Македонија
“Кревањето на тензиите во Слупчане можат да прераснат во нешто поголемо”, Спасовски алармира дека ќе има одговорност за жителите

Министерот Оливер Спасовски на денешната седница за пратенички прашања запрашан дали и како реагира полицијата во ситуацијата во Слупчане со блокадите на жителите на екипите на ЕВН и дали има суверенитет на целата територија потенцираше дека македонската полиција и по овој случај постапува и секогаш ќе постапува на целата територија на Република Северна Македонија.
„Пласирањето на вакви тези допринесува многу повеќе да губи Македонија. Во однос на состојбата во Спупчане сметам дека оваа состојба е недозволива и во тој дел, полицијата неколку пати постапува, заедно и во разговор со сите институции и со локалната власт. И утрово полицијата имаше интервенција. Меѓутоа секогаш за тоа кога има причина и врз основа на направени проценки коишто ги има полицијата. Полицијата постапува кога се исполнети законските овластувања за нејзино постапување. Пред се во функционирањето на полицијата мора да се имаат во предвид функционирањето на човековите права и правата на граѓаните.“, потенцираше министерот Спасовски.
Министерот Спасовски образложи дека на територијата на општина Липково постојат неколку полициски станици и соработката со граѓаните е на високо ниво, како и во другите општини во државата.
„Зборувавме пред неколку месеци во однос на тоа што се случуваше во Арачиново и 95% загуба на електрична енергија и дека е многу тешко да се реализира, но потврдивме дека со разговор со населението успеавме денеска да имаме комплетна покриеност со платени сметки во оваа општина во близина на Скопје, како и во Сарај и во многу други села во коишто немало таква практика, сега тоа е завршено“, ја потенцираше Спасовски и превентивната улога на полицијата која е таму да спречува, да превенира конфликти, да ги решава настанатите, но и да не создава нови.
„Така да и во Слупчане, целата оваа состојба ќе се заврши, меѓутоа не треба да се заврши со зовривање на атмосферата, со кревањето на тензиите, бидејќи на никој не му одговара кревање на тензии коишто можат да прераснат во нешто поголемо. Овде станува збор исклучиво за луѓе кои не сакаат да ги исполнуваат обврските, да плаќаат и тие за тоа мора да сносат одговорност. Сите тие граѓани коишто учествувале во блокади, се спротивставувале на службени лица, ќе им бидат поднесени соодветни поднесоци и за тоа ќе носат одговорност.“, рече Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.