Никола Груевски нема легитимитет не само за да биде премиер, туку за која и да е државна функција се додека не се расчисти неговиот случај пред Специјалното јавно обвинителство, вели во интервју за А1он лидерот на БЕСА, Билал Касами, новата албанска партија која на последните избори освои пет пратенички мадати.

Тој вели дека не е исклучено имајќи предвид дека ДУИ владееја 10 години заедно со ВМРО-ДПМНЕ, пак да се обидат да состават Влада, а и бројките им одат во прилог, но предупредува дека тоа што Македонија е во ваква ситуација е заеднички именител на ВМРО-ДПМНЕ и ДУИ.
„Иако ставија потпис на таа платформа, односно на декларацијата на политичките партии на Албанците во Македонија, сепак тие прва опција со која партија би направиле коалиција од македонскиот блок сепак ќе биде ВМРО-ДПМНЕ“, вели Касами.

Ако Ахмети не се држи до платформата и влезе во Влада, БЕСА нема да ја поддржи таа влада.

„Почетната изјава на Груевски и ВМРО-ДПМНЕ дека нема да прифатат двојазичност и продолжување на мандатот на Специјалното јавно обвинителство на некој начин ја исклучува поддршката на БЕСА на било каква Влада која ќе биде направена од партија која нема да поддржи решавање на прашањето за албанскиот јазик и СЈО“, вели Касами.

„Имајќи предвид дека СЈО има покренато постапка против Груевски и основниот принцип на Движењето БЕСА дека луѓето кои се обвинети, односно оние за кои се покренати обвиненија од Специјалното јавно обвинителство не треба да бидат во никаква комбинација за следната Влада“, додава Касами, кој не бара Груевски да се тргне од политичката сцена, туку Македонија да се декриминализира.
„Во овој процес треба да бидат опфатени сите функционери кои во минатото ја злоупотребија нивната јавна функција и откако ќе се случи тоа, ако некои од нив би излегле чисти од тие правни процедури, сигурно дека може да продолжат да се занимаваат со политика. Во вакви околности, кога Македонија е во тешка криза институционална, мислам дека основно што треба да прават сите инкриминирани е да се тргнат, да немаат влијание врз отпочнатите процеси на СЈО“, вели Касами.

Потврдува дека БЕСА, “колку што е крив Никола Груевски за ситуацијата во која се наоѓа Република Македонија, уште повеќе е крив и Ахмети“, не би влегле во никаква комбинација, во никаква Влада во која се луѓе инкриминирани и за кои се започнати постапки од СЈО, или кон кои би се покренале постапки.
Касами потврдува дека бараат да продолжи работата на СЈО и да се реши случајот со Специјален суд или пак некое одделение во постојните судови се со цел да не се спречи работата на СЈО во функција на декриминализација на општеството во Македонија./крај/мф