Македонија
Ковачки до Ковачевски: Тупанчески го заменувате со човек кој е брат на осомничен за убиство

Пратеникот Драган Ковачки од ВМРО-ДПМНЕ на премиерот Димитар Ковачевски му порача дека е слуга на Али Ахмети, па го праша, каде е смената на Бојан Маричиќ и Бујар Османи поради лошите резултати. За Ковачки несфатлива е промената на министерот за правда Никола Тупанчески, бидејќи, според пратеникот, на негово место доаѓа брат на осомничен за убиство.
„Слугата на Ахмети како и досега, е слеп послушник и не е свесен дека е донесен на премиерското место за да биде жртвуван. Тој е исплашен политичар и нема ниту еден ТВ дуел со лидерот на ВМРО-ДПМНЕ. Македонија е една од државите со најголем степен на мизерија во Европа. Имаме бесперспективност“, кажа Ковачки.
Тој го праша премиерот и каде е предлогот за разрешување на Славјанка Петровска, а поради тоа што немало плати во АРМ.
„Со честото менување на коалиционите партнери, го уништивте легитимитетот на извршната власт. Зарем заслужува еден професор како Тупанчески кој уживаше делумна почит и кај опозицијата, по само година дена, да го замените со човек кој е брат на лице осомничено за убиство? Едно чудо министри за правда сменивте последните шест години. Тоа е доказ дека правдата ја гледате дневно политички и низ призмата на пазарењата“, додаде Ковачки.
Тој праша каде е смената на Бојан Маричиќ кого го нарече неспособен и Бујар Османи за кого кажа дека бидејќи единствено е способен за продажба на се што не е негово.
„Зарем министерот за здравство кој писмено барал од Владата да се купи лекот за болните од цистична фиброза, а премиерот не ја донел одлуката, ќе го менува со причина што министерот јавно проговори и ја обелодени вистината, дека директната одговорност за починатиот Благојче е кај премиерот?“, праша Ковачки.
Пратеникот го праша Ковачевски дали се срами поради тоа што во борбата со корупција, Македонија назадува.
„Таравари ќе влегуваше во Владата за Европа, а ни продава средновековна заостанатост. Ковачевски како по обичај – молчи“, додаде пратеникот.
На крајот од говорот, Ковачки му порача на Ковачевски дека денеска требало да ја поднесе неговата оставка за спас на Макеонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Левица: Уште еден закон одбиен – власта не гласаше за предлогот за денови на жалост

На вчерашната собраниска седница, владејачкото мнозинство повторно не ја надмина својата партиска суета и не гласаше за предлог-законот на Левица за денови на жалост, соопштија од партијата.
„Бидејќи во Македонија никако не е регулиран медиумскиот простор при денови на жалост, пратеничката група на Левица поднесе законско решение за регулирана медиумска програма без забавни и политички содржини за време на деновите на жалост, како и за воведување едноминутно молчење и санкции за недолично однесување“, наведуваат од партијата.
Пратеникот Амар Мециновиќ од Левица, образложувајќи го предлогот, истакна дека „тагата не смее да биде дел од политички наратив“ и дека со законот се бараат јасни и унифицирани критериуми за прогласување денови на жалост, кои не би зависеле исклучиво од одлуката на Владата.
При образложување на предлог-законот, пратеникот Мециновиќ потенцира дека овој закон не навлегува во правото на слобода за изразување и во регулирањето на приватните субјекти, туку ги подразбира измените кои ќе дозволат како нација да ја доживееме тагата во која што сме се нашле и да се дозволи на вистински начин да закрепнеме од колективните трагедии.
Предлогот се однесува на јавниот и на институционалниот домен, со фокус на одбележување трагични настани на национално и локално ниво.
Во предлогот стои дека целта на законот е обезбедување на правна основа за правилно одбележување на деновите на жалост на национално и локално ниво, преку организирано, унифицирано и достоинствено одбележување на трагични настани кои влијаат на националната и колективна меморија на државата, преку достоинствено оддавање почит кон настраданите и нивните блиски, како и поттикнување на човечноста, солидарноста и на националното единство.
„Жално е што дури и при една катарза кое му се случи на македонското општество, власта предводена од ВМРО-ДПМНЕ не гласаше за конструктивно законско решение, кое треба да го пополни правниот вакуум каде Македонија е ретка држава која нема Закон за денови на жалост“, велат од Левица.
Македонија
Масовно непрописно фрлање кабаст и градежен отпад на јавни површини, велат од Комунална хигиена Скопје

ЈП Комунална хигиена Скопје информира за масовно непрописно одлагање кабаст и градежен отпад на јавни и сообраќајни површини.
„Дрскоста на несовесните и неодговорно граѓани оди до таму што иако знаат дека согласно закон контејнерите се исклучиво за комунален отпад од домаќинствата, се исфрла градежен, кабаст и други видови отпад со кои сериозно се нагрдува градот, се загадува животната средина и загрозува здравјето на граѓаните.
Многу често контејнерите се преполни со кабаст и градежен отпад поради што останатите граѓани не можат да го одложат комуналниот отпад прописно, а зачестени се и појавите на непрописно одлагање отпад покрај садовите кога тие се сосема празни“, велат од Комунална хигиена Скопје.
„ЈП Комунална хигиена Скопје на терен задно со инспекциските служби на град Скопје има затекнато и казнето при непрописно и неконтролирано фрлање отпад над 600 лица во изминатите 4 месеци, и апелира за зголемена свесност да не се исфрла отпадот на јавни површини со што се создаваат диви депонии и се загрозува животна средина.
Од почетокот на годинава, екипите на претпријатието подигнаа над 3500 кубни метри отпад одложен на јавни и сообраќајни површини, а само во текот на месецот април се отстранети 950 кубни метри отпад од диви депонии покрај контејнерите, составен од кабаст и градежен отпад.
Ги информираме граѓаните дека секое исфрлање отпад надвор од наменски поставените садови претставува прекршување на Законот за јавна чистота и подлежи на санкции, исто како и фрлањето друг отпад освен комуналниот од домаќинствата. Контејнерите поставени на јавни површини се наменети исклучиво за одлагање мешан комунален отпад и во истите не смее да се одлага кабаст или градежен отпад.
Согласно Законот за јавна чистота, граѓаните и правните субјекти се ОБВРЗАНИ градежниот отпад да го одложат преку лиценцирано лице или директно на депонијата Дрисла и со истиот не смее да се загадува низ градот, во или покрај контејнерите поставени на јавни површини.
Во ЈП Комунална хигиена Скопје жителите на градот Скопје БЕЗ паричен надомест можат да го одложат својот кабаст отпад, во кој спаѓа мебел, електронските и електричните апарати, односно можат да го одложат во Центарот за селекција на отпад во Карпош секој ден во неделата, во терминот од 07 до 19 часот“, соопшти Комунална хигиена Скопје.
Македонија
Посебен режим на сообраќај во Скопје поради протест

СВР Скопје ги известува граѓаните дека утре со почеток во 11.00 часот поради одржување на протест, Единицата за безбедност на патниот сообраќај ќе преземе мерки за посебен режим на сообраќајот.
Протестот предвидено е да започне пред зградата на ССМ на улицата „Мирче Ацев“ со движење лево по улицата „Филип Втори Македонски“, десно по улицата „11-ти Октомври“, право по улицата „Димитрие Чуповски“, десно по улицата „Васил Главинов“, право по булеварот „ВМРО“, лево по булеварот „Илинден“ до пред Влада на Република Северна Македонија.
СВР Скопје апелира до сите граѓани учесници во сообраќајот да се почитуваат наредбите кои ќе ги даваат полициските службеници.