Македонија
Ковачевски – Столтенберг: Северна Македонија е дел од силното НАТО-единство, кое е гарант за европската безбедност

Премиерот Димитар Ковачевски ја почна дводневната работна посета на Брисел со средба со генералниот секретар на НАТО, Јенс Столтенберг.
На средбата во седиштето на НАТО во Брисел, на која присуствуваа и министерот за надворешни работи, Бујар Османи, и министерката за одбрана, Славјанка Петровска, премиерот Ковачевски истакна дека со исполнувањето на својата стратешка цел да стане членка на НАТО, Република Северна Македонија во рекордно време ја оствари воената интеграција во алијансата и продолжува со процесот на модернизација на нашата Армија.
Република Северна Македонија, нагласи премиерот Ковачевски на средбата со генералниот секретар на НАТО, Јенс Столтенберг, е на добар пат да го оствари буџетот за модернизација на Армијата и за одбраната до крајот на оваа година и дека земјата останува посветена на учеството во операциите и мисиите на НАТО.
На средбата беше потенцирано дека членството во НАТО на Северна Македонија придонесе за регионалната стабилност на Западен Балкан и дека е постигнат огромен напредок во соработката со нашите соседи и особено со сојузниците во алијансата. Нашата држава има директна придобивка од соработката со сојузниците во смисла на подобрена безбедност на воздушниот простор, зајакнување на капацитетите на Армијата и интероперабилност преку заедничките воени вежби и други активности.
Премиерот Ковачевски на средбата со генералниот секретар Столтенберг го потврди единството со сојузниците во НАТО во однос на прашањата поврзани со Украина и додаде дека е неопходна деескалација на тензиите и решавање на прашањата со Русија по пат на дипломатија.
Како земја членка на НАТО, рече Ковачевски, го сметаме за суштински апелот на НАТО – Русија да го обнови дијалогот во рамките на советот НАТО – Русија и додаде дека Северна Македонија е подготвена за конструктивен ангажман во рамките на тој процес.
Генералниот секретар на НАТО, Столтенберг, изрази задоволство од подготвеноста на Северна Македонија активно да учествува во заедничкиот одговор на прашањата од интерес на алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Филипче: Со ВМРО-ДПМНЕ на власт основните трошоци се зголемени за 4.300 денари, а минималната платата за само 1.800 денари

ВМРО-ДПМНЕ за една година ја доведе државата во најголема економска несигурност што сме ја виделе досега, а граѓаните живеат сé потешко, посочи претседателот на Социјалдемократскиот сојуз на Македонија, д-р Венко Филипче.
Тој нагласи дека додека владата ги користи своите ПР трикови за да прикаже дека во државата добро се живее, реалноста е поразителна- граѓаните се тие што знаат како живеат и каква е реалната состојба со економијата, цените и платите.
„Реалните бројки, не оние измислените од премиерот, покажуваат дека платите стагнираат, цените растат, а граѓаните губат. Инфлацијата е 4,8%, секојдневно растат трошоците и реалноста е дека се живее сè потешко“, рече Филипче.
Говорејќи за животниот стандард, Филипче нагласи дека минималната синдикална кошница, откако ВМРО-ДПМНЕ е на власт, секој месец урива нови рекорди.
„Во јуни 2024 година, минималната синдикална кошничка изнесуваше 60.325 денари, а во август минатата година надмина 61.199 денари. Денес, после една година таа достигна 65.507 денари. Тоа значи дека во периодот откако ВМРО-ДПМНЕ е на власт, основните трошоци за живот се зголемени за околу 4.300 денари. Во исто време, минималната плата е зголемена за само 1.800 денари. Ова е директен удар врз стандардот на граѓаните, рече Филипче.
При тоа, Филипче потенцираше дека реалните бројки, не оние измислените од премиерот, покажуваат дека платите стагнираат, цените растат, а граѓаните губат.
„Премиерот Мицкоски се фали со бројки за „раст на платите од 11, 12 или 13%“. Но, да ги погледнеме реалните бројки. Реалната плата, онаа што ја покажува куповната моќ на граѓаните, во јуни порасна само 3,8%, а пред една година со мерките на СДСМ растот беше 11%. За прв пат после долги години имаме пад на просечната плата во споредба со претходниот месец – тоа беше случај во јуни“, рече претседателот на СДСМ, Венко Филипче.
Македонија
„Кандидатурата на Мециновиќ за Скопје е договор на Левица да им помогне на СДС и ДУИ“, велат од ВМРО-ДПМНЕ

„Јасно е дека кандидатурата на Амар Мециновиќ е дил на Левица за помош на ДУИ и СДС, со математика Орце Ѓеорѓиевски да не победи уште во првиот круг“, велат од ВМРО-ДПМНЕ.
„Затоа Левица не можеше да најде ниту еден друг кандидат и никој друг не се нафати за кандидат за градоначалник за Скопје, па затоа го кандидираа пратеникот Амар Мециновиќ.
Го прашуваме Мециновиќ со оглед на тоа што Димче Апасиев бараше пратениците на ВМРО-ДПМНЕ кои се кандидати за градоначалници да си поднесат оставка дали Мециновиќ ќе си поднесе оставка од пратеник бидејќи е кандидат за градоначалник“, соопшти ВМРО-ДПМНЕ.
Македонија
ДУИ не се Албанците, ДУИ е криминалната коалиција на злото, велат од ВМРО-ДПМНЕ

Бујар Османи продолжува со истата матрица, секоја критика за криминалот на ДУИ да ја претставува како „поттик на поделби“, велат од ВМРО-ДПМНЕ како реакција на изјавите на Бујар Османи од ДУИ.
Вистината, според владејачката партија е сосема спротивна.
„Поделбите и неправдите во државата настанаа токму поради СДСМ и ДУИ и нивната власт заради криминалните тендери, корупцијата и злоупотребата на институциите.
Бујар, Артан, Заев, Али и Филипче се коалиција на злото која ја жртвува Македонија за да ја ограбат државата и народот.
Кога ќе бидат фатени со рацете во медот, Османи и неговите колеги се кријат зад етнички теми. Но Албанците не се ДУИ, ниту пак ДУИ има право да зборува во нивно име“.
Албанците во Македонија, нагласуваат од ВМРО-ДПМНЕ се чесни граѓани кои сакаат ред, правда и развој, а тоа, како што велат е спротивно од она што го нудат Али, Артан, Бујар, Филипче и Заев.
„Затоа, колку и да се обидуваат да ја претворат борбата против криминалот во „етничко прашање“, тие добро знаат дека нема да успеат. Народот кажа јасно: криминалот не се исплати, а ДУИ и СДС се минато“.