Македонија
Ковачевски – Бојл: Македонија останува стабилен стратешки партнер и докажан сојузник на САД

Претседателот на Владата на Република Северна Македонија, Димитар Ковачевски, за време на работната посета на Вашингтон оствари средба со конгресменот Брендан Бојл од Пенсилванија.
На средбата Ковачевски и Бојл заклучија дека Северна Македонија изминатите години донесе повеќе мудри и храбри одлуки, кои овозможија одржување на долготрајната стабилност, европската и евро-атлантската интеграција и преку кои се покажа дека земјата може да функционира како вистинска мултиетничка демократија.
На средбата премиерот го поздрави силниот фокус на САД кон регионот на Западен Балкан, при што Ковачевски изрази уверување дека со заемни напори може да се создаде пријатна средина за инвестирање и креирање работни места во регионот, особено за младите луѓе, а во меѓувреме да се нудат можности за инклузивен, транспарентен економски раст, повисоки нивоа на трговија и директни инвестиции. Премиерот се заблагодари на конгресменот Бојл за неговата поддршка на земјата во носењето на најважните одлуки во изминатиот период и гласната поддршка во Претставничкиот дом за нашата евро-атлантска интеграција.
Конгресменот Бојл ја нагласи целосната поддршка за следните чекори на Северна Македонија во евроинтегративниот процес, како и за заложбите за севкупен развој на регионот. Како долгогодишен пријател на Северна Македонија, Бојл посочи дека навистина се гордее на влијанието што го има македонската заедница во САД.
Премиерот Ковачевски на средбата истакна дека Северна Македонија останува стабилен, стратешки партнер и докажан сојузник на САД, билатерално и во НАТО, фокусирана на заедничката посветеност кон безбедност, слобода и демократски просперитет, како и на заедничките активности во борбата против тероризам и други закани за светскиот мир и стабилноста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Семејствата на жртвите oд модуларната болница повикаа да се обнови истрагата, а германското вештачење да биде клучен доказ

Семејствата на жртвите од пожарот во Модуларната болница во Тетово побараа Обвинителството да ја обнови истрагата.
На прес-конференција пред Основниот суд во Тетово, истакнаа дека има докази кои биле отфрлени од Обвинителството, а се однесуваат за пропусти при изградбата на модуларната болница.
Агрон Арифи, претставник на Иницијативата рече дека и германското вештачење е во таа насока и треба да биде земено како клучен доказ во истрагата.
Бараат формирање на независен тим кој ќе ги испита сите аспекти, меѓу кои и евентуалното одолговлекување на постапката.
Во страотниот пожар кој ја пеплоса модуларната болница во Тетово на 8 септември 2021 година, загинаа 14 лица од кои 12 пациенти кои се лекуваа од коронавирус, и 2 членови на семејства кои биле внатре во критичниот момент. Четиринаесет лица беа спасени пред објектот целосно да изгоре.
Македонија
Левицата предлага надзорна расправа за катастрофата во Кочани

Пратеникот од Левица, Борислав Крмов, соопшти дека како пратеник од Изборната единица 3, иницирал Надзорна расправа во врска со трагедијата во Кочани со цел, како што рече, да се расветлат сите пропусти.
„Во овие моменти кога сѐ уште не е поминат шокот од незамисливата национална катастрофа која се случи во Кочани, ние како пратеници и како Собрание, посебно пратениците од ИЕ 3, мора да поднесеме и морална одговорност. Поради тоа, денес, јас, како пратеник од ИЕ 3, покренувам иницијатива за Надзорна расправа во Собранието околу катастрофата што ни се случи во Кочани“, кажа пратеникот од Левица.
Додаде дека расправата е планирана во постојаната Анкетна комисија за слободите и правата на граѓанинот со која раководи Димитар Апасиев. Но, рече тој, отворени сме да биде и на било која друга комисија која и одговара на власта и на остатокот од опозицијата.
„За таа цел се потребни се минимум 15 потписи и ние ги даваме нашите шест. Отвараме простор да има и Анкетна комисија, има постојана Анкетна комисија во која може да се одржи расправата, но има и времена Анкетна комисија. Во тој случај ќе се повикаме на член 76 став 3 од Уставот, за која се потребни дваесет потписи и апсолутно, на нас не ни е битно ние да го водиме процесот, поентата е да се почне сега и веднаш за да се дојде до одговорите кои ни се потребни“. објасни Крмов.
За жал, додаде тој, гледаме дека ВМРО-ДПМНЕ и СДСМ се препукуваат во медиумите, околу надзорна или анкетна, дали треба да има, или не, дали и за другите катастрофи, дали за Кочани итн.
„Ние мислиме дека нема време за ова, доволно време одмаравме, треба да се делува што побргу. Мора да се види каде потфрлија органите на државната управа, зошто ни се случи ова што ни се случи и кои индивидуи се одговорни“, потенцираше пратеникот Борислав Крмов.
Македонија
Талески до Тошковски: Кој му ги доставил доверливите информации на обезбедувачот на премиерот?

Пратеникот на СДСМ, Миле Талески, на денешната собраниска седница посветена на пратенички прашања упати прашање до министерот за внатрешни работи, Панче Тошковски, кој му ги доставил доверливите информации на Самараков, член на обезбедувањето на премиерот, Христијан Мицкоски.
„Ангел Самараков, припадник на најтесното обезбедување на премиерот Мицкоски, беше фатен како одава доверливи информации. Со докази, со видео, со фотографии. Фатен жив. Како е можно лице со такво однесување и поврзаност да биде дел од обезбедувањето на премиерот е прашање што лебди во јавноста оти Самараков не е случајна фигура во безбедносниот тим на премиерот. Тој е долгогодишен партиски кадар на ВМРО-ДПМНЕ, неговата сопруга беше кандидат за советник од истата партија. А не е ниту изолиран случај. Ова е втор скандал за кратко време. Пред само неколку месеци јавноста дозна дека шефот на обезбедувањето на премиерот физички нападнал полицаец кој бил на должност за време на акција против трговија со дрога“, рече Талески.
Овие инциденти, додаде тој, отвораат сериозни прашања за безбедносниот апарат, но и за можната поврзаност на луѓе од власта со криминални структури.
„На неговото ниво, во структурата на МВР, тој немал пристап до таков вид информации, значи морало да има некој што има пристап за да му ги даде. Затоа Ви го поставувам следното прашање: Кој му ги доставил доверливите информации на лицето Ангел Самараков? Граѓаните имаат право да знаат дали безбедносниот систем воопшто функционира или служи на лични интереси поврзани со подземјето. Мора да има одговорност, транспарентност и итна постапка за расчистување на овие наводи. Затоа што ова е борба за каква држава ќе бидеме – правна и безбедна или заробена од мафијата“, рече Талески.