Македонија
Ковачевски: Се надевам дека Трајанов нема да стане заложник на Апасиев

Напуштањето на владиното мнозинство на Демократски сојуз не е изненадување за премиерот Димитар Ковачевски. Трајанов го најавил излегувањето од Влада во петокот на средба со премиерот. Ковачевски денес од Ресава, тиквешко, порача дека одлуката на Демократски сојуз не претставува нарушување на силината и на стабилноста на владејачкото мнозинство.
„Ме радува што Демократскиот сојуз останува на европскиот пат и на поддршка на такви одлуки, што не можеше да се потврди досега во праска, освен декларативно, бидејќи видовме дека и вчера не го гласаше пратеникот на Демократски сојуз договорот ФРОНТЕКС, за жал. Сепак има можност во иднина своите декларации да ги покаже и во пракса. Тој тоа го најави во петокот кога имавме средба со него но сакаа да го соопштат самите. Очекувам нивните функционери во текот на денот да ги поднесат своите оставки. Тука пред се мислам на заменик-министерот за локална самоуправа. Се надевам дека како искусен политичар господинот Трајанов нема да се доведе во ситуација како Мицкоски да стане заложник на Апасиев“, рече премиерот Ковачевски кој денес во Ресава присуствуваше на закројување лозје.
Премиерот уверува дека владиното мнозинство е силно и очекува реконструкцијата на Владата да помине со над 64 гласови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) ДЗС: Пронајдени артилериска граната од 75 mm и рачна бомба од Првата светска војна

Во последното деноноќие, вчера во пределот на преспанскиот дел од Национален парк Галичица, беа пронајдени една артилериска граната 75 mm и рачна бомба, при што од страна на Дирекцијата за заштита и спасување е интервенирано за безбедно отстранување неексплодирани убојни средства (НУС) од минатите војни, извести ДЗС.
Дирекцијата за заштита апелира до граѓаните, при прошетки во природата во случај кога ќе пронајдат неексплодирани убојни средства да не ги фаќаат и поместуваат, туку едноставно да се јават на Единствениот повикувачки број за итни случаи 112 во ЦУК, по што надлежните институции и служби ќе се погрижат безбедно да бидат отстранети или неутрализирани, согласно конкретните пронајдени НУС. Така ќе бидат заштитени животите и безбедност на тие што ги пронаоѓаат тие потенцијално опасни заостанати оружја од минатите војни, а и животите на идните посетители во природата.
Пронајдените гранати веќе биле употребени, а неексплодирани и претставувале потенцијална опасност за граѓани коишто се на прошетка во природата или пак за пожарникари коишто гаснат шумски пожари во тој предел. Конкретно, артилериска граната од 75 mm со потекло од Прва светска војна била истрелана и помината низ топовска цевка и имала временска запалка којашто од непознати причини не извршила активација на гранатата кога со нејзе се дејствувало. Опасноста за активирање, кај вакви веќе истрелани гранати, постои при дејство, удирање, врз запалката и при висока температура, на пример при пожар и слично.
Рачната бомба, од германско производство, била одбранбена бомба од Прва светска војна со активирана каписла од времето кога била фрлена, употребена.
Двете неексплодирани убојни средства (НУС) од минатите војни се безбедно подигнати и транспортирани на безбедно место за понатамошна постапка до нивно уништување, според оперативните стандардни процедури. од пиротехничарот во ДЗС Битола, Ѓорги Стефанов и овластениот пиротехничар Митко Ташков од ДЗС Гевгелија, соопшти Дирекцијата за заштита и спасување.
Македонија
AA: Прво да се донесе Законот за соодветна и правична застапеност, а потоа да се испрати до Венецијанската комисија

„Алијансата за Албанците со загриженост го следи долготрајниот процес за изготвување и усвојување на Законот за правична и соодветна застапеност во државните и јавните институции. Изјавата на премиерот Христијан Мицкоски, дека законот прво ќе помине низ Владата, а потоа ќе биде испратен на мислење до Венецијанската комисија, пред да се изгласа во Собранието, предизвикува длабока загриженост за намерните одложувања и тактиките на блокирање од страна на ВМРО-ДПМНЕ и нејзините владини партнери од коалицијата ВЛЕН, кои или не ја разбираат важноста на ова прашање, или се заслепени од жедта за моќ“, велат од Алијанса за Албанците.
„Искуството со Законот за употреба на јазиците го покажува реалниот ризик од долги одложувања. Овој закон беше испратен до Венецијанската комисија на 22 јануари 2019 година, а пријателското мислење беше вратено дури на 4 мај 2025 година – по цели шест години чекање.
Покрај тоа, за разлика од законот што беше усвоен во Собранието, а потоа подложен на меѓународна евалуација, во сегашниот случај, Владата се обидува да го испрати Законот за правична и соодветна застапеност до Венецијанската комисија без парламентарно одобрување. Ова е опасна практика што може да создаде правен вакуум, во време кога на земјата ѝ се потребни јасни гаранции за правична застапеност на сите заедници.
По одлуката на Уставниот суд да се укине балансерот, земјата се наоѓа во правен вакуум кој сериозно се злоупотребува. Сегашните практики за вработување – каде што во многу конкурси резултатот е 20 спрема 0 на штета на албанските граѓани – се јасен показател за кршење на начелата на Охридскиот договор и сериозно ја загрозуваат меѓуетничката хармонија.
Алијансата за Албанците силно настојува Законот за правична и соодветна застапеност прво да биде усвоен во Собранието, а дури потоа да биде испратен на мислење до Венецијанската комисија. Само на овој начин може да се избегнат бесконечните одложувања, да се заштити граѓанската еднаквост и да се спречи политичка злоупотреба на вработувањата во државната администрација“, се наведува во соопштението на Алијансата за Албанците.
Македонија
Тим на лекари ќе се грижат за повредените пациенти во центарот за рехабилитација Пониква

Одморалиштето Пониква станува рехабилитациски центар за сите повредени граѓани од трагедијата во Кочани.
Владата на вчерашната седница донесе одлука и го задолжи Министерството за внатрешни работи да го стави одморалиштето Пониква кое има 27 соби и 56 легла на располагање на Министерството за здравство за лекување на пациентите кои имаат потреба од дополнителна медицинска услуга во период од 10 јуни до 20 август.
Дополнително, тим на лекари ќе се грижат и ќе обезбедат здравствена нега и ќе им пружат психолошка поддршка на пациентите.
„Нашата обврска како Влада е да понудиме и да обезбедиме целосна здравствена заштита. Доколку медицинските тимови и здравствени работници одлучат дека е потребно продолжување на временскиот период за лекување и рехабилитација на пациентите, Владата ќе ја продолжи одлуката.
Пациентите нема да платат ниту денар, се е на трошок на Министерството за внатрешни работи и Владата кои ќе обезбедат сместување и оброк на пациентите, како и оброк за медицинскиот кадар.
Приоритет се и ќе останат граѓаните. Нашата политика е да работиме одговорно и посветено, а не да влегуваме во дневно политичките обвинувања со одредени опозициски партии кои за жал од трагедијата сакаат да соберат некој поен“, се наведува во соопштението од Владата.