Македонија
Коцевски со претставниците на ЕУ за проектот за јакнење на борбата против шверцување мигранти и трговија со луѓе

Јавниот обвинител на Република Северна Македонија Љупчо Коцевски, ги прими претставниците на проектот „ЕУ-поддршка за јакнење на борбата против шверцување мигранти и трговија со луѓе во Западен Балкан (EU4FAST), предводени од Ерик Винкен, проект-менаџер од холандскиот Центар за меѓународна правна соработка (CILC).
Винкен, заедно со меѓународниот обвинителски советник од Словенија Аленка Ранзингер Сагмајстер, националниот советник Зоран Додевски и правниот советник од Германското друштво за меѓународна соработка (ГИЗ) Мила Станковиќ ги презентираа приоритетите на проектот кој функционира со канцеларија во просториите на Основното јавно обвинителство за гонење на органиизран криминал и корупција.
Јавното обвинителство е меѓу клучните институции – корисници на проектот кој започна со имплементација во јуни 2023 година, ќе трае 48 месеци и е фокусиран на целосен пристап кој овозможува јакнење на капацитетите за превенција, заштита, гонење и партнерство при борбата против трговија со луѓе и криумчарење мигранти.
Во рамките на овој проект до сега се реализирани повеќе активности, меѓу кои директна помош при обезбедување докази во конкретни предмети, студиска посета на обвинители од ОЈО ГОКК на Специјалното јавно обвинителство во Словенија и други словенечки институции, како и подготвителни активности за воспоставување соба за сослушување на деца – жртви/сведоци на трговија со луѓе и криумчарење мигранти во ОЈО ГОКК.
Јавниот обвинител Коцевски се заблагодари за досегашната поддршка од овој проект и изрази уверување дека во следниот период активностите на соработка уште повеќе ќе се интензивираат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Постои сомнеж дека пожарот во Дрисла е подметнат

Скопската противпожарна бригада со сити сили се обидува да го локализира пожарот во депонијата Дрисла. Направен е противпожарен појас за да не се дозволи на огнот да тргне кон блиската трева, грмушки и шума од горната страна на депонијата., информира директорот на Дирекцијата за заштита и спасување, Стојанче Ангелов.
Како што додаде, постојат сомненија дека пожарот бил предизвикан намерно.
„Ќе потсетам само дека летово имавме рекордно високи температури но Дрисла не се самозапали“, рече Ангелов.
Противпожарните возила и дополнителните цистерни од „Комунална хигиена“ интервенираат на терен, а пожарот сè уште не е целосно локализиран.
Командантот на Територијалната противпожарна бригада на Град Скопје, Звонко Томевски посочи дека станува збор за посериозен пожар од поголеми размери, при што постоела опасност огнот да се прошири.
Македонија
Филипче од Париз: Потребен е проактивен пристап и политички консензус за напредок кон ЕУ

Претседателот на Социјалдемократскиот сојуз на Македонија, Венко Филипче, во рамки на еднодневната работна посета оствари повеќе средби со високи француски политички претставници, на кои во фокусот на разговорите беа реформската агенда и предлог Резолуцијата на СДСМ, како гаранција за заштита на националните интереси и решение за деблокирање на преговите со ЕУ.
Филипче одржа работна средба со пратеничката и потпретседателка на групата за пријателство Франција – Северна Македонија во француското Собрание, Лилиана Танги, со шефот на Канцеларијата за соседство, проширување и одбрана при Генералниот секретаријат за европски прашања, Жозеф Жустиниани, како и со директорот за Континентална Европа при Министерството за Европа и надворешни работи, Брис Рокфеј и со специјалниот претставник за Балканот, Рене Троказ.
На состаноците беше истакната поддршката од Франција во процесот на евроинтеграција, но и потребата од брзи резултати во исполнување на обврските и работа на реформите.
Филипче ги презентираше позициите на СДСМ и истакна дека партијата има проактивен пристап и работи на решенија за деблокирање на евроинтеграцискиот процес. Тој нагласи дека во завршна фаза е подготовката на Резолуцијата, со која ќе се потврдат националните црвени линии – македонскиот јазик, култура и идентитет, како и механизми за справување со евентуални непринципиелни барања што излегуваат надвор од Преговарачката рамка.
Во разговорите беше потенцирано дека во Европската Унија постои јасен консензус за проширувањето, и дека тоа е можност која Македонија мора да ја искористи. Француските претставници пренесоа очекувања дека нашата земја треба да направи напредок во евроинтеграцискиот процес, како што тоа веќе го прават државите од регионот, особено Албанија и Црна Гора.
Македонија
Пожар на депонијата Дрисла, Ангелов смирува дека не е алармантно, но е сложено поради хемиските процеси

Пожар избувна на депонијата Дрисла.
Директорот на Дирекцијата за заштита и спасување, Стојанче Ангелов, рече дека пожарот не е алармантен, а скопската противпожарна бригада работи на негово гаснење.
Сепак, како што објаснува Ангелов, гаснењето на било која депонија е сложен процес поради хемиските и биолошките процеси кои се одвиваат во внатрешноста на депонијата како резултат на кои се создаваат запаливи гасови.
(Фото: илустрација, архива)