Ако им се провери имотот на вработените во Царина, како и начинот на кој го стекнале, ќе ја зголемат транспарентноста. Со оваа теза, премиерот Димитар Ковачевски го бранеше предлогот кој го даде до директорот на управата, Стефан Богоев. Според него, критиките дека тој и функционерите не се транспарентни – се неточни.

„Јас не сум најавил никаков ветинг, туку реков дека треба да се провери имотната состојба. За тоа не треба ветинг, туку интерни постапки – процедури, каде ќе може секој вработен да го прикаже својот имот и начин на кој е стекнат. И не е точно дека јас и функционерите не сме транспарентни во тој дел, бидејќи секој избран и именуван функционер поднесува анкетен лист. Антикорупциска има право да го провери потеклото на имотот на секој избран и именуван функционер. Јас мислам дека во Царина ако се примени тоа, ќе се качи нивото на нивната транспарентност, ќе добијат повеќе на кредибилитет. Ако нема некој што да крие, нема потреба да не поддржи таков процес. Ветинг е сосема друго“, рече Ковачевски.

Претходно, професорката Мирјана Најчевска, овој предлог го нарече „политичка перверзија“.

„Наместо да се проверува имотот на функционерите, ќе го проверуваат имотот на администрацијата. Наместо да се стават во затвор мафијашите од ДУИ, ќе ја отпуштат Перса дактилографката. Наместо да одговараат сите оние кои ги злоупотребија законите за лична корист (за што постојат јасни и гласни ревизорски извештаи) ќе дигаат прашина и ќе плашат ситна боранија. Која политичка перверзија. Како што реков, потребна ни е технократска влада за да се врати сета оваа гамад под камењата од под кои исползе пред 30 години“, напиша таа.