Македонија
Кацарска: Состојбата во Уставниот суд е проблем на државата и е на штета на граѓаните

Претседателката на Уставниот суд Добрила Кацарска денеска во Судот одржа работен состанок со претседателот на државата Стево Пендаровски, претседателот на Собранието Талат Џафери и претседателот на Владата Димитар Ковачевски. Претседателката Кацарска на состанокот информираше за сериозноста на ситуацијата со која е соочен Уставниот суд во последните шест месеци бидејќи функционира со пет судии од вкупно девет, колку што се предвидени во Уставот. Поради недостаток на судии повеќе од 30 предмети не може да добијат мнозинство и се одолговлекуваат за понатаму, а штетата ја трпат граѓаните, посочи Кацарска.
„ Судот не може во целост да ја оствари улогата на заштитник на граѓанските слободи и права и да одлучува за согласноста на законите со Уставот како и на другите прописи и на колективните договори со Уставот и законите. Поради наведените причини, оваа состојба не е проблем само за функционирањето на Уставниот суд, туку и на државата и токму затоа денеска на работен состанок ги повикав тројцата претставници на најважните институции кои ја водат државата. Ги информирав за сериозноста и отежнатото функционирање на Уставниот суд и согласно нивните надлежности и тежината на нивните функции очекувам државата да се вложи во побрзо надминување на оваа состојба”, рече Кацарска.
Претседателката на Уставниот суд алармираше дека во декември оваа година завршува мандатот на уште еден судија и ако до тогаш не се комплетира Судот, државата ќе влезе во уставна криза.
„ Уставниот суд функционира на граница на кворум и многу луѓе се засегнати од предметите кои заостануваат, како на пример Законот за социјална заштита, Законот за јавно обвинителство, одлуки со кои се оспоруваат Детални урбанистички планови, барања за слободи и права на граѓаните”, истакна Кацарска.
Претседателката на Уставниот суд посочи дека освен предметите кои не добиваат мнозинство, проблемот со недостатокот на судиите се рефлектира и врз можноста да се спроведат големи реформи во Уставниот суд, како што е донесувањето на нов Акт, бидејќи Судот се уште работи според Деловник кој е донесен во 1992 година.
По споделувањето на информациите од страна на претседателката на Судот Добрила Кацарска, тројцата претседатели констатираа дека моменталната ситуација е загрижувачка и дека во интерес на државата и на сите граѓани е Уставниот суд да работи во комплетен состав и согласно нивните надлежности најавија поддршка за надминување на овој проблем.
Во рамки на овој работен состанок претседателката на Судот Добрила Кацарска го отвори и прашањето за воведување на уставна тужба во услови на комплетиран состав на Уставниот суд, побара поддршка и нагласи дека со овој уставен инструмент ќе се отвори можноста за граѓаните побрзо да дојдат до правдата во Република Северна Македонија, наместо со години да чекаат одлуки од Европскиот суд за човекови права, да не се изложуваат на големи трошоци пред судот во Стразбур и да им се овозможи овде во својата држава да ги користат сите правни лекови.
Една од темите на состанокот беше и административно-финансиска независност како и условите за работа во Судот со кои беа запознаени Пендаровски, Џафери и Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски со порака до опозицијата по критиките за Извештајот на ЕП: Срам да ви е, да не беше вашата криминална и попустлива политика, немаше да биде ова денес

Премиерот Христијан Мицкоски, се обрати од денешната трибина во Куманово ,,Од енергетска стабилност до силна економија“, и се осврна на темата за Извештајот на Европскиот парламент и зборуваше за реакциите на опозицијата на оваа тема. Тој истакна дека нивните грешки, кога беа на власт, и коруптивни политики доведоа до оваа ситуација да Македонија се соочува сега со национални компромиси. Мицкоски на крај заклучи дека нивните политики се предавство на македонскиот народ и на Македонија.
,,И ние како народ и земја ја имаме таа судбина да ги имаме тие неправди, но барем јасно е сега на сите и во Европа и во целиот свет, дека во суштина, не биле проблем Бугари во Устав, туку нешто многу подлабоко, нешто многу поголемо. А тоа е, македонскиот идентитет и македонскиот јазик. Но, имам само една порака со СДСМ и од опозицијата, кои не чекаа дури и да заврши гласањето во Европскиот парламент. А тоа е, засрамете се. Треба да ви е срам. Тоа што им го правите на македонскиот народ, на македонските граѓани и на Македонија како држава“, рече Мицкоски.
Мицкоски нагласи дека СДС и ДУИ не ја зборуваа вистината пред македонските граѓани, и дека тоа го претставуваа само како една мала интервенција која треба да се направи во Уставот.
,,Да не беше прифаќањето на оној последен предлог, со којшто лажевте и не ја говоревте вистината пред македонските граѓаните и македонскиот народ, дека е обезбеден и македонскиот идентитет и македонскиот јазик, дека се обезбедени стратешките приоритети, дека само треба една мала интервенција да направиме во Уставот и тука завршува се, наеднаш млеко ќе почне да тече по улиците и мед“, кажа Мицкоски и додаде:
,,Тоа беше најголемата лага којашто за догледно време ги затвори вратите во Европа, за македонскиот народ и за македонски граѓани. Тоа е суштината која што тие ја направија. Тоа е болката која што тие му ја нанесоа на македонскиот народ и на македонските граѓани. Тие нема да заборават и многу скоро од денеска, за неколку месеци, на избори ќе им кажат дека понекогаш државотворната СДСМ останува само една обична маргинална политичка партија која што набргу заминува во историјата“.
Мицкоски истакна дека тоа што СДС лажеа, за европско здравство и преку кампањски песни за Европа, и потсети на нивните измами со референдумското прашање за ЕУ ќе влезат само во онаа срамна историја.
,,Но, на онаа срамната историја на македонскиот народ. Ги памети народот вашите кампањи, вашите кампањски песни за Европа, вашите билборди за бесплатно здравство дека ќе имаме во Европа, измамите со референдумското прашање за ЕУ, ако се изгласа референдумот ќе влеземе во ЕУ, а не само во НАТО“, истакна Мицкоски.
Мицкоски додаде и дека народот добро се сеќава на нивните фотографии од авионот, за кои тие се обидуваа да создадат лажна слика во јавноста дека ги почнуваат преговорите, за што во моментов се видливи последиците.
,,Помни народот и за фотографиите од авиончето со пораки дека сме ги почнале преговорите. Памети народот како го лажевте и вие од СДСМ и ДУИ и Стево Пендаровски, кога излегоа и го прифатија последниот предлог во кој сега нашата Македонија има опција. Или народот да се откаже од својот идентитет под уцени од Бугарија, или нема придвижување кон ЕУ. Таа е таа реална и болна вистина која што за жал ние ја живееме“, рече Мицкоски и додаде:
,,Се навлековте заедно со ДУИ, седнавте во скут затоа што бевте корумпирани и ве држеа со уцени и низ заеднички зделки во сите сектори во државата, се продадовте. Затоа ќе ја повторам мојата порака: Срам сте за Македонија и за македонските граѓани“.
Македонија
Мицкоски: Склучивме Меморандум со Казанџи груп за градба на гасни централи во вредност од една милијарда евра, ова е единствено трајно решение за загадениот воздух

Од тука, од Куманово сакам да соопштам една добра вест за целата држава. Вчера на седница на Влада се официјализираше меморандум за соработка со компанијата Казанџи груп која што е светски гигант во енергетиката и е заинтересирана за инвестиции од 1 милијарда, соопшти претседателот Христијан Мицкоски, претседател на ВМРО-ДПМНЕ и премиер на вечерашната трибина во Куманово на тема „Од енергетска стабилност до силна економија!“.
Мицкоски информираше дека на ова му претходеле бројни средби со „Казанџи Холдинг“, која со своите енергетски компании што работат под брендот АКСА. Станува збор за повеќе од 25 години искуство.
„АКСА Енерџи е водечка турска компанија во енергетскиот сектор и клучен глобален инвеститор во одржлива енергија. Компанијата располага со инсталиран капацитет од над 3.500MW во 8 земји. Работат во 22 земји на четири континенти. Со нив имаме план за изградба на секундарна гасоводна мрежа, топловодна мрежа и когенеративните централи со 500MW инсталиран капацитет кои произведуваат 4,1TWh електрична енергија и 720 GWh топлинска енергија на годишно ниво. Сето ова е зафат димензиониран на инвестиција од над една милијарда евра“, објасни Мицкоски.
Според Мицкоски градењето на когенеративни гасни централи е единственото трајно решение за загадениот воздух.
„Сè друго би значело ставање на проблемот под тепих. Со ова покажуваме дека мислиме и работиме за иднината на нашата држава“, посочи Мицкоски.
Мицкоски се осврна и на фактите како дека покрај ова „веќе донесовме инвестиција за ветерниот парк од 450 милиони евра што наскоро ќе се гради меѓу трите општини, Карбинци, Штип и Радовиш“.
„Нема специјални закони, нема загарантиран откуп по загарантирана цена за 20 – 30 години, туку инвеститор кој ќе инвестира 450 милиони евра, а државата ќе добие за 100 милиони евра поголем приход во БДП што треба да донесе 20 отсто од вкупното производство на струја што ќе ја направи енергетски балансирана земјава“, заклучи Мицкоски.
Македонија
(Фотогалерија) Армијата вклучена во гаснењето на пожарите

Армијата согласно одлуката на претседателката Гордана Сиљановска-Давкова за учество на дел од припадниците на Армијата во гаснењето на пожарите и одлуката за постоење на кризна состојба донесена од Владата заради зголемена појава на пожари, како и побарувањата на Центарот за управување со кризи активно се вклучи во гаснење на пожарите на целата територија на нашата држава.
Во согласност со побарувањата, ангажирани се над 150 припадници на Армијата во следните општини: Ѓорче Петров – ангажирани над 60 лица; Крива Паланка – ангажирани околу 30 лица, Село Николиќ, Дојран – ангажирани над 50 лица. Дополнително во реонот на Визбегово, Општина Шуто Оризари, ангажиран е еден тим од Четата за атомско биолошка и хемиска одбрана за собирање на податоци за утврдување на квалитетот на воздухот од запалениот отпад во овој реон.
Армијата останува подготвена за натамошна поддршка и интервенција каде што е потребно, во координација со надлежните институции.