со полицијата за да дознаам што се презема за случајот. Она што досега го разбрав е дека напаѓачот навистина се предал, министерот за внатрешни работи на телевизија изјави дека тој ќе биде сослушан. Во исто време познаници на напаѓачот му се јавуваат на Кадриески, му праќаат луѓе дома да го натераат да се сретне со напаѓачот за да се разберат“, објасни Чакракчиев.
Тој смета дека македонските власти сакаат да ги прикријат работите и случајот да не се третира како злосторство од омраза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Николоски во Атина: во фокусот економската соработка меѓу двете земји и подобро регионално поврзување

Заменик претседателот на Владата и министер за транспорт Александар Николоски од денеска е во дводневна работна посета на Атина, каде ќе оствари работни средби со високи претставници на Владата на Грција.
Во рамки на посетата, планирана е средба со вицепремиерот Костис Катзидакис, министерот за инфраструктура и транспорт Христос Димас, како и со алтернативниот министер за инфраструктура и член на Парламентот, Константинос Киранакис.
Исто така предвидена е средба и со менаџментот на пристаништето Пиреа.
На средбите предвидено е да се разговара за економската соработка меѓу двете земји, како и за подобро регионално поврзување.
Ќе се разговара и за изградбата на брзата пруга на коридорот 10, што многу ќе приоднесе за развој на трговијата и размената меѓу двете држави, а ќе преставува и главен крвоток за поврзување на грчките пристаништа со Централна Европа.
Во рамки на средбите планирано е да се отворат теми за унапредување на сообраќајот на Коридор 10 и 10 -д, зголемување на ефикасноста во патниот и железничкиот транспорт, за промовирање на ависообраќајот, како и унапредување на регионалната соработка.
Македонија
Доаѓаат тешки моменти за корумпираните судии, обвинители, политичари и бандити, најави ВМРО-ДПМНЕ

Со судството и обвинителството во Македонија, како што велат од владејачката ВМРО-ДПМНЕ, раководи кланот Заеви и кланот Ахмети.
Тие, според партијата на Мицкоски, се директните виновници кои држат судии и обвинители затоа што се уплашени поради криминалот кој го имаат направено.
„Затоа секој случај кој ќе почне завршува со неуспех.
Затоа секоја пријава на МВР или докази или допрен глас и укажување од Владата или јавноста за криминал на луѓе од СДС и ДУИ завршуваат без епилог, во нечија фиока или затворени се како случаи.
Но, имаме една порака. Ако до Нова година не се смени ова и нема чекори за борба против корупцијата за еклатантни примери на криминал на разни политичко мафијашки групации во земјава, ние ќе објавиме и тргнеме во одлучна акција и чекори кои тоа ќе го променат од корен.
Укажувавме, повикувавме, апелиравме, молевме, но безуспешно“.
Народот, според ВМРО-ДПМНЕ, е разочаран.
Апатијата, како што оценуваат се зголемува.
„Довербата во правна држава ја нема. Надежта се губи.
Нема да го дозволиме тоа. Ќе биде или тие или Македонија. Или тие сите криминалците без разлика на политичка и етничка припадност на една страна, или ние со народот на другата.
Доаѓаат тешки моменти за корумпираните судии, обвинители, и политичари и бандити“.
Македонија
Поради нерегуларности, привремено запира со работа приватниот Факултет за бизнис економија во Скопје , одлучи МОН

Поради констатирани нерегуларности во работењето и непостапување по задолжение за отстранување на истите, Министерството за образование и наука информира дека е донесена одлука за привремено запирање на работата на приватната висока стручна школа – Факултет за бизнис економија во Скопје.
Нерегуларностите се констатирани од страна на посебна комисија во рамки на МОН за вршење надзор над законитоста во работењето, а одлуката за времено запирање на работата на оваа приватна високообразовна установа е донесена и врз основа на мислење од страна на Одборот за акредитација на високото образование.
На Факултетот за бизнис економија, појаснуваат од МОН, нема запишани нови студенти во академската 2025-2026 година. Кон веќе запишаните студенти, високообразовната установа ќе ги исполни обврските предвидени во Законот за високо образование со цел овозможување непречена понатамошна едукација, односно префрлање на други факултети.
„Почитувањето на законските прописи мора да биде основен принцип во работењето на сите образовни установи. Тоа е единствениот начин да се обезбеди одржлив квалитет кон корисниците на образовните услуги.
Во изминатите 15 месеци затворени се и 14 приватни научни институти, од кои дел поради неактивност, а дел поради неисполнување на условите за работа. МОН и во иднина неселективно ќе продолжи да ја контролира работата на образовните и научните установи и да презема соодветни мерки онаму каде ќе бидат констатирани отстапувања од правните норми“.