Во Сојузот на синдикати на Македонија утрово се одржа комеморација за претседателот на ССМ Дарко Димовски, кој вчера по кусо боледување почина на 45-годишна возраст.

На комеморативната седница се обратија Слободан Трендафилов, Златко Цветковски, Игор Ѓерасов, Стојанче Кашиковски, Лазе Георгиевски, Ристо Ајтов и Иван Пешевски.

-Нашите мисли се со семејството на Претседателот на ССМ, Дарко Димовски. За првпат во историјата на постоењето на ССМ, знамето на ССМ е на половина копје, прерано не напушти претседателот Димовски. Во тешките денови кога ја водевме синдикалната борба знаеше да каже, Слободан ставај панцир, шлем и одиме да се бориме, за жал денеска е исто така тежок ден, ден кога Претседателот на ССМ, Димовски повторно не обедини сите, но поводот е друг и далеку потажен. Продолжуваме да чекориме по патот кој го зацрта, сите заедно и сложни, зошто и семејството на Претседателот Димовски и ССМ се соочени со сериозни предизвици. Слава му! – истакна Вршителот на должност Претседател на ССМ, Слободан Трендафилов.

– По повод прераната смрт на Претседателот Дарко Димовски до Сојузот на синдикатите на Македонија пристигнаа голем број на телеграми со сочуство како од земјата така и од странство. Претседателот Димовски останува запаметен како голем борец за работниците и не смееме во наредниот период да го изневериме – истакна Секретарот на Советот на ССМ, Златко Цветковски

-Соборци и пријатели, Вие што добро го знаевте Дарко и вие што го гледавте во првите редови на протестите. Се собравме да го испратиме нашиот другар и брат на последниот пат, во вечноста каде замина прерано, и затоа нашата загуба е уште поголема. Изразуваме длабока жалост и сочувство до семејството. Празнината што сите ја чувствуваме, е неопислива, рече Игор Герасов, Претседател на СИЕР, во име на ССМ.

– ПретседателотДимовски остави сериозен белег во неговиот матичен синдикат СУТКОЗ, работите кои што ги заппчна таму, аманет е да ги завршиме и да ја продолжиме неговата борба за работнички права. Голем број на синдикати од регионот испратија телеграми со сочуство до Синдикатот СУТКОЗ каде што беше Претседател Дарко Димовски – истакна Стојаче Кашиковски, Секретар на СУТКОЗ.

– Почетоците на Дарко Димовски во синдикалните борби, беа во далечната 2004 година кога стана член на Советот на ССМ, потоа Претседате на СУТКОЗ, Секретар на Советот на ССМ и Претседател на ССМ. Патот кој го одеше не бешелесен, но прерасна во синдикален лидер на кој со гордост можеме да се огледаме – истакна Лазе Георгиевски, долгогодишен синдикалец на СУТКОЗ и ССМ.

– Борбата која ја водевме заедно со Претседателот Дарко Димовски продолжуваме да ја водиме без него, како да е заедно со нас. Нема да дозволиме неговите дела да се заборават, а стоиме исправени да го завршиме се она што тој го започна. Кога се подготвувавме за протестите и штрајковите знаеше да ми рече, Иван, кога ќе им кажуваш на работодавачите и Владата, да им кажеш како што е, а не како што сакаат да слушнат – истакна Иван Пешевски, Претседател на СГИП.