На состанок со клиниките во склоп на Клиничкиот центар во Скопје ќе се донесе одлука како тие ќе функционираат во иднина, со цел да продолжат со работа и да се врати нивното нормално функционирање, извести министерот за здравство, Венко Филипче.

Според него, нема потреба од дополнителни капацитети на Инфективната клиника, па така, мобилната армиска болница ќе биде тријажен центар, односно ургентен интернистички центар кој досега функционирал на Клиниката за токсикологија. Таму ќе се проверува дали пациентите се позитивни на Ковид-19.

„Утре ќе имаме состанок со директорите на клиниките во Клиничкиот центар, за нивно постепено враќање во нормала, со изменет терк за закажување преку ‘Мој термин’, со изменето времетраење на прегледите, но и метежот во амбулантите. Задолжително воведување на е-амбуланта таму каде што може, како и соодветно закажување на снимањата со цел да се избегне метежот како во рендген-институтот така и во болниците каде што има дијагностички апарати“, рече министерот Филипче.

Во изминатиот период траеше реконструкција на улиците низ Клиничкиот центар, а тоа е во завршна фаза, при што се очекува да се намали метежот при движењето со автомобили.

„До крајот на неделата Градот Скопје очекува да се заврши со асфалтирањето на улиците, се отвора нова улица помеѓу Хируршката клиника и Клиниката за стоматологија, со што очекуваме да се растовари метежот. Се отвораат два нови влеза, по повеќе од 50 години, и уште еден влез и излез кај Инфективната клиника, каде што е поставена и мобилната болница за која во периодот што следи ќе стигне и дополнителната опрема“, додаде министерот Филипче.