Македонија
Ковачевски: Историски скок на пензиите од 25 отсто до следниот септември
Претседателот на Владата на Република Северна Македонија, Димитар Ковачевски, денеска, по одржувањето на Советот за социјална сигурност, информира за усвоеното усогласување на мартовските пензии, односно покачување од 8,4 %. На прес-конференцијата, на која присуствуваа министерката за труд и социјална политика, Јованка Тренчевска, и претседателката на Сојузот на здруженијата на пензионерите, Станка Трајкова, претседателот на Владата истакна дека од почетокот на мандатот на оваа Влада, заклучно со септември 2023 година, пензиите ќе бидат повисоки 25 %, што е најголемо покачување досега во историјата на државата.
„Ако зборуваме во проценти, зголемувањето на мартовската пензија во согласност со методологијата, ќе биде зголемување од 8,4 %, што е и повеќе од очекуваното.
Во оваа 2023 година, освен оваа мартовско усогласување на пензиите, ќе следува уште едно во септември, усогласено според трошоците за живот и порастот на просечната плата, што значи дека за една календарска година растот на пензиите ќе биде околу 16 %. Или од првиот ден на оваа Влада, јануари минатата година, со покачувањата на пензиите, кои беа минатата година, во март и во септември, заедно со ова покачување и со покачувањето што следува во септември, пензиите ќе бидат поголеми 25 %, што никогаш досега во историјата на државата не се случило“, истакна премиерот Ковачевски.
Усогласувањето на пензиите се врши во согласност со методологијата 50 % трошоци од пораст на просечната исплатена плата и 50 % од порастот на животот на трошоците во РСМ, објасни министерката Тренчевска.
„Септемвриските пензии се усогласија во 2022 година во согласност со овој комбиниран модел од 50 % пораст на просечната плата и 50 % пораст на трошоците на живот и ја зголемивме, односно тогаш ја усогласивме пензијата за 6,8 %. Зголемувањето сега со мартовската пензија, која пензионерите ќе ја добијат на крајот на март, некаде на 27 март ќе почне исплатата на пензиите, ќе биде зголемена, односно усогласена за 8,4 % и со тоа просечната пензија од 17.666 денари се зголемува на 19.150 денари“, рече Тренчевска.
Претседателката на Сојузот на здруженијата на пензионерите, Трајкова, истакна дека со примената на новата методологија, која е преточена во Законот за ПИОМ, најнепосредно и директно се примени членот 37 од Законот за ПИО и пензиите ќе се усогласат со 8,4 %.
„За илустрација, во примената на таа формула во 2022 година, споредени полугодијата, порастот на трошоците за живот изнесува 10,6 %, а порастот на платите 6,2 %, што значи дека пензиите на пензионерите се зголемија 8,4 % и вака зголемените пензии ќе бидат основа за наредните зголемувања“, истакна Трајкова.
Усогасувањето на пензиите почна од септември минатата година. Септемвриските пензии се усогласија со овој комбиниран модел од 50 % пораст на просечната плата и 50 % пораст на трошоците на живот, пензиите се зголемија во висина од 6,8 %, со што пензијата од 16.348 денари се зголеми на 17.666 денари.
Со овој начин на усогласување на пензиите се овозможува реален пораст на пензиите во однос на платите, односно како што ќе порасне просечната плата, во континуитет растат и пензиите. Од голема важност за Владата се и многу успешната соработка и квалитетниот дијалог со Сојузот на здруженијата на пензионерите, заедно со експертите, ресорните министерства, пензиските друштва, партијата на пензионерите, другите коалициски партнери во Владата, со кои се направи успешна анализа со единствена цел квалитетен живот на нашите возрасни граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ноќва почнува зимското сметање на времето
Ноќва почнува зимското сметање на времето.
Стрелките на часовникот во 3 часот по полноќ ќе се поместат еден час наназад.
Со тоа, времето во 03:00 часот ќе се смета како 02:00 часот.
Македонија
Ѓоргиевски: Тим од експерти и градежна инспекција ќе стават крај на дивоградбите
Кандидатот за градоначалник на Град Скопје од ВМРО-ДПМНЕ, Орце Ѓорѓиевски изјави дека како градоначалник на Кисела Вода докажал дека може да се стави ред во урбанизмот, спречувајќи прекумерно градење.
Тој најави формирање експертски урбанистички тим кој ќе работи на растеретување на централното градско подрачје и насочување на развојот кон периферијата.
„Ќе формирам урбанистички тим од врвни експерти кој ќе помогне да се запре прекумерното градење во центарот“, рече Ѓорѓиевски.
Потсети дека како градоначалник на Кисела Вода бил првиот што спровел постапки и против индивидуални и против колективни објекти.
„Законот мора да важи еднакво за сите. Барам Град Скопје да има сопствена градежна инспекција или државата да го преземе тој дел, за да нема поделба на одговорност“, нагласи тој за „Трилинг“.
Ѓорѓиевски додаде дека дел од дивоградбите се објекти во кои живеат граѓани и истите мора да бидат безбедни. Според него, многу од овие објекти постојат веќе 15-20 години, но тоа не ја исклучува потребата за проверка на истите. Ѓорѓиевски додаде дека, кога станува збор за нови дивоградби, би бил уште поригорозен во санкционирањето.
Македонија
Мицкоски: Секој кој ја добил довербата на граѓаните е денешниот современ патриот
Претседателот на ВМРО-ДПМНЕ, Христијан Мицкоски, се обрати од денешниот настан одржан во општина Дојран, во рамки на вториот круг од локалните избори кои ќе се одржат на 2 ноември годинава. Мицкоски зборуваше за случувањата за време на изборната кампања и за тоа што следува во наредниот период. Тој истакна дека ВМРО-ДПМНЕ е партија која легитимитетот го црпи од граѓаните, а како што вели, секој оној кој ја добил довербата од народот и работи чесно и трудољубиво е денешниот современ патриот, илинденец и асномец.
,,Нема да биде лесно, ќе биде тешко, не памтиме ние лесни времиња, во суштина, многу предизвици, затоа сме ние да ги решаваме тие предизвици, не да лелекаме, не да кукаме, затоа е ВМРО-ДПМНЕ, затоа е оваа коалиција која што ја предводи ВМРО-ДПМНЕ, да ги решава проблемите“, рече Мицкоски.
Мицкоски истакна дека довербата која граѓаните ја дадоа на ВМРО-ДПМНЕ и коалицијата за овие локални избори, во првиот круг од истите, е од историски размери.
,,На овие локални избори, граѓаните дадоа доверба, а коалицијата која што ја предводи ВМРО-ДПМНЕ во историски размери, како никогаш до сега. Јас сум убеден дека на овие 33 градоначалници, кои што се избрани во првиот круг, ако се додадат овие нови два, бидејќи противниците се откажаа, веќе се 35 убеден сум, дека на овие 35 ќе се додадат и преостанатите 24 и бројката ќе биде 59“, кажа Мицкоски.
ВМРО-ДПМНЕ е партија која легитимитетот го добива од граѓаните, и како што вели Мицкоски, таа доверба нема да се изневери и само ќе се надградува.
,,ВМРО-ДПМНЕ е партија која што својот легитимитет го добива, тој легитимитет извира од граѓаните. И ние со нашето работење нема никогаш да дозволиме таа доверба да ја прокоцкаме, таа ја доверба да ја изневериме, туку напротив ќе се трудиме со нашето работење да покажеме и докажеме дека сме ја заслужиле таа доверба и дека само ќе ја надградуваме“, истакна Мицкоски.
Мицкоски посочи оние, кои според него, работат искрено, чесно и трудољубиво да ја оправдаат довербата кој граѓаните им ја даваат се денешните современи патриоти, асномци и илинденци, а не тие кои се кријат зад црни кампањи и ад хоминем напади.
,,Секој оној, кој што добил можност, ја добил довербата на граѓаните, и кој што работи напорно, чесно, трудољубиво, којшто е вреден, којшто не се однесува надмено, туку напротив, се однесува понизно, кон граѓаните кон народот, кој што го избрал, е денешниот современ патриот, е денешниот гемиџија, е денешниот илинденец, асномец“, рече Мицкоски и додаде:
,,Не оној кој што седи зад статусите и се крие со лажни имиња, кој што навредува кој што лаже, кој што води црни кампањи, кој што напаѓа ад хоминем, со ниски страсти, тие не се патриоти тие се измамници“.

