Македонија
„Канал 5+“ замина во историјата – АВМУ ѝ ја одзеде дозволата за работа

Поради неплатен годишен надомест за дозвола за телевизиско емитување во законски утврдениот рок, 30 дена од денот на приемот на фактурата, Агенцијата за аудио и аудиовизуелните медиумски услуги ѝ ја одзеде дозволата за телевизиско емитување на сателитската телевизија „Канал 5+“, е објавено во најновиот број на „Службен весник“.
Телевизијата требало, но не платила 2.489.669 денари или приближно 40 илјади евра за годишен надомест за дозволата за телевизиско емитување за периодот од 5.1.2019 година заклучно со 4.1.2020 година. Во Агенцијата било заведено дека фактурата била уредно примена на 10.1.2019 година.
Советот на АВМУ почнал постапка за одземање на дозволата. Телевизијата, и по сите предупредувања, не го платила долгот, па била донесена одлука да ѝ се одземе дозволата. „Канал 5+“ има право да поднесе тужба до надлежен суд во рок од 30 дена од денот на нејзиниот прием.
Дозволата за телевизиско емитување „Канал5+“ ја има од 5.1.2015 година за емитување преку сателит на државно ниво за телевизиски програмски сервис со претежно забавен општ формат, на македонски јазик. Лани, АВМУ ѝ ја одзеде дозволата за емитување и на телевизијата „Сител 3“. Овие две телевизии никнаа по отворањето на телевизијата „А2“ на бизнисменот Велија Рамковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Лефков: Шоферот на Заев уапсен за подметнување пожар во Струмица

Во изминатиов период кажувавме дека голем дел од пожарите низ државата се подметнуваат од структури блиски до СДС, а денес имаме и докази. Полицијата го уапсила лицето А.Н. шофер на Зоран Заев за подметнување на пожар, изјави Миле Лефков, пратеник од ВМРО-ДПМНЕ.
Фактот што шоферот на Заев ги подметнувал пожарите, додаде тој, отвора прашање, каква е вмешаноста лично на Венко Филипче, знаејќи за нивната блискост и поврзаност?
„Дали има организирана група во СДС за палење пожари и предизвикување хаос во државата? Ако човек од најблиското опкружување на Заев пали, тогаш се поставува прашањето не само дали, туку колкумина се дел од организирана структура и мрежа на пиромани“, праша Лефков.
Тој го повика Филипче, ако не стои заедно со Заев зад потпалувањето на пожарите, јавно да се откаже од него, наместо да биде негов потрчко и извршител.
Лефков рече дека според информации на партијата шоферот на Заев подметнал пожар во атарот на браната Водоча во Струмица.
„Ова е доказ дека пожарите во Македонија не се природна непогода, туку смислено сценарио на СДС и луѓе блиски со нив, со цел создавање нестабилност и хаос во државата. Крајната цел како што кажавме веќе била да се обвинат институциите дека не можат да се справат со пожарите“, рече Лефков.
Тој ги повика институциите да го казнат со најстрога казна шоферот на Заев, но во исто време да истражат до каде води линијата на наредба.
„Очекуваме од јавното обвинителство да не го штити шоферот на Заев. Одговорност мора да има, како за потпалувачите на пожарите, така и за нивните политички ментори“, рече Лефков.
Македонија
Мицкоски: Проектот за студентските домови, конечно, излезе од лавиринтите на бирократијата

Премиерот Христијан Мицкоски денеска при посетата на студентскиот дом „Кузман Јосифовски – Питу“ во Скопје изјави дека рехабилитацијата на студентските домови е значаен проект кој долго време бил заглавен во лавиринти, процедури, но сега конечно се реализира.
„Ова е многу значаен проект, не само за овој студентски дом, туку генерално за сите. Конечно е одглавен. За нас е важно да се заврши и младите луѓе да добијат повеќе од добри услови за сместување“, рече Мицкоски.
Тој додаде дека според она што го видел на терен, разликата во однос на претходната состојба е огромна, и изрази надеж дека студентите ќе почнат да се вселуваат веќе следната година.
„Нашата цел како Влада е реализација на проекти и реформи, бидејќи тоа го очекуваат граѓаните. Да градиме, а не како во минатото кога се крадеше ужасно многу“, изјави премиерот.
Македонија
Мицевски: Дадената шанса за Љупчо Коцевски е веќе потрошена

Без оглед на суштинските и сериозни разлики што постојат меѓу ВМРО-ДПМНЕ и политичката партија Левица – особено во однос на нивниот политички курс и соработката со СДС – нашата заложба за бескомпромисна борба против корупцијата и организираниот криминал останува цврста, доследна и недвосмислена, изјави пратеникот од ВМРО-ДПМНЕ, Никола Мицевски, на седницата за интрпелацијата на јавниот обвинител Љупчо Коцевски, поднесена од Левица.
Таа борба, додаде тој, не смее да зависи од политичките калкулации или од моменталните партнери во опозицијата или власта.
„Таа борба треба да биде водена од принципи и убедувања – дека државата мора конечно да добие функционален, независен и храбар обвинителски систем, кој нема да молчи пред очигледен криминал, кој нема да трепери пред политички притисок, и кој нема да се претвори во соучесник на тие што ја поткопаа државата. Институциите, во соработка со обвинителството со години молчеа пред огромните скандали, голем дел предизвикани од врвот на СДС и ДУИ, што ѝ се добро познати на јавноста. Тие случаи не се и не смеат да бидат заборавени – туку тие се и денес отворена рана на ова општество. А јавното обвинителство остана рамнодушно и пасивно пред тие извори на неправда. Токму затоа сметаме дека дадената шанса за Љупчо Коцевски е веќе потрошена“, рече Мицевски.
Поддршката што тој ја доби не ја оправда, додаде тој.
„Наместо реформа и интегритет – добивме молк и сервилност кон власта што беше поразена од народот. Затоа, ВМРО-ДПМНЕ ќе ја поддржи интерпелацијата, во интерес на принципите, граѓаните и правдата. Нема веќе простор за компромиси со неуспехот. Време е за одговорност“, рече Мицевски.