Македонија
Ковачевски – Поуп: Северна Македонија придонесува во управувањето со миграцијата и безбедноста во Европа
Премиерот Димитар Ковачевски, во пресрет на официјалното отворање на Преспа форум за дијалог 2023, се сретна со Ејми Поуп, новоизбрана генерална директорка на Меѓународната организација за миграција (IOM).
Ковачевски го честиташе изборот на Поуп, која треба да стапи на новата позиција од 1 октомври 2023 година, а нејзината кандидатура беше поддржана од Република Северна Македонија и ѝ посака успешен мандат, како прва жена на чело на Меѓународната организација за миграција (IOM).
На средбата е оценета како успешна соработката со Владата, во делот на одговорот на кризи, управувањето со миграцијата и податоци и ресурси, што е констатирано како значајно, посебно земајќи ја предвид состојбата со присуството на мигранти на јужната граница, односно меѓу Северна Македонија и Република Грција.
Тој нагласи дека Северна Македонија има усогласени активности и политики со европските партнери во однос на миграциските прашања. И, продолжува активно да соработува со Меѓународната организација за миграција, препознавајќи го доброто управување со миграцијата од важност за безбедноста во регионални и европски рамки и како прашање од важност во Агендата за одржлив развој 2030 година.
„Ефективното управување со миграцијата е меѓу приоритетите на Владата, особено во делот на раното откривање и спречување илегални преминувања и движења долж балканската рута, со фокус на безбедноста на границите“, рече Ковачевски.
На состанокот е заеднички истакнато значењето на зајакнувањето на прекуграничната соработка, како еден од главните предуслови за ефикасно управување со илегалната миграција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ се наоѓа во многу тешка ситуација, има потреба од еден нов почеток: Деспотовски ја поднесе кандидатурата за претседател на СДСМ
Од центарот на Скопје пред старата Железничка станица, Јован Деспотовски објави дека ја поднел неговата кандидатира за претседател на СДСМ.
Симболиката со старата железничка станица како што рече е многу јасна.
„Ја избравме локацијата позади нас, тоа е старата железничка станица, најпогодена од катастрофалниот земјотрес пред 61 година. СДСМ се наоѓа во многу тешка ситуација, има потреба од еден нов почеток. Денеска објавуваме една нова програма за нов почеток, за нов СДСМ. Исто како што Скопје успеа да се подигне од пепелта да се обнoви и да стане убав град, така и СДСМ повторно ќе почне, ќе биде нова партија, која ќе ги обединува не само сите свои членови, туку партија за сите граѓани“, подвлече Деспотовски.
Најави дека нема да троши многу време на зборување, туку на дела и конкретни чекори. Тоа, според него е клучната разлика по која ќе се разликуваат од противкандидатите.
Најави нови луѓе, но и дека старите структури нема да бидат заборавени.
„Ќе има нов механизам по кој ќе дејствуваме, ќе формираме Влада во сенка, за граѓаните да споредуваат и размислуваат. Концептот на Влада во сенка постои, не е за да СДСМ дели фотелји, туку конкретни личности ќе работат на ставови, ќе подадеме рака на политичкиот опонент, ама кај што ќе видиме дека има разлика, ќе критикуваме. Ќе бидеме конструктивна опозиција, нема да критикуваме неосновано – тоа ќе не разликува од досега“, појасни Деспотовски.
Кажа дека нема да прифати ниту една позиција во партијата, ако не биде избран во партијата.
Прашан околу големата поделеност која постои во партијата тој рече дека работите во партијата ќе се решаваат системски.
„Работите не се решаваат со пазар. И денеска ќе поднесам изјава како што ветив дека нема да прифатам ниту една позиција во партијата доколку не бидам избран за претседател“.
Кажа дека нема поддршка од актуелното или од поранешното партиско раководство.
„Нашата политика е политика на радикален дисконтинуитет, со сите досегашни политики, со сите досегашни пракси, и со сите досегашни кадровски решенија во партијата. Нашата поддршка доаѓа од членовите“, потенцира тој.
Македонија
Мицкоски најави формирање на две нови министерства
„Пред изборите кои поминаа ветивме функционална и правна држава, ефикасна влада која ќе спроведе реформи и ќе го подобри животот на сите граѓани во Македонија. Суштината поради која граѓаните ни дадоа огромна доверба не се оние прашања кои што во изминатиот период беа дел од јавното мислење, кој каква заклетва дал, што кажал, кој кому нешто направил, зошто се скарал со оној итн. Туку суштината е политиките кои што треба идната Влада да ги спроведе и да ги реализира треба да донесат владеење на правото, сите оние кои што се огрешиле пред законот да одговараат пред истиот, да нема повеќе граѓани од прв ред малкумина, и многумина граѓани од втор и понизок ред како што беше што би рекол еден политичар како до сега. Да донесеме реформи во економијата, да го подобриме стандардот на граѓаните и условите во образованието, за да може секое дете на први септември да има вистински учебник пред себе, а не да се водат забелешки или да се добиваат скрипти како што беше пред неколку декади. Во здравството да не ни се случува тоа што денеска ни се случува, пациентите да ни умираат по ходниците. Да се спроведуваат реформи и за земјоделците, младите дома да ги задржиме, повисоки пензии за пензионерите. И сето тоа кое што го ветувавме за време на изборите да стане реалност и секојдневие во нашата држава“, кажа на денешната прес-конференција лидерот на ВМРО-ДПМНЕ, Христијан Мицкоски.
„За да го направиме ова ни треба добра организација на владата. Врз основа на Членот 71 став 1 од Уставот и врз основа на членовите 139, 144 и 175 од собранискиот Деловник поднесувам Предлог на закон за измена на Законот за организација и работа на органите на државната управа, по скратена постапка.
Имено во Членот 71 став 1 од Уставот како и членовите 139 и 144 од Деловникот е уредено дека право да предлага донесување на закон има секој пратеник во Собранието, Владата и најмалку 10.000 избирачи. Додека пак со Членот 175 од Деловникот на Собранието е уредено дека Предлагачот на предлогот на закон може да му предложи на Собранието да расправа по истиот по скратена постапка.
Ја барам поддршката од сите пратеници во македонскиот парламент без исклучок на која политичка партија припаѓаат, а легитимитетот и легалитетот на ова барање го темелам на изборниот резултат од пред неколку недели кога коалицијата Твоја Македонија предводена од ВМРО-ДПМНЕ и новиот претседател професорката Гордана Сиљановска Давкова освоија 436.000 гласови, односно 561.000 гласови. Легитимитетот од страна на граѓаните е јасен, кредибилитетот и легалитетот е исто така јасен.
Ова беше исто така изборно ветување идентично на она коешто го дадовме дека идната влада на коалицијата Твоја Македонија предводена од ВМРО-ДПМНЕ ќе ја прави заедно со опозициските партии тогаш кои што беа, а денеска ќе бидат дел и веќе се дел од новото владино мнозинство. Тоа го говоревме за време на кампањата исто така говоревме и за реорганизација на ресорите во рамки на владата. Јас би сакал уште еднаш да повторам, што е она што овој закон го опфаќа, каква е таа реорганизација, би сакал накратко да ве запознаам вас медиумите и нормално граѓаните и македонската јавност.
Имено со овој нов закон кој веќе е доставен до архивата, се предвидува да бидат формирани или реорганизирани определен број на министерства во рамките на самата влада и тоа ќе започнам со министерството за економија и труд кое практично ќе биде министерство кое ќе ги опфаќа дел од ингеренциите на старото министерство за економија, а на тоа министерство ќе му биде додаде сегментот труд за да можат работодавачите и работниците да бидат во едно место и на тоа место заедно да ги реализираат своите права, дијалог и така натаму. Така што министерството за социјална политика и труд кое беше досега, ќе биде сега министерство за социјална политика, демографија и млади. Агенцијата за млади и спорт која постоеше досега нема да постои и ќе имаме посебно министерство за спорт.
Исто така дел од надлежностите кои ги имаше досега министерството за економија во делот на рударството и енергетиката ќе бидат дел од надлежностите на новото формирано министерство, а тоа е министерство за енергетика, рударство и минерални суровини.
Дел од ингеренциите кои што ги имаше министерството за економија посебно во делот на туризмот ќе бидат сега присоединети до новото министерство, министерството за култура и туризам.
Ќе имаме ново министерство кое што ќе има задача да спроведе еден многу важен проект кој што ќе ја зголеми транспарентноста, владеењето на правото ќе ја намали основаното сомневање за корупција во рамките на администрацијата тоа е новоформираното министерство за дигитализација кое што во суштина ќе ги наследи обврските кој што ги имаше досегашното министерство за информатичка технологија и администрација.
Ќе имаме исто така ново министерство тоа е министерството за администрација така што мислам дека со една ваква реорганизација ќе добиеме една ефикасност ќе добиеме осовременување на самата влада и ќе добиеме пред се она кое што го ветувавме за време на кампањата а тоа е да го подобриме животот и стандардот на сите граѓани во Македонија без разлика на нивната политичка и партиска припадност.
Затоа уште еднаш би сакал да ја искористам оваа можност да се обратам до сите пратеници во македонскиот парламент да го поддржат овој закон затоа што на овој начин ќе покажеме дека не живееме во стереотипи стереотипите се минато и дека сите заеднички имаме една цел а тоа е како да направиме подобро место за нашите сограѓани за живеење.
Ќе повторам кредибилитетот легитимитетот го дадоа повеќе од половина милион гласачи на последните парламентарни и претседателски избори на кои што јасно беше ставено на знаење што се очекува од нас политичарите и од идната влада, а тоа се пред се подобри услови за живот и реформи во секоја област и да не биде како онаа познатата како до сега“, изјави Мицкоски.
Скопје
Традиционалниот Илинденски марш оваа година помасовен
Здружението на граѓаните од Горно Лисиче „Илинденски марш 1978“ годинава подготовките ги почна порано од вообичаеното. Традиционалниот марш по повод еден од најголемите македонски национални празници – Илинден ќе се одржи 46. пат.
Причина за овие подготовки, како што информираат од Здружението, е огромниот интерес за учество на Илинденскиот марш, и тоа не само од Аеродром туку и од други општини и градови, како што се Кичево, Маврово и Свети Николе, така што се очекува традиционалната манифестација годинава да биде многу помасовна. Право на учество во маршот имаат сите заинтересирани мажи и жени од цела држава на возраст од 16 до 76 години, а досега покрај аеродромци, има пријавени коњаници од Кичево, Маврово и Свети Николе. Рокот за пријавување е до 30 јуни.
Коњичкиот марш почнува од паркот „Јане Сандански“ во општина Аеродром кога на коњаниците им се предава општинското знаме, а крајната дестинација е Крушево, каде што треба да стигнат на 2 Август. Коњаниците придружувани од фаланга и игроорци од КУД „Никола Јонков Вапцаров“, со звуците на зурлите и тапаните се упатуваат кон црквата „Свети Петар и Павле“ во Горно Лисиче минувајќи низ главните булевари на општината.
Пред испраќањето на илинденците секоја година се одржува свечена литургија по што традиционално се организира и богата музичка програма со настап на познати македонски естрадни уметници.
Општина Аеродром и оваа година финансиски ќе го поддржи Илинденскиот марш како една од најголемите и најзначајни манифестации во Аеродром, со што се негуваат традицијата и македонската култура.