Македонија
Ковачки: Со Платформата 1198 се обврзуваме на изградба на нова детска градинка во Карбинци и изградба на нова спортска сала во Таринци
„На овие избори одлучуваме за нашата иднина и за иднината на нашата Македонија. Ова го чекавме цели 7 години и оваа шанса не смееме да ја пропуштиме. 24 април и 8 мај со заокружување на бројот 2 да ставиме крај на катастрофалните политики на владата на ДУИ и на нивните слугите од СДС“, истакна носителот на ИЕ 3 Драган Ковачки од ВМРО-ДПМНЕ на денешниот митинг на ВМРО-ДПМНЕ во Општина Карбинци.
Тој истакна дека после два мандата на СДС и ДУИ, Македонија е обесправена и понижена земја.
„Денеска Македонија после два мандата на СДС и ДУИ е обесправена и понижена, задолжена и банкротирана земја. И за тоа се виновни слугата и стопанот Димитар Ковачевски и Али Ахмети. Криминалот и корупцијата цветаат, а економијата целосно крахира. Институциите повеќе не се во служба на граѓаните, туку во служба на овие неколкумина од владата на ДУИ и СДС кои очајнички се обидуваат да се спасат“, истакна Ковачки.
Тој посочи дека токму затоа ВМРО-ДПМНЕ ја нуди Платформа 1198 која се обврзува да го подобри квалитетот на живот на сите граѓани и целосно да ја трансформира Македонија.
„Ветуваме реализација на економски раст од 5 проценти, отворање на нови 55.000 нови работни места, фронт против корупцијата – проверка на имотот на судии и јавни обвинители и нивните семејства, 250 милиони евра за инвестициски бум во општините. Само во Карбинци ќе дадеме 1,8 милиони евра“, истакна Ковачки и додаде:
„Ќе го зголемиме надоместокот за социјална заштита. Платформата 1198 се обврзува на линеарно покачување на пензиите за 5000 денари во првата година од мандатот. Ќе обезбедиме секое дете да оди во градинка, поевтини сметки за струја преку укинување на тарифата за пристап до мрежа значи за 200 денари поевтини сметки за струја, како и 800 милиони евра за македонското земјоделство, загарантиран откуп и цена на земјоделските производи“, вели Ковачки.
Тој истакна дека со Платформата 1198 во Карбинци и Таринци се обврзуваат на изградба на нова детска градинка во село Карбинци, реконструкција на постоечки канали за наводнување во Карбинци, изградба на зафат на река Брегалница, изградба на спортска сала во село Таринци, реконструкција на улици во село Таринци и Карбинци, уредување на одводен канал и многу други проекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).