На самиот почеток од денешното рочиште за крвавиот четврток настана расправија помеѓу судијката Добрила Кацарска и адвокатот на обвинетиот Митко Чавков, Сашко Дукоски. Расправијата се случи кога судијката најави дека на денешното рочиште ќе се изведуваат декласифицираните докази од МВР за Митко Чавков, на што адвокатот жестоко реагира дека немал доволно време да ги разгледа бидејќи претходно не му биле доставени, односно дури денеска ги примил.

Судијката Кацарска рече дека во текот на вчерашниот ден судот го барал Дукоски повеќепати за да му ги достават доказите, но тој не се одѕвал на повиците. На ова Дукоски одговори дека не бил во можност да се јави бидејќи бил на интервенција за синусите.

– Вчера бев на медицинска интервенција за чистење синуси, не е професионално веднаш вината за доказите мене да ми ја префрлате. Првиот телефонски повик од судот е примен во 14.21 часот во момент кога бев на интервенција. Кога завршив, се јавив во канцеларијата, ме известија и ми доставија фиксен телефон од судот, на кој се јавував од 15.20 до 15.30 часот, но никој не ја крена слушалката. Не може да се очекува дека затоа што не сум кренал телефон, да биде моја вина зашто не сум ги примил доказите. Ова се докази предложени од наша страна, но ниту еднаш физички не сум ги видел, сега првпат ги гледам и како очекува судот да коментирам докази што првпат ги гледам. Барам судот да ми даде време да извршам увид на доказите, рече Дукоски.

На ова судијката Кацарска истакна дека судот го барал Дукоски и пред 14 часот.

– Не можете така да се однесувате во судница и на тој начин така да разговарате со судот. Не обраќајте ми се висок тон, не сме на улица. Не се јавувавте и пред 14 часот. Не покажавте потреба да се јавите за доказите и за кое образложение говорите кога треба само да ги прочитате доказите за да влезат на записник, рече судијката.

Судечкиот совет даде 1 час пауза за адвокатот Дукоски да ги разгледа доказите по што рочиштето ќе продолжи со нивно изведување.