Македонија
Ковачевски: Добрососедството и забрзаната евроинтеграција се приоритет и за двете земји
Претседателот на Владата, Димитар Ковачевски, денес во Белград на прес-конференција ја истакна заложбата и силната политичка волја на нашата Влада за зајакнување и продлабочување на добрососедските и пријателски односи со Република Србија, во политички, економски и во сите други аспекти на соработка.
Премиерот во Белград ја предводи владината делегација во која се министрите за внатрешни работи Оливер Спасовски, за економија Крешник Бектеши, за земјоделство, шумарство и водостопанство Љупчо Николовски, за транспорт и врски Благој Бочварски како и заменик министерот за информатичко општество и јавна администрација Александар Бајдевски.
„Нашите две влади се силно ориентирани да го подигнат економскиот и социјалниот стандард на граѓаните, а на бизнис заедниците да им овозможат квалитетно и ефикасно да работат и своите бизнис планови да ги реализираат во разумен рок.
Одличната соработка помеѓу двете држави носи квалитетни решенија во различни кризи, што за нас е голем стимул уште посилно да се вложуваме за стабилен и просперитетен Западен Балкан. Северна Македонија покажа дека не отстапува од стремежите да ги оствари своите стратешки цели како во одржување на добрососедските односи, така и во посветеноста за членство на земјата во Европската Унија.
Како држава не само што ги споделуваме принципите на надворешната политика на Унијата, туку имаме постигнато висок степен на усогласување со позициите на ЕУ, што е потврда дека ја споделуваме и вредносната политика на Европската Унија“, истакна премиерот Ковачевски на прес-конференцијата во Белград.
Ковачевски потенцираше дека фокусот на Владите мора да остане Европската Унија, бидејќи земјите од Западен Балкан таму припаѓаат.
„Европската ориентација на двете влaди е нагласена, ние сме цврсто определени за заштита на интересите на нашите држави, реформски сме ориентирани, активно ангажирани во меѓународните односи, постојано подготвени да даваме придонес во меѓународната соработка во сите области.
Токму затоа изминативе години целосно сме посветени на обезбедување на четирите европски слободи на регионот на Западен Балкан – активно учествуваме во повеќе сериозни и суштински регионални иницијативи како Берлинскиот процес, CEFTA, RYCO, RCC и други, со кои преземаме различни иницијативи за слободно движење на луѓе, производи, услуги и добра низ земјите од регионов. Токму затоа сме и иницијатори и активни чинители во иницијативата на Отворен Балкан која нашите граѓани отворено ја поздравија, а тоа за нас е огромна мотивација“, изјави премиерот.
Во рамки на официјалната посета беа потпишани неколку билатерални документи. Како што истакна Ковачевски, граѓаните и бизнис заедниците веќе ја чувствуваат користа од она што го понудија владите преку сите овие иницијативи.
Падна роамингот меѓу земјите од Западен Балкан, а од пред неколку месеци транспортните камиони на граничните премини Ќафасан и Табановце се движат со минимално време на чекање, како резултат на воспоставените зелени „Опен Балкан ленти“.
„Поврзувањето на земјите е за поголем развој на нашите економии, да обезбедиме заеднички регионален и единствен пазар без ограничувања, без бариери, без граници, а со таквиот долгорочен развој овозможуваме подобар живот за сите граѓани. Посебно ме радува што предмалку беа потпишани неколку билатерални документи од страна на двете влади, кои што произлегуваат од потпишаните договори за Отворен Балкан.
Првиот Меморандум за соработка е потпишан меѓу двете министерствата за внатрешни работи и се однесува на олеснување и забрзување на протокот на луѓе, возила и стоки на граничниот премин Табановце-Прешево; Вториот се донесува на вмрежување на системите за електронска наплата на патарините; Третиот се однесува на соработката во рударството и енергетиката, што значи размена на искуства и активности за развој на соработка и деловни односи во областа на рударството и енергијата“, изјави Ковачевски.
Премиерот истакна дека преку овие иницијативи, преку ваквите соработки, покажуваме дека сме просперитетен регион и дека фокусот на земјите од Западен Балкан е кон забрзување на европската интеграција и кон придонесување секоја од земјите што поскоро да стане членка на Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
42,32 отсто од граѓаните гласале на претседателските избори до 17 часот, соопшти ДИК
До 17 часот до ДИК биле пристигнати податоци за излезност на гласачите за претседателските избори од 2.040 избирачки места, од вкупно запишани 1.069. 029 гласачи.
На овие избирачки места гласале 452.412 гласачи односно 42,32 отсто.
Најголемата излезност за претседателските избори според ДИК, има во Новаци со 66,47 проценти, а најмала излезност има во Липково со 6,48 проценти.
Споредено со вториот круг на претседателските избори во 2019 година, има зголемување на излезноста од 7,19 проценти, рече претседателот на ДИК, Александар Даштевски.
Споредено со првиот круг на претседателските избори 2024 година има зголемување од 0,01 процент, додаде тој.
До 17 часот, појасни Даштевски, пристигнати се податоци за излезност на гласачите за парламентарните избори од 1920 избирачки места. Од вкупно запишани 1.003. 459 гласачи на овие избирачки места гласале 470. 950 односно 46.93 проценти.
Најголемата излезност за парламентарните избори има во Кривогаштани 79.73%, најмала има во Маврово-Ростуше со 22.93 проценти.
Излоезноста по изборни единици за парламентарните избори е следна: ИЕ 1-53.22%; ИЕ 2-41.83%; ИЕ 3-51.49; ИЕ 4-48.49; ИЕ 5-47.45%; ИЕ 6- 34.71%.
До 17 часот до ДИК се доставени вкупно 450 приговори за заштита на лично избирачко право. Од нив 228 приговори се усвоени, кажа Даштевски.
22 приговори биле отфрлени како неуредни а 67 приговори биле одбиени.
Македонија
ДИК за одѕивот до 15 часот: за претседателски избори гласале 33.73 отсто а за парламентарни 37.44 отсто од гласачите
До 15 часот како што информра ДИК биле пристигнати податоци за излезеност на гласачите за Претседателските избори од 2271 избирачки места.
Од вкупно запишани 1.172.912 гласачи на овие избирачки места, гласале 395.576 односно 33.73 %. Најголема излезеност во моментов, за Претседателските избори има во Новаци, со 52.32 %. Најмалата излезеност за претседателските избори е во Липково, со 3.60 %.
„Споредбено со вториот куг од Претседателските избори во 2019 година имаме зголемување на излезеноста од 3.39% на овие избори. Додека споредбено со првиот круг од Претседателските избори 2024 имаме намалување од 0.84%.
До 15 часот пристигнати се податоци за излезеност на гласачите за Парламентарните избори од 2136 избирачки места. Од вкупно запишани 1.113.441 гласачи на овие избирачки места, гласале 416.915 односно 37.44%.
Најголема излезеност во моментов, за парламентарните избори има во Крива Паланка, со 58.18 %. Најмалата излезеност за парламентарните избори е во Центар Жупа, со 13.74 %“, информира комисијата.
Споредбено со Парламентарните избори во 2020 година, на овие избори има зголемување на излезеноста од 5.66 % .
Излезеноста по изборни единици за парламентарните избори е следна: Изборна единица 1- 42.31 %; Изборна единица 2-36.69 %; Изборна единица 3- 41.02 %; Изборна единица 4-36.88 %; Изборна единица 5- 35.95 % ; Изборна Единица 6-29.14 % .
До овој момент до ДИК биле доставени вкупно 405 приговори за заштита на личното избирачко право.
„Од нив 176 приговори се усвоени и на избирачите им е овозможено да го остварат своето право на глас, 18 приговори се отфрлени како неуредни, а 58 приговори се одбиени. Останатите приговори се во обработка. Овој изборен ден го набљудуваат 1303 домашни набљудувачи, 860 меѓународни набљудувачи и 83 странски новинари. Активен е и бесплатниот телефонски број 0800 555 44, на кој заинтересираните граѓани можат да постават прашање или да пријават неправилности до Државната изборна комисија. Исто така активна е и видео кол линијата на број 076 488 360 преку која граѓаните со оштетен слух и говор ќе можат во текот на изборниот ден преку видео повик да постават прашање до Државната изборна комисија и да добијат одговор на знаковен јазик“, појаснуваaт од ДИК.
Македонија
Гласачите задолжително да се прашуваат дали ќе гласаат за претседателски или за парламентарни избори, Избирачките одбори да ги почитуваат законските одредби, апелира ДИК
Избирачките одбори да ги почитуваат законските одредби и задолжително да ги прашуваат гласачите дали ќе гласаат за претседателски или за парламентарни избори и тоа да го прават кон секој избирач, потенцираа од Државната изборна комисија.
Според комисијата на секој гласач тие треба да му ја објаснат процедурата на гласање.
Гласачот, како што прецизираа од ДИК, може да се појави на гласачкото место само еднаш и да го оствари своето право на глас.
„Не сакаме да ги исплашиме претседателите на изборните органи, но, доколку не се почитува правото на глас врз основа на Кривичниот законик, секој член на изборен орган кој го попречува гласањето или намерно го попречува гласањето на некој друг член ќе се казни со најмалку три години затвор“, рече Дитмире Шеху, потпретседателка на ДИК појаснувајќи дека од терен добиле информации дека дел од избирачките одбори не постапувале согласно нивните надлежности кои произлегуваат од Изборниот законик и подзаконските акти на Комисијата.
Потсети дека комисијата на вчерашна седница на јасен начин покажала кој е начинот на гласање и го презентирала упатството за начинот на гласање и за Парламентарни и за Претседателски избори.
„Од самото упатство, кое исто така, се наоѓа и во самите избирачки места се гледа начинот на кој гласачот треба да гласа, а исто така во тоа упатство е наведено и како гласачот и избирачкиот одбор треба да се однесува“, дополни Шеху.
Откако гласачот ќе се изјасни дали ќе гласа за едни или други избори, или пак и за Претседателските и за Парламентарните избори, тој оди на идентификација со биометрискиот уред, па го зема гласачкото ливче и се потпишува во избирачкиот список. Потоа го зема гласачкото ливче и нормално гласа сам зад параван, појасни.
„Затоа ги замолуваме сите избирачки одбори детално да ги почитуваат законот и сите наши подзаконски акти и да постапуваат врз основа на сите наши напатствија и наши подзаконски акти и согласно закконот“, рече таа.
Ова, како што рече, се однесува на неколку општини, неколку избирачки одбори, кај кои било реагирано.