Комисијата за заразни болести ја разгледува одлуката граѓаните да може да се тестираат на Ковид-19 во приватните лаборатории, а на сметка на Фондот за здравствено осигурување. Но, како што рече министерот за здравство, Венко Филипче, првично ќе се зголеми бројот на тестови во државните лаборатории за дополнителни 350 теста дневно, ангажирани се поголем број лаборанти, па така, според него, ќе се забрзала и процедурата за тестирање.

Со ова, според Филипче, ќе може да се прават и по 2.000 теста дневно.

„Отвораме нови простории утре наутро, во кое ќе имаме лаборанти и ќе ја забрзаме процедурата за правење тестови. Ние се припремавме во текот на целиот викенд, тестови има, лаборанти има, дијагностиката ќе се прави во Институтот за јавно здравје, работиме и прва и втора смена, до 20 часот навечер. Ќе има додатни термини кои ќе се прават преку ‘Мој термин’. Народот прави грешка што доаѓа во 8 наутро и веднаш сакаат да бидат тестирани, затоа се создава метеж“, рече д-р Жарко Караџовски од Комисијата за заразни болести.

Во текот на неделата, најверојатно, ќе бидат достапни и брзите рапид-тестови, каде што резултатот би бил готов за петнаесетина минути.

Од утре, соопшти министерот за здравство, ќе се прават дополнителни 150 теста во Институтот за јавно здравје, дополнителни 100 теста во Центарот за јавно здравје и 100 уште во лабораторијата во Козле.

„Ја разгледувавме и опцијата да се прават тестови преку Фондот во приватните лаборатории. Мислам дека прашањето ќе го заокружиме до крајот на неделата. Ако утврдиме дека тоа значајно ќе го олесни пристапот на граѓаните, тогаш ќе се дозволи по референтната цена на Фондот да се користат ресурите на приватните лаборатории. До крајот на неделата ќе донесеме одлука“, рече Филипче.

До пред два дена во државава биле направени 235.038 теста, од кои 110.910 се направени во приватните лаборатории – „Авицена“, „Биотек“, „Лаор“, „Синлаб“, „Жан Митрев“ и во „Систина“. Ова практично значи дека 47 отсто, односно речиси половината од тестовите на Ковид-19, граѓаните ги прават во приватните лаборатории и за нив плаќаат приватно.