Премиерот Димитар Ковачевски од собраниска седница порача дека граѓаните и државата имаат одговорна Влада, која се грижи за националните интереси, стратешките цели и за економските потреби на граѓаните.

„Предвремени парламентарни избори не треба да има. Ние во моментот имаме Влада што се грижи за националните интереси и за достоинството на сите граѓани, без разлика на тоа од која етничка, верска и национална припадност доаѓаат. Така беше и во изминатиот период кога националните интереси, во согласност со одлуките и резолуциите донесени тука во Собранието, беа застапувани од страна на сите челнови на Владата, без разлика на тоа дали се Македонци, Албанци Турци или од која било друга национална припадност. И тоа се потврди мината недела кога на принципиелен начин ние ги искажавме нашите ставови пред сите наши параметри во ЕУ и пошироко“, посочи Ковачевски.

Тој направи споредба со однесувањето на опозицијата, што го оцени како неодговорно.

„На конгресот на европските народни партии беше донесена резолуција во која се вградени барањата во однос на негирање на националниот и историскиот континуитет на Македонците и на таа резолуција присуствуваше делегација на нависоко ниво од ВМРО-ДПМНЕ. Никаде не видовме прес-конференција на спротивставување, тоа ќе остане запаметено“, рече премиерот Ковачевски.

Тој порача дека „лесно е некој да брани национални интереси тука дома, но кога треба да се бранат национални интереси пред 27 земји, тогаш на некого тоа му е тешко, а некој тоа мора да го направи како што јас, претседателот на државата, коалициските партнери и граѓаните на државата тоа го направивме, без разлика на својата припадност – се борат за својот национален, етнички и верски идентитет и континуитет. На еден секогаш му припаѓа честа тоа да го брани и пред други, овој пат тоа мене ми припадна како чест и се гордеам што сите заедно застанавме и го кажавме она што требаше да го кажеме не навредувајќи никого, ниту дома ниту надвор“, дополни Ковачевски.