Македонија
Ковачевски го одби Мицкоски за лидерска: Дебата за уставни измени не се води ниту кога се пушта канализација

Премиерот Димитар Ковачевски го одби предлогот на лидерот на опозициската ВМРО-ДПМНЕ, Христијан Мицкоски, кој понуди да се сретнат на лидерска средба или ТВ-дуел. Според Ковачевски, лидерска средба не треба да има оти ставовите се познати. За ТВ-дебата – изречно одби. Додаде дека дебата за уставни измени не се води во медиуми.
„Ние лидерска средба имавме во декември на моја иницијатива. Беа повикани сите претседатели на парламентарните политички партии, зборувавме за најважните стратешки прашања во државата. Второто главно прашање беше усогласувањето на уставните измени. На таа лидерска средба сите лидери на политички партии се сложија за носењето на уставните измени, освен еден, кој молчеше, и двајца, кои не дојдоа. Затоа сметам дека нема потреба од лидерска средба, ставовите се познати“, рече Ковачевски.
Тој додаде дека тоа не е институционален формат за носење решенија, туку формат каде што се слушаат политички ставови.
„Во однос на тоа да се води дебата за уставните измени – таа дебата е структурирана, повторувам уште еднаш. За уставни измени, дебата не се води на телевизија, не се води кога се пуштаат канализациски цевки во одредени општини, туку експертска работна група работи на тоа. Врз основа на уставно право и она што е пропишано – се дефинираат амандмани за јавна расправа. Потоа процесот се сели на јавна расправа во општеството и влегува во собраниска процедура, каде што јас верувам дека имаме демократски, визионерски и стратешки капацитет како држава да ги спроведеме одлуките и да ги отвориме кластерите“, додаде Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршен првиот дел од санацијата на хидросистемот Ѓавато, кој повеќе од 4 години беше со пробиени цевки

Заврши првата фаза на санирање на хидросистемот Ѓавато. Бунарскиот дел е комплетно завршен, пуштена е водата и нема никаде протекување, објави премиерот, Христијан Мицкоски.
Тој додаде дека останува уште една интервенција на цевката за испуст и со тоа ќе бидат дуплирани количините вода кои ќе се влеваат во Дојранското езеро.
„Каква беше состојбата пред интервенцијата? Повеќе од четири години пробиени цевки на двата функционални бунари. Потрошени повеќе од половина милион евра за електрична енерија, а ефектот минимален или никаков. Два функционални од десет направени бунари. Негрижа и срам. Во втората фаза ќе обезбедиме најмалку уште две бунарски пумпи за зголемен капацитет и побрзо полнење на Дојранското езеро. Владата во втората фаза ќе го задолжи ФОД при ЕСМ (поранешно ЕЛЕМ) да ги репарира постојните потисни пумпи. Конечно во последната трета фаза ќе инсталираме сончеви панели со батерии за акумулирање на електричната енергија и сопствено производство на електрична енергија. Нема трошење милиони евра од буџетот за електрична енергија“, напиша Мицкоски.
Македонија
СДСМ ги објави имињата на уште 11 кандидати за градоначалници

Попладнево се одржа седница на Извршниот одбор на СДСМ. Членовите донесоа одлука со која е дадена согласност за кандидатури за градоначалници во уште 11 општини низ државата:
1. Бутел – Оливера Ливриниќ
2. Велес – Маја Хеско
3. Гевгелија – Миле Атанасов
4. Делчево – Дејан Глинџарски
5. Демир Капија – Лазар Петров
6. Конче – Благој Илиев
7. Кратово – Влатко Спировски
8. Кривогаштани – Игор Каравиловски
9. Македонски брод – Ивица Стојковски
10. Ранковце – Даниел Крстевски
11. Старо Нагоричане – Далибор Трајковски
„СДСМ јасно ја потврдува својата подготвеност да понуди силни, чесни, квалитетни и докажани кандидати за претстојните локални избори кои ќе работат во интерес на граѓаните и напредок на општините’“, соопштија од партијата.
Македонија
Гужва на границите: на Богородица и Табановце се чека по 40 минути

Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, информира АМСМ.
На ГП Богородица времето на чекање за влез е околу 40 минути, на ГП Дојран времето на чекање за влез е околу 20 минути, на ГП Табановце времето на чекање за излез е околу 30 минути, додека пак на останатите граничните премини од македонска страна нема подолги задржувања за влез и излез од државата.
Од денеска од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.