Македонија
(Видео) Ковачки: Ковачевски, Османи и Маричиќ да поднесат оставки поради ветото

Бараме директна одговорност од Ковачевски за францускиот предлог, кој самиот го преговараше и го договори. Ковачевски не може да манипулира дека тој и Владата не знаеле за предлогот, во чија подготовка учествувале официјални државни органи. И според изјавите на Стево Пендаровски, но и многубројни дипломати од кариера, предлогот бил изработен со вклученост на сите страни, изјави на денешната прес-конференција Драган Ковачки, пратеник и член на ИК на ВМРО-ДПМНЕ.
„Бараме одговорност и оставки од Бојан Маричиќ и Бујар Османи како директно вклучени во процесот на преговори. Одговорноста не смее да се сведе на принципот на кабелот е виновен за пожарот на некој административни функционери. На народот му е преку глава од манипулации. Доколку Ковачевски не бил запознаен со предлогот, како што тврди, иако е невозможно да не знаел што работат неговите подредени, треба да побара оставка и од Османи и од Маричиќ или самиот да ги разреши веднаш. Иако веруваме дека Ковачевски цело време стои зад понижувачкиот предлог и бил запознаен со деталите, но и го менаџирал процесот за туркање во јавноста“, вели Ковачки.
Да не заборавиме, додава Ковачки, дека целиот план им бил преку блицкриг-манипулација да се манипулира и лаже јавноста предлогот веднаш да помине во бугарското собрание, што е одолжено поради оставката на бугарската влада, а потоа и блицкриг-операција за поминување на овој предлог во Македонија преку креирање еуфорија за почеток на преговорите, дополни Ковачки.
„Ковачевски треба да си даде оставка поради манипулација и лажење на јавноста, но и нанесување трајна штета на македонските преговарачки позиции. Со согласноста што Владата и Ковачевски му ја имаат дадено на овој предлог воопшто и да излезе во јавноста, поставени се темелите на идните бугарски уцени и можноста секој следен предлог да биде најмалку лош како овој. Вака направената штета не е моментна, туку трајна и за ова мора да има одговорност“, нагласува пратеникот и член на ИК на ВМРО-ДПМНЕ.
Македонија, оценува тој, сè поизвесно дека ќе добие уште едно вето, а ќе остане, како што вели, и со трајно нарушени преговарачки позиции.
„Поради трајното нанесување штета на македонските преговарачки позиции, Владата мора да падне. Избори се решение“, вели Ковачки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За нова лична карта, возачка дозвола и пасош граѓаните можат да закажат онлајн

Министерството за дигитална трансформација информира дека електронската апликација за закажување термин за издавање лични документи повторно е достапна преку националниот портал за е-услуги uslugi.gov.mk.
-Граѓаните сега можат брзо и лесно, без чекање и без гужви да закажат термин за следните услуги: издавање лична карта, издавање пасош и издавање возачка дозвола. Процедурата е едноставна и достапна од кој било електронски уред, наведува Министерството.
Воедно додава дека со оваа иницијатива продолжува мисијата да ја дигитализира јавната администрација и да обезбеди поквалитетни, побрзи и поефикасни услуги за сите граѓани.
Македонија
Пожарникарите се бореа со огнови на 38 места во државава, 30 се изгаснати

Во текот на изминатото деноноќие се евидентирани вкупно 38 пожари од кои три активни, пет ставени под контрола и 30 изгаснати.
Според најновиот извештај на Центарот за управување со кризи, активните пожари се во Општина Дојран – с. Николич (нискостеблеста шума), Општина Велес – с. Џидимирци (мешана шума) и Општина Македонски Брод – помеѓу с. Црешнево, с. Крапа и с. Локвица (деградирана дабова шума и грмушки).
Под контрола се пожарите во Македонски Брод – с. Слатина (мешана шума), Македонски Брод – с. Слатина, Слатински извори (нискостеблеста мешана шума), Чучер Сандево – с. Блаце – с. Горњани, м.в. Рамна шума (шумски пожар), Долнени 1 – с. Црнилиште (депонија) и Долнени 2 – с. Дебреште (депонија).
Македонија
Во Кочани нема да има концерт за Петровден, Крстевски го откажа на барање на родителите на загинатите деца во „Пулс“

Откажан е музичко забавниот дел од програмата за одбележување на Петровден, празникот на градот Кочани. Ваква одлука вчера донесе в.д. градоначалникот, Венко Крстевски, откако родителите на загинатите во трагедијата од 16 март годинава се собраа пред сцената во Паркот на Револуција, каде требаше да запчне концерт со настап на повеќе бендови. Тие поставија фотографии на своите деца и запалија свеќи.
Животот продолжува, но трагедијата во дискотеката „Пулс“ нè остави во заложништво на болката, особено за родителите кои живеат со страв и загуба. Откажувањето на музичкиот дел од денешниот и утрешниот настан не требаше да се случи – не затоа што не ја почитуваме тагата, туку затоа што нашата обврска е да се грижиме за сите, да го вратиме нормалното секојдневие и да покажеме дека заедништвото се гради со храброст и заедничка работа, а не со запирање на животот, стои во соопштението на в.д. градоначалникот Крстевски.
Претходно, родителите на загинатите во дискотеката „Пулс“ во пресрет на Петровден писмено се обратија до него со барање да се одложи музичко-забавниот дел од програмата.