Македонија
Ковачевски на средба со папата: Македонија и Ватикан градат пријателство базирано на заеднички историски, културни и верски традиции

На аудиенцијата кај светиот отец Франциско како една од централните активности од програмата за чествување на животот и големото дело на светите Кирил и Методиј, премиерот Ковачевски изрази благодарност за посетата на папата Франциско на нашата земја во 2019 година, која беше прва посета на предводник на Римокатоличката црква запишана како историска.
За време на разговорот на средбата со папата Франциско, беше истакната улогата на светите браќа Кирил и Методиј, кои со својата мисија да го шират христијанството на јазик разбирлив за словенските народи извршија и мисија на поврзување на народите на Европа.
Северна Македонија и Ватикан, беше нагласено на средбата, од воспоставувањето дипломатски односи пред 28 години, со посветеност и меѓусебно почитување градат пријателство базирано на заеднички историски, културни и верски традиции и значајни ликови, како светите браќа Кирил и Методиј и света Мајка Тереза.
На средбата беше поздравена почнатата иницијатива за потпишување темелен договор (конкордат) помеѓу Северна Македонија и Светата столица за да се регулира статусот на Католичката црква во нашата земја и за унапредување на соработката во областите од заемен интерес, особено во делот на соработката меѓу образованите институции и архивите на двете земји.
Премиерот Ковачевски истакна дека на огромно негово задоволство со папата Франциско се согласија дека поддршката на најранливите наши сограѓани во време на криза е суштината на нашето дејствување. Почитувањето на разликите како еден од столбовите на градењето на општество во кое има место за сите е пресликана во традицијата на меѓурелигиска толеранција, почитување разни верски убедувања, како и негувањето на слободата и демократијата во Република Северна Македонија.
На средбата меѓу премиерот Ковачевски и македонската делегација со папата Франциско беа споделени пораки за надеж и желба за просперитет во постпандемискиот период, но и во време на справување со најголемата криза досега, истакнувајќи дека плодната соработка со Ватикан ќе се продлабочи бидејќи ги делиме истите вредности на меѓусебно разбирање, поддршка за најранливите, еднаквост, толеранција и човечко достоинство.
Премиерот Ковачевски на папата Франциско му подари рачно изработен фрагмент со калиграфско пишување на рачна изработена хартија од пофалното слово на свети Климент Охридски, бројници со традиционален охридски бисер и филигран, како и винил-плоча од македонскиот виртуоз Влатко Стефановски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Андоновски: Дигиталниот самит ја става Македонија на мапата на дигитално развиени држави

Министерот за дигитална трансформација, Стефан Андоновски во гостување на македонско радио, говореше за Дигиталниот самит кој ќе се одржи во Скопје на 1 и 2 октомври, во Музејот на современа уметност, на кој ќе бидат присутни над 800 учесници од државата, но и од другите земји од регионот и од Европа.
Андоновски истакна дека оваа година самитот е малку реорганизиран, со тоа што ако порано бил само за функционери и членови на владите, сега и граѓаните, бизнис секторот, универзитетите, ќе може да присуствуваат и да ги слушаат говорниците кои се поканети на самитот.
Како главни теми на самитот ќе бидат сајбер-безбедноста и дигиталните услуги, но на самитот ќе се говори и за вештачката интелигенција, најави Андоновски.
„Главен интерес ќе ставиме на сајбер-безбедноста, 3 панели ќе бидат посветени на неа, затоа што имаше голем интерес и од учесниците и од панелистите. Потоа, дигиталните услуги, ќе ја преставиме како што ветив македонската мобилна супер апликација, секако ќе разговараме за дигитален паричник, дигитален идентитет, интероперабилност, нови услуги, поврзување на институциите, иновации, вештачка интелигенција и итн’’, рече министерот за дигитална трансформација.
Во однос на промоција на настанот, Андоновски напомена дека сите панели и свеченото отворање, како и обраќањето на премиерот Христијан Мицкоски и неговото обраќање ќе бидат дигитално пренесувани на социјалните мрежи.
„Сите заинтересирани кои нема да можат да бидат во можност да присуствуваат на настанот, ќе можат истото да го следат на социјалните медиуми, мислам дека ќе биде одличен настан’’, заклучи Андоновски.
Македонија
Во полициската станица во Пробиштип ќе биде поставена биста на Тоше Тодоровски кој загина во дискотеката „Пулс“

Утре, 27.09.2025 година, во 10.00 часот, во кругот на полициската станица во Пробиштип ќе се одржи свечена церемонија на откривање на спомен бистата на Тоше Тодоровски, кој трагично го загуби животот извршувајќи работни задачи во дискотеката ,,Пулс” во Кочани, соопшти Независниот полициски синдикат.
„Во овие тешки моменти во кои навршија 6 месеци од трагедијата и сѐ уште се чуствува длабока тага и болка не е време за поделби, туку е момент кој треба да не обедини сите кои сочуствуваме со фамилиите кои загубија свои блиски, достоинствено да одадеме почит и да побараме правда за сите“, велат од Синдикатот.
Македонија
МВР објави анкета за неговите услуги

Министерството за внатрешни работи објави анкета да го истражи задоволството на граѓаните од користење на услугите на МВР.
„Во насока на подобрување на квалитетот на услугите во Министерството за внатрешни работи Ве известуваме дека е поставен анкетен прашалник преку кој може да го изразите Вашето задоволство од користењето на услугите на Министерството за Внатрешни работи“, велат од МВР.
Анкетата е објавена на следниот линк: https://mvr.gov.mk/mk-MK/anketen-prasalnik