Македонија
Ковачевски: За „Иловица“ треба да одговори ДПМНЕ, концесиите се дадени од Груевски, одобрени од министри и градоначалници од оваа партија
Во одговор на пратеничко прашање, премиерот Димитар Ковачевски во Собранието истакна дека при давањето на концесиите за рудникот „Иловица“ се случило втората концесија целосно да ја заобиколи првата.
„Вчера се објавени сите документи од 2005 година со сите мислења, потписи, одобрувања на концесиите и добивме уште една многу интересна работа, а сигурно сте ја виделе, на графиконот, каде што се обележани првата и втората концесија, и тоа е многу интересно како е направено, втората концесија комплетно ја заобиколува првата, зошто е тоа направено? Единствен одговор може да дадат оние што одобриле концесиско подрачје врз веќе дадено концесиско подрачје. Кои се тие? Ако ги погледнете документите објавени на веб-страницата на Министерството за економија, таа концесија ја издал Никола Груевски, со позитивни мислења од тогашниот министер Миле Јанакиески, министерот за земјоделство, Љупчо Димовски, низа мислења, бидејќи се работи за постапка во три чекори, дадени и од Владо Мисајловски и од Паско Кузман и од сите. И јас не велам дали тие тоа тогаш го подржувале бидејќи со својот потпис дека немаат никаква забелешка на доделување и на првата и на втората концесија, и од аспект на транспорт и врски и од аспект на животната средина, и од аспект на земјоделството, и од аспект на водите, значи немаат ниту една забелешка, ниту една забелешка“, порача Ковачевски.
Тој посочи дека ДПМНЕ треба да ги даде сите одговори за концесиите за рудникот „Иловица“.
„Кога веќе некому дале концесија, каде што втората концесија комплетно се наоѓа врз првата концесија, во согласност со законот, тој има право да побара спојување на концесиите. Како се прави тоа? На веб-страницата на Министерство ви е објавен и записникот, и записникот ви е објавен од ваша влада за спојување на концесиите, и знаете што пишува во записникот – нема никакви забелешки за концесиите да се спојат. Јас не велам дали некој имал некаква лоша намера, добра намера, ваква или таква намера, можеби овие што ги споменав, некои се активни сега, а добар дел е активен, дел во парламентот, дел како советници во вашата партија, можеби смениле мислење, но треба да излезат да кажат дали сега можеби влијае лошо на животната средина оти тогаш не им влијаело лошо на животната средина. Погледнете ги одлуките на општините, и на Ново Село и на Босилово, и градоначалникот и Советот тоа време од ВМРО-ДПМНЕ донеле позитивна одлука за отворање рудници во Босилово и во Ново Село. Владата ги носи одлуките, но повторувам, да дадете концесија еден и врз неа да издадете концесија два и да потпишеш записник во 2016 да се спојат – е тоа ќе го прашате кај вас, не може да прашате во оваа Влада“, истакна Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Села: Не е во ред тоа што се потенцира ДУИ, коалицијата е Европски фронт, од 9 партии
Зијадин Села од Алијанса за Албанците во интервју за Трилинг по изборите и изборните резултати и случувања, вели дека се работи за изборен инжинеринг и закрупнување на неколку политички сили. Според Села, не е во ред тоа што се потенцира ДУИ, коалицијата е Европски фронт, од 9 партии.
„Тука се најглавните албански партии. А дали сме подготвени за во опозиција, по демократските правила, тоа не го кажувааат политичките чинители, тоа го кажува народот, кој гласаше на 8 мај за Европскиот фронт да презема одговорности и да биде дел од власта“, вели Села.
Тој смета дека „погрешна е дефиницијата за коалицирање победник со победник, треба да е мандатар со победник. Победникот од македонската страна е дефиниран со Устав. Демографската реалност е за да има стабилност и да одиме напред, треба да се испочитува волјата на втората етничка заедница која е 30%, наспроти 54% кои се Македонците, според последниот попис“.
Додава дека Владата треба „да се изјасни во врска со обидот за изборен инженеринг. Според Пржинскиот договор, на техничкиот премиер е да обезбеди фер и демократски избори. Тие не се надвор од одлуките кои се носат во ДИК и Управен суд. Техничката влада е договор на најголемите политички партии“.
За тоа како Европскиот фронт ќе се однесува како опозиција во Собранието, Села вели „треба да се почитува желбата на граѓаните, не на Мицкоски. Ние ќе се однесуваме сразмерно на тоа како ќе биде решено. Не сакам да коментирам желби. Од ДИК се уште не се објавени мандатите, кој колку има. Се уште Мицкоски не е мандатар“.
Македонија
Денес малку сонце, па облачно, попладне нестабилно со пороен дожд и грмежи
Времето денес ќе биде сончево и топло со мала до умерена облачност. Ќе дува слаб до умерен ветер од јужен правец. Попладне наместа, особено во северните делови ќе биде нестабилно со пороен дожд и грмежи, а ќе има и услови за краткотрајно невреме со силен ветер и изолирана појава на град.
Во Скопје сончево и топло со мала до умерена облачност. Попладне во делови од котлината ќе биде нестабилно со пороен дожд и грмежи, а ќе има и услови за краткотрајно невреме. Минималната температура ќе се спушти до 10, а максималната ќе достигне до 27 степени.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.