Македонија
Караџовски: Не сме мафијаши, а Комисијата ќе работи до последната капка пот
Доктор Жарко Караџовски од Комисијата за заразни болести вели дека нема да дозволи никој да ги оцрнува Комиисјата за заразни болести и нејзините членови и дека никогаш тој и неговата фамилија не биле мафијаши, ниту дека се продаваат за ситни пари, а во однос на прозивките од опозициската партија.
„Во Комисијата сум член 26 години и кога другите партии биле на власт, ние сме биле тука професионалци од областа. Сега нè обвинуваат дека сме зеле грдни пари, дури дека за ситни пари се продаваме и дека сме мафијаши. Јас и мојата фамилија не се продаваме за ситни пари што некој ни ги поттурнува. Ако некој треба да поднесе оставка, треба да ни аргументира зошто. Ако сакаат, нека донесат нови луѓе во Комисијата, лично јас ќе ги примам заутре во 8 часот. Нека повелат сите што немаат доверба во Комисијата и нека дадат свое стручно мислење. Не дозволувам никој да си игра со нашите фамилии, со увредите уперени кон мене и кон Комисијата, не давам влакно да ѝ фали. Таму има професионалци со 30-годишно искуство и не дозволуваме никој да нè прави мафијаши и корумпирани. Велат сум имал баснословни пари, но ќе ви кажам дека имам автомобил стар 18 години, еве го тука паркиран и имам двособен стан, а не хациенда како што се пишуваше. Нека каже некој стручен, полиција или истражен орган дали имам земено екстра пари, што ми има потпишано Комисијата, а јас да сум ги примил. Нека дојде меѓународна комисија тоа да го провери“, рече Караџовски.
Тој додаде дека Комисијата ќе работи до последните капки пот и дека нема да го остави населението на цедило.
Министерот Филипче, пак, ја повика опозициската ВМРО-ДПМНЕ да собере доблест и да не го блокира законот за заштита на населението од заразни болести затоа што така ќе му наштети и на здравствениот систем и на граѓаните.
„Опозцијата, ако сакаше да помогне, сега ќе имавме 16 болници. Тие законот го блокираат и сега ние ги блокираме болниците, кои можеше да останат чисти. Еве сега сакаат да го блокираат и законот за заштита на населнието од заразни болести. Го одложија за една недела од нејасни причини. Кажаа дека имале некои работи шот треба да се дорасчистат, кажавме дека сме спремни да разговараме да доприцизираме и најдеме заеднички јазик, но ете законот се одложи за една недела. Искрено се надевам дека ќе соберат доблест и храброст утре да го изгласаат законот“, порача министерот Филипче.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ: Скопје е како Див Запад, вчера беше рането 19-годишно момче
Секоја вечер во нашите градови има нови инциденти, пукања, насилство и криминал, а вчеравечер во Чаир во пукотница е повредено 19-годишно момче со 4 прострелни рани, реагираат од СДСМ.
„Ова сведочи за целосната неспособност на министерот за внатрешни работи, Тошковски, и раководството на ВМРО-ДПМНЕ. Улиците ни се претворија во Див Запад. Имаше пукање во Чаир, во Арачиново, се случи убиство кај Мавровка, а пред тоа пукања имаше и во Синѓелиќ, Батинци, Тетово, и на Пластичарска улица. За сите овие инциденти сторителите не се пронајдени, а од 10 убиства и обиди за убиства, Тошковски успеа да расчисти едвај еден случај. Граѓаните стравуваат за својата безбедност, а Тошковски и ВМРО-ДПМНЕ се целосно неспособни да ги заштитат. За само 100 дена ова е еклатантен пример за неспособна власт каде криминалците прават што сакаат. Дали Мицкоски ќе покаже храброст и ќе го повика Тошковски на одговорност, или повторно ќе застане во негова одбрана?“, прашуваат од СДСМ.
Македонија
ВМРО-ДПМНЕ: Владата на СДС го подготви најскандалозниот тендер за пругата кон Бугарија
„Владата на СДС го подготви најскандалозниот тендер за пругата кон Бугарија која завршува во тунел без излез, а чини 560 милиони евра, неспособноста завршува со нив, работиме 100 проценти одговорно за твојата иднина“, реагираат од ВМРО-ДПМНЕ.
Оттаму велат дека за да одиме напред мора да знаеме факти за минатото.
„За да одиме напред мора да знаеме што ни остави претходната влада на СДС и ДУИ. Да видиме каде сме треба да знаеме од каде почнавме и што наследивме? За да оцениме дали сме задоволни треба да знаеме што се случувало? Каква држава остави владата предводена од СДС? Држава која тоне во корупција и криминал, скандалозни тендери, руинирани институции, Македонија на дно во регионот по сите параметри и што уште не, листата е долга. Во низата скандалозни тендери се и оние на Македонски железници и Државни патишта. Станува збор за тендери за пругата кон Бугарија и патот Прилеп – Градско. Станува збор за најскап тендер за пругата кон Бугарија која завршува во тунел без излез, а вредноста е зголемена за 220 милиони и изнесува 560 милиони евра наместо првично предвидените 340 милиони евра. Овој начин на работа, вакво трошење на народните пари останува во минатото. Неспособноста завршува со нив, работиме 100 проценти одговорно за твојата иднина“, се вели во соопштението на ВМРО-ДПМНЕ.
Македонија
Рекордни 13.400 натпреварувачи од 55 земји трчаат на денешниот маратон во Скопје
На претстојното 20-то јубилејно издание на Виз Ер Скопски Маратон, што ќе се одржи денеска, ќе учествуваат рекордни 13.400 натпреварувачи од 55 земји. Како што соопштија организаторите на маратонот, одредени улици ќе бидат целосно или делумно затворени за сообраќај во периодот на одржување на маратонот, а променетиот режим ќе биде на сила до завршувањето на маратонот, до 14 часот.
Целта на сите трки е на Плоштад „Македонија“. Локација за старт на сите трки e Собрание. Време за старт на сите трки e 08:00 часот, но организаторите апелираат тркачите да дојдат барем 20 минути порано. При влез во старт зоната, се апелира секој тркач да влезе во соодветниот бокс за својата трка или таргет време што го има одбрано при процесот на регистрација, сѐ со цел да не се создаваат турканици. Тркачите на маратонската, полумаратонската и штафетната трка ќе тргнат во правец кон Католичка црква, а тркачите на трката Комерцијална Банка 5км ќе трнат во правец кон Црвен Крст.
Патеката за маратонската трка, полумаратонот и штафетната трка, ќе стартува на улицата „11 Октомври“ пред Собранието и тргнува во правец кон запад по улица „Митрополит Теодосиј Гологанов“. Тркачите ќе трчаат право во двете насоки до крај на овој булевар и продолжуваат право по ул. „Васил Чакаларов“, каде по семафорите во населба Хром, ќе свртат полукружно и ќе се вратат во правец кон центар по истите улици и булевари. Кога ќе се враќаат тркачите кај Собрание, ја продолжуваат трасата по улица „11 Октомври“ кон Црвен Крст и ќе свртат кај Тутунски комбинат лево на бул. „Крушевска Република“ и десно на „Трета Македонска Бригада“. По неа ќе се трча до крстосницата кај Американ Колеџ и ќе се врти лево по улица „Васко Карангелески“. Потоа ќе трчаат право сѐ до крстосницата со бул. „Јане Сандански“. На крстосницата ќе се врти десно и ќе се трча сѐ до крстосницата со бул. „Србија“, каде, пред неа се врти полукружно во истата коловозна страна (другата страна од булеварот е слободна за сообраќај во правец кон Центар) и ќе трчаат до пред крстосницата кај Тобако 2. Тркачите полукружно ќе се враќаат до крстосницата кај Сансет, ул. „Васко Карангелески“, десно до крај и повторно десно ќе излезат на „Трета Македонска Бригада“. Трчаат по истата патека до Собрание, полумаратонците финишираат на Плоштад „Македонија“, а маратонците трчаат уште еден круг.
За патеката за трката на 5 км, стартот е пред Собранието, по кое натпреварувачите ќе трчаат во правец на населба Аеродром, односно кај Тутунски комбинат ќе свртат лево, по „Трета македонска бригада“ и кај Супермаркетот „Тинекс“ ќе свртат полукружно и по истата траса назад до целта – плоштад „Македонија“.
Организаторите на „Виз Ер Скопскиот маратон“ ги замолуваат сите учесници во сообраќајот да ги почитуваат поставените сообраќајни знаци и да ги користат алтернативните решенија за сообраќај. Исто така, СВР Скопје апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвива трката.
Главен покровител на Скопскиот маратон е Министерството за спорт, а покровители се Град Скопје и Делегацијата на ЕУ во Скопје.