Македонија
Кисела Вода субвенционира материјали за реконструкција на фасади на станбени згради, поправка на лифтови, пелети и печки на пелети
Четири јавни повици за субвенции објави денес Општина Кисела Вода, кои на жителите од овој дел на градот ќе им обезбедат финансиска поддршка за набавка на печки за пелети, за пелети како енергент, за кофинансирање при набавка на термоизолациски материјали за реконструкција на фасади на станбени згради, како и за поправка и санација на постојни лифтови во станбени згради на подрачјето на општината.
Во согласност со програмата за локален економски развој на Општина Кисела Вода за 2023 година, вкупниот износ за четирите субвенции што ги обезбеди локалната самоуправа изнесува 3.600.000,00 денари. Од нив, 2 милиона се предвидени за кофинансирање при набавка на материјали за реконструкција на фасади, 600.000,00 денари за поправка на лифтови, а по 500.000,00 денари се наменети за пелети и за печки на пелети. Распределбата на средствата за сите повици ќе се врши по принципот на прв дојден, прв услужен.
За субвенцијата за набавка на термоизолациски материјали за реконструкција на фасади на станбени згради за колективно домување на територијата на општина Кисела Вода, може да аплицираат заедниците на сопственици или управители на станбени згради за колективното домување, чии станбени згради се изградени пред 2010 година. За ова ќе треба да се достави доказ заедно со нотарски заверена изјава дека набавените материјали наведени во испратницата и предметот на количини во целост ќе бидат наменети и вградени во соодветната станбена зграда за која се однесува барањето во рок од 1 година од датумот на решението за субвенционирање и финансиска поддршка донесено од страна на градоначалникот на општина Кисела Вода и дека ќе биде потпишан договор.
Јавниот повик ќе трае 60 дена од датумот на објавувањето, а локалната самоуправа финансиски учествува со парични средства во висина од 60 % од вредноста.
Сите критериуми и услови за учество се достапни на следниот линк објавен на веб-страницата на Општина Кисела Вода
https://www.kiselavoda.gov.mk/content-data/Broshuri/fasadi1.PDF
Во поглед на финансиска поддршка за поправка и санација на постојни лифтови во станбени згради, Општина Кисела Вода ќе учествува со средства во износ од 30 % од вредноста, но не повеќе од 200.000,00 денари. Право на учество имаат сите влезови поединечно, кои имаат регистрирано заедница на сопственици на станови или имаат избрано управител на станбените згради и кои во потребната документација ќе достават и одлука за поправка и санација на постојниот/те лифт/ови потпишана од мнозинството сопственици на посебни делови на станбената зграда, понуда од економски оператор со детален опис по позиции, како и одлука или изјава со која се потврдува дека ќе се обезбедат 70 % од потребните средства за поправка и санација на лифт/ови на нивната станбена зграда. Јавниот повик ќе трае до исцрпување на предвидените средства за оваа намена, најдоцна до 31.10.2023 година, а сите критериуми и услови се достапни на
https://www.kiselavoda.gov.mk/content-data/Broshuri/liftovi1.PDF
И оваа година Кисела Вода ќе субвенционира набавка на печки за пелети во износ од 50 % од вредноста, но не повеќе од 20.000,00 денари со вклучен персонален данок на доход. За аплицирање ќе биде потребна изјава заверена на нотар дека се работи за индивидуален станбен објект, кој не е поврзан на градско парно и за кој нема искористени субвенции за набавка на печка на пелети или инвертор од кој било извор во државата, како и доказ дека е извршено купувањето печка на пелети, од 1.1.2023 година до завршување на јавниот оглас во согласност со правилникот, со приложување фискална сметка или фактура и извод од деловна банка за извршена уплата во оргинална форма.
Како новитет, оваа година Општина Кисела Вода субвенционира и набавка на пелети како енергент во износ од 50 % од вредноста, но не повеќе од 10.000,00 денари со вклучен персонален данок на доход. За добивање ваква субвенција потребна е изјава заверена на нотар дека се работи за индивидуален станбен објект кој не е поврзан на градско парно и за кој нема искористени субвенции за набавка на пелети од Општина Кисела Вода по основ на овој повик и поседува печка на пелети за односниот објект, како и доказ дека е извршено купувањето на пелетите, од 1.1.2023 година до завршување на јавниот повик, со приложување фискална сметка или фактура и извод од деловна банка за извршена уплата во оригинална форма.
За двата повика, за субвенција на печки на пелети и за пелети, критериумите за учество се наведени на следните два линка достапни на веб-страницата на Општина Кисела Вода:
https://www.kiselavoda.gov.mk/content-data/Broshuri/pecki1.PDF
https://www.kiselavoda.gov.mk/content-data/Broshuri/peleti1.PDF
Барањето со потребната документација се доставува во архивата на Општина Кисела Вода.
Подетаљни информации за субвенциите за материјали за фасади и за набавка на пелети заинтересираните може да добијат на следната имејл-адреса: [email protected], а за субвенциите за печки на пелети и за поправка на лифтовите на следната имејл-адреса: [email protected].
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Лефков: Георгиев и Мемети, се дел од правосуден октопод, кои наместо да гонат криминал, се занимавале со криминал
Апсењето на врховниот судија Наке Георгиев за земање на мито од 10 илјади евра е само уште една потврда дека Македонија со власта на СДС и ДУИ ниту била правна држава, а уште помалку европска.
Судијата кој целата своја судиска кариера и унапредување ја добива во време на владеењето на СДС, вчера беше фатен на дело како земал поткуп во замена за олеснителни околности во постапката која се води против екс градоначалникот на Ново Село, Боро Стојчев, истакна на прес-конференција Миле Лефков, член на ИК на ВМРО-ДПМНЕ.
Георгиев, како што појасни Лефков, станал судија во 1997, па бил избран за судија во Апелациониот суд во 2004, па врховен судија во 2020 година, а потоа беше контроверзно избран и за член на Судскиот совет, па потоа уште поконтроверзно се повлече, за да може неговиот син да биде избран за судија во Кривичен суд.
„Неговото апсење го покажа целиот сјај на бедата во која СДС и ДУИ го доведоа правосудството во Македонија.
Наместо правдата, владееле криминалот и корупцијата, а ликови како Георгиев, наместо да се борат против престапниците, самите го прекршувале законот за имотна корист“, додаде тој.
„Но тоа не е се. Да биде срамната слика за македонското правосудство целосна, постои основан сомнеж дека и јавен обвинител бил дел од оваа афера.
Имено извршен е претрес и во домот на членот на Советот на обвинители Иџет Мемети, и претрес во службените простории на Советот на јавни обвинители, по основано сомнение дека тој заедно со Наке Георгиев ја злоупотребил својата позиција и барал мито за истиот случај како и врховниот судија, во замена за олеснителни околности во судската постапка.
И Мемети, како и Георгиев, тесно се поврзуваат за претходната власт, односно важи за исклучително близок за ДУИ. Својата кариера ја почнува кога оваа партија доаѓа на власт и извршува високи функции од правобранител, министер за правда, уставен судија, па до член на Советот на јавни обвинители.
Ова е судски октопод. Во судскиот систем владее организирана банда која тргува со правдата и која наместо по словото на законот работи по словото на парите“, потенцира Лефков.
Повика, надлежните институции да го истражат целиот овој случај и многу други, бидејќи, како што рече, оценуваат дека корупцијата во судството не завршува само со Георгиев и Мемети, туку пипците се многу поголеми и подлабоки, од основни, апелациони судови и обвинителства, па се до високи политички позиции на власта на СДС и ДУи во заминување.
„Без правна држава, нема Европска Унија. Без владеење на правото нема ниту напредок, ниту подобар живот во Македонија.
Со корупцијата мора да има силна и одлучна борба и никој не смее да биде заштитен или амнестиран.
Доаѓа времето на одговорност“, дециден е Лефков.
Македонија
Тошковски во посета на Секторот за компјутерски криминал и Одделот за прекршоци: во фокусот задржување на постојниот и привлекување нов кадар
Министерот за внатрешни работи, Панче Тошковски, денес, оствари работни посети во Секторот за компјутерски криминал и Одделот за прекршоци, каде што одржа работни состаноци со раководствата на овие организациски единици на Министерството.
Секторот за компјутерски криминал има специфичен делокруг на работа и постапува по неколку кривични дела, како што се загрозување на сигурноста по пат на информатички систем, злоупотреба на лични податоци, прикажување порнографски материјал на малолетник, производство и дистрибуција на детска порнографија, намамување за обљуба или друго полово дејство на малолетник кој не наполнил 14 години и други.
„Имајќи ги предвид квалификациите што се потребни за кадарот што работи во овој сектор и конкуренцијата на пазарот на труд, потребно е најбргу што може да се преземат соодветни мерки, со цел задржување на постојниот и привлекување нов кадар во овој дел.
Во однос на Одделот за прекршоци, исто така има недостиг на соодветен кадар, кој треба да исполнува посебни услови во согласност со Законот за прекршоците за ефикасно извршување на големиот обем на работа што го имаат. Во иднина треба да се размислува за олеснување на процедурите во делот на прекрошочната постапка, дигитализација и користење на бенефитите што ги нудат современите софтверски решенија“, истакна Тошковски.
Сервисни информации
Поради протест, во прекин сообраќајот на патот Битола – Новаци
Сообраќајот на регоналниот пат Битола – Новаци е во прекин во двата правци поради протест, информираат од АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.