Македонија
(Видео) Котевски: Одговорен човек сум, во понеделник поднесувам оставка

Директорот на КПУ „Скопје“, Ѓоко Котевски, пред новинарите рече дека во понеделник ќе поднесе оставка на функцијата поради физичкиот инцидент во кој беа нападнати осомничените Миле Јанакиески и Спиро Ристовски.
На прашање на „Макфакс“ зошто уште вчера не поднел оставка туку чекал да го повика премиерот, Котевски не одговори конкретно, само рече дека утрово разговарал со Зоран Заев за темата.
Директорот потврди дека судија за извршување санкции утрово бил во посета на осомничените и дека тие се преместени во т.н. хашко одделение во затворот.
„Додека се случувал инцидентот за 12-мина затвореници на шеталиштето се грижел само еден полициски службеник“, рече Котевски.
Директорот кажа дека вербалниот инцидент го почнале осомничените Јанакиески и Ристовски, кои биле сместени во различни павилјони во затворот.
Извештајот од спроведената интерна истрага во која се сослушани поголем број лица, како и учесниците во инцидентот, ќе биде изготвен најдоцна до понеделник и предаден до Управата за извршување санкции.
Инцидентот се случи вчера, во затворот „Скопје“ во Шуто Оризари кога ексминистрите Миле Јанакиески и Спире Ристовски прво учествуваа во вербална расправија, а подоцна и во тепачка. По инцидентот двајцата побарале помош од затворскиот лекар, а Јанакиески, кој се жалел на болки, бил пренесен во Градската општа болница „8 Септември“ каде што било констатирано дека нема повреди по што бил вратен во затворот.
Поранешните министри Спиро Ристовски и Миле Јанакиески од завчера се во 30-дневен притвор во истражниот затвор во Шуто Оризари. Обвинителството за гонење организиран криминал и корупција ги осомничи дека се дел од шестемина што ги организирале насилствата во Собранието на 27 април 2017 година. Ѓоко Котевски на функцијата директор во затворот дојде по локалните избори 2017 година откако дотогашниот директор Александар Наумовски стана градоначалник на општина Ѓорче Петров. Пред да биде назначен за директор на затворот, Котевски беше директор на Управата за водење матични книги.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Манасиевски: Левица и Апасиев во директен договор со Извршител и банка купиле конфискуван имот за 3 пати пониска цена

Левица и Апасиев во директен договор со Извршител и банка купиле конфискуван имот за 3 пати пониска цена, кажа денеска на прес-конференција Валентин Манасиевски, член на ЦК на ВМРО-ДПМНЕ.
„Левица и Апасиев се фатени ин флагранти во зделката на деценијата, за која многу светски инвеститори можат да им позавидат. Само Левица и Апасиев можат да купат деловен објект одземен преку извршител од некој граѓанин или фирма кои не можеле да го враќаат кредитот, за 3 пати пониска цена од пазарната. Левица и Апасиев кои декларативно беа против Извршителите, не се колебаат да купат одземен имот, од истите тие Извршители“, рече Манасиевски.
Според него, уште поголем проблем е ставот на Левица дека Извршителот немал ништо со преговорите, туку дека тие се договориле со банката и објектот го земале со хипотекарен кредит.
„Ако договарале со банката, како истите ја постигнале таа цена, кога во околината се продава имот за 3 пати повисока цена? Дали има некој скриен договор или друга услуга која не е заведена договорно? Граѓаните ја немаат таа среќа да купуваат одземен имот од Извршители кои извршуваат граѓани во финансиски потешкотии, како Левица, ниту да се договорат со некоја банка за толку ниски цени. Левица и Апасиев се демаскирани, аскетизмот одамна го замениле со хедонизам, ако воопшто и некогаш биле аскети“, истакна Манасиевски.
Македонија
Средба Исени – Филипиду: Со заеднички сили во управување со миграциите и борбата со илегалната миграција

Заменик Министерот за внатрешни работи Астрит Исени денеска оствари работна средба со делегација од Амбасадата на Република Грција во Скопје, Н.Е. Софија Филипиду. Во придружба на почитуваната Амбасадорка беа и Димитрис Каиридис, поранешен министер за миграција и азил, и полициското аташе на Република Грција во земјава, Димитриос Лиаскос.
На средбата Заменик Министерот Исени ја подвлече важноста, но и посветеноста на Министерството за внатрешни работи на Република Северна Македонија за продлабочување на меѓусебната соработка и на стратешко и на оперативно ниво, истакнувајќи притоа дека единствено со заеднички сили и волја можеме да постигнеме успех и да бидеме ефикасни во борбата против илегалната миграција и воопшто во управувањето со миграциите.
Двете страни воедно ја потврдија и неопходноста за соработување и содејство не само на билатерална основа, туку и во рамки на регионални и меѓународни иницијативи, каде што токму можноста за разменување на искуства, приоритети и предизвици може да даде голем придонес во управувањето со миграциите и во борбата со сите форми на криминал, истовремено овозможувајќи воспоставување и зајакнување на нови и постоечки партнерства.
Средбата заврши со уверување од двете страни за натамошна интензивна соработка во сите области на дејствување на Министерството за внатрешни работи.
Македонија
Словенија ја поддржува реформата на јавната администрација во Македонија

Министерот за јавна администрација на Република Словенија, Франк Пропс, во рамки на својата официјална посета на Скопје, одржа интензивни работни состаноци со претставници на Министерството за јавна администрација, со цел продлабочување на соработката и размена на успешни практики во јавниот сектор.
Во фокусот на разговорите беа реформата на јавната администрација, професионализацијата на административните службеници и европската интеграција.
Состаноците со Секторот за реформа на јавната администрација и Секторот за Академијата за стручно усовршување на административни службеници резултираа со конкретни заклучоци и чекори за соработка во следните области:
-Подобрување на системот за управување со човечките ресурси – усвојување на мерит-системот и најдобрите европски практики за селекција, напредување и обука на административните службеници.
-Јакнење на капацитетите на Академијата за обука – воведување на нови, практично ориентирани програми за стручно усовршување и професионален развој.
-Следење и евалуација на реформите – воведување механизми за мерење на ефектите од реформските политики и нивно прилагодување согласно европските стандарди.
Министерот Минчев нагласи дека реформата на јавната администрација не е само техничко, туку и суштинско политичко прашање кое ја одредува иднината на европската интеграција на државата.
„Професионална и ефикасна администрација е клучна за изградба на функционална држава. Нашата цел е создавање модерен јавен сервис кој ќе одговара на потребите на граѓаните, а не на партиските интереси. Во тој процес, поддршката од Словенија и од ЕУ е од суштинско значење“ – истакна тој.
Министерот Пропс ја потврди поддршката на Словенија за реформите, нагласувајќи дека Република Македонија треба да остане на европскиот пат и дека модернизацијата на администрацијата е клучна во тој процес.
„Реформите во јавната администрација се меѓу најсложените, но и најважните чекори во секоја држава што се стреми кон членство во ЕУ. Република Македонија има политичка волја и капацитет да успее во овој процес, а Словенија е подготвена да ја поддржи со своето искуство“ – рече министерот Пропс.
Официјалната посета на словенечката делегација испраќа јасна порака дека реформите се стратешки приоритет на Владата и дека нашата држава е подготвена да ја зајакне својата администрација во согласност со европските вредности.