Македонија
Ковачевски: Верувам дека Алтернатива ќе влезе во Владата

Кандидатот за следен претседател на СДСМ, Димитар Ковачевски, кој го придружува актуелниот лидер Зоран Заев, се надева дека Алтернатива ќе биде дел од владиното мнозинство. Прашан дали се разговара партијата на Африм Гаши да го преземе министерското место во Министерството за здравство, Ковачевски не сакаше да коментира. Посочи дека е оптимист за зголемување мнозинството во Собрание.
„Јас важам за рационален оптимист. Верувам во решение што ќе се оствари. Верувам дека Алтернатива ќе стане дел од мнозинството кое ќе обезбеди стабилна Влада. Ние сме пандемија со нови типови на вирусот, има светска енергетска криза, има други предизвици. За тоа ни треба стабилна влада која ќе ги носи законите кои ни се потребни. Затоа велам дека верувам и се надевам дека Алтернатива ќе донесе позитивна одлука која зависи од партиските органи“, кажа Ковачевски.
За распределбата на ресори и информациите дека Алтернатива бара две вицепремиерски и две министерски места, Ковачевски рече дека се шпекулативни информации.
„Ние имавме една средба со претседателот на Алтернатива, Гаши и тимот. Имаше начелна согласност за програмските определби кои би биле влог на Алтернатива во Владата за стабилна Северна Македонија на патот кон ЕУ. Таму не се разговараше за конкретни решенија, ќе продолжат разговорите денес. Тоа што беше комуницирано, се шпекулации кои не се засноваат на факти“, рече Ковачевски, а прашан дали ако тој биде иден мандатар ќе се согласи Министерството за здравство да го раководи кадар на Алтернатива, рече: „Јас не можам да го коментирам ова. Мандатарот, односно премиерот на државата, по завршување на изборите за претседател, следува конгрес. Низ партиските тела се носи таа одлука, зависи од коалициските партнери, но и Парламентот. Кога тоа ќе се случи можеме да зборуваме за партиски решенија и ресори“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Бројот на вработени намален за 17.000 – погубни економски политики на ВМРО-ДПМНЕ

Фрапатни се податоците кои покажуваат дека по доаѓањето на ВМРО-ДПМНЕ на власт во 2024 година во земјава има над 17.000 помалку вработени, обвини СДСМ.
Според партијата, тоа е директен резултат на погубните економски политики, хаосот и несигурноста, како и напуштање на политиките кои ги востастави СДСМ за стабилна и одржлива економија.
„Со оваа неспособна Влада: пазарот на труд се стеснува, продуктивното население е разочарано и заминува, Фондот за пензиско осигурување е под притисок, бидејќи денес 1,63 вработени обезбедуваат една пензија, наместо 1,74 како што беше пред само една година. Владата нема стратегија, нема визија, нема мерки за задржување и отворање на нови работни места“, велат од СДСМ.
Од таму обвинија дека ова се последици од владеењето на Мицкоски и дека се зголемува несигурноста за младите, пензискиот систем се доведува во ризик, а приватниот сектор е оставен сам да се снаоѓа.
Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.
Македонија
Гром го предизвикал пожарот во велешката фабрика, велат од „Мирана“

Удар од гром е причината за пожарот што синоќа избувна во дел од производствениот погон на „Биокосмос“ во Велес, информираат од компанијата „Мирана“ преку официјално соопштение.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата.
Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица.
Центарот за управување со кризи претходно денес информира дека пожарот бил целосно локализиран рано утрово, околу 4 часот. Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.