Директорот на Центарот за управување со кризи, Стојанче Ангелов, изврши лично обиколка на мостот во Визбегово, Скопско, по повторното јавување на граѓани на единствениот број за итни случаи 112 во ЦУК.

Утврди дополнителна опасност од коцките камен, кои од гумите на тешките камиони и возила се вадат и се истуркуваат од патот и од мостот сè до рабовите на мостот, од каде што по нивното паѓање, претставуваат сериозна закана за животот на граѓаните што возат или поминуваат под мостот.

„Оваа коцка може да убие човек“, рече Ангелов тргајќи камења од опасниот мост за време на увидот.

На 12 ноември лани директорот на ЦУК, Стојнче Ангелов, директно од мостот ги повика јавно надлежните да преземат мерки за отстранување на опасноста од големите парчиња бетон што висеа над коловозот и за нестабилноста на мостот надвозник кај Визбегово, Скопско, како и парчиња бетон што висат од него, кои претставуваат опасност за луѓето и возилата што се движат по него, но уште повеќе за тие што се движат под него.

Разграничувањето на надлежностите на Град Скопје и Општина Бутел се преклопуваат и можеби не беа јасни до крај, но Град Скопје преку ЈП „Улица и патишта“ сепак постави заштитна ограда за еден ден по јавниот аларм на ЦУК, што во интерес на безбедноста на граѓаните директорот на ЦУК, Стојанче Ангелов, јавно ја актуализира по повеќето пратени документи и укажувања.

Потоа, на 15 ноември Центарот за управување со кризи упати благодарност до Град Скопје за брзата реакција и отстранување на потенцијалната опасност по граѓаните од парчињата бетонски плочи што висеа од мостот надвозник кај Визбегово, но сега се појавува опасност од коцките камен, кои опасно се вадат од патот и мостот, па се тркалаат до рабовите на мостот.

„Денеска, повторно јавно ги повикавме надлежните институции, но и медиумите и граѓаните да се актуализира отстранувањето на опасноста од мостот во насока институциите да реагираат, медиумите дополнително да истражат и информираат, а граѓаните да пријават каква било опасност на бројот 112. Едноставно кажано, безбедноста на граѓаните е секогаш на прво место. ‘Сејфти фрст!’“, рече Ангелов.