Македонија
Кривичниот суд ѝ врати на Апелација за „27 април”: Можевте веднаш да одлучите наместо да го вратите предметот
![](https://makfax.com.mk/wp-content/uploads/2023/04/27-april-presuda.jpg)
Кривичниот суд во однос на одлуката на Апелација за предметот што во јавноста е познат како „Организатори на 27 април“, кој го врати на повторно судење, испрати реакција до медиумите. Тие посочуваат дека Апелација можела да одлучи без предметот да го враќа на ново судење.
Реакцијата од Кривичниот суд во целост:
„Апелациониот суд – Скопје можел брзо и мериторно да одлучи по жалбите на обвинетите лица, особено што причина за укинување на затворските казни е примената или непримената на Законот за амнестијата, како што е наведено во нивното соопштение, без притоа да навлегува во анализа на доказите и утврдување на фактичката состојба, особено што предметот повеќе од една година се наоѓал во нивно надлежно постапување. Доколку причината за укинување на пресудата е од техничка природа, односно примена на Законот за амнестијата, тогаш судот можел веднаш да одлучи, пред сè, заради заштита на правата на обвинетите, кои беа во притвор и под мерки, правата на оштетените, кои се во исчекување на конечна одлука, но и заштита на самата постапка, која може да застари. Мора да се има предвид дека со укинување на пресудата и нејзино враќање на повторно постапување се прават дополнителни трошоци, одолжувања и загрозување на правото за судење во разумен рок, кое е на штета на сите нас.
Апелационите судии, наместо административно да ги враќаат предметите на докомплетирање или на повторно постапување и повеќе од една година да не постапуваат по нив, имаат законска можност, но и обврска, мериторно да одлучуваат, со што ќе придонесат во неселективната борба со организираниот криминал и брза и ефикасна правда, што е заложба на целата држава и предуслов за европскиот напредок.
Сите високопрофилни предмети, без разлика на статусот на обвинетите, во Кривичниот суд се водат во крајно транспарентна постапка со присуство на медиумите, невладините организации и претставниците на меѓународните организации, кои ја следат и ценат работата на правосудните органи. Нешто што е признаено и пофалено како пример и од меѓународниот фактор, но и од домашната јавност, што не е пример при одлучување во повисоките судови. Па во тој правец, но и во однос на јавните коментари, пред сè, од министерот за правда, апелираме да се внимава со избрзаните, непроверени и штетни изјави, кои не одат во правец на издигнување на судството и судиите и градење респектабилна репутација во општеството, напротив, ги деградираат независноста и непристрасноста. Зачудува што ваквите ‘добронамерни’ критики не доаѓаат во време кога судењата се одржуваат пред очите на јавноста, туку откога Апелациониот суд повеќе од една година чекање носи одлука“, велат од Кривичниот суд.
„Неутврдена е фактичката состојба“, „Има недостатоци поради кои не може да се испита законитоста“, „Пресудата е нејасна“, „Неутврдени дејства на обвинетите“, „Недоволно расправање за амнестијата“. Ова се неколку образложенија што ги користи Апелациониот суд за да му укаже на Кривичниот суд зошто ја укина пресудата за „Организатори на 27 април“. Судиите од Апелација, Татјана Дуковска, како претседател на советот, Лидија Зимбовска, Зоран Димитриевски, Тања Милева и Јусуф Ајрулахи, бараат Кривичен суд, односно нивниот колега Илија Трпков, да ги исправи овие недостатоци и да ја утврди точната состојба при повтореното судење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
ВМРО-ДПМНЕ: Жива срамота е СДС да говори за клановски пресметки, бидејќи тие се творците
![](https://makfax.com.mk/wp-content/uploads/2023/02/vmro-dpmne-zgrada.jpg)
На прес-конференцијата на СДСМ, реагираше владејачката ВМРО-ДПМНЕ.
„Грдото лице на власта на СДС и ДУИ значеше и бруталната пресметка на клановите Дуќанџик и Арачиново. Оваа клановска борба својот врв го достигна во време на Оливер Спасовски, кога лица тесно поврзани со мафијашките структури беа дел од неговиот кабинет, а полициски службеници заедно со криминалците учествуваа во директните пресметки, како што беше таа во хотелот Александар Палас. Владеењето на СДС и ДУИ беше симболот на беззаконието и јакнењето на подземјето.
Разузданите банди и мафијашките пресметки низ Скопје и други места се директно дело на поранешната власт, затоа што истите ги користеа за избори, а после им се оддолжуваа со тоа што им ги отвораа улиците за трговија со дрога. Жива срамота е СДС да се дрзне да говори за вакви пресметки, бидејќи тие се творците на клановите и клановските пресметки по угостителски локали, трговски центри и по улици. СДС нека се покрие од срам, затоа што ги охрабруваа членовите на подземјето да дивеат, им даваа заштита и поддршка, а не изостануваа и фотографии на мафијаши со функционери од власта на СДС и ДУИ“, велат од ВМРО-ДПМНЕ.
Претходно, портпаролката на СДСМ, Богданка Кузеска, обвини дека Македонија се претворила во Див Запад откако Панче Тошковски е министер за внатрешни работи.
Македонија
(Видео) Лефков: Фрчковски е грдото лице на власта на СДСМ и ДУИ – секој треба да биде повикан на одговорност
![](https://makfax.com.mk/wp-content/uploads/2024/07/Screenshot-2024-07-07-122220.jpg)
На денешната прес конференција пратеникот Миле Лефков од медиумите беше запрашан како го коментира отповикувањето на Фрчковски од страна на МНР.
„Фрчковски е грдото лице на владеењето на претходната власт на СДСМ и ДУИ. Од тоа што можевме во јавноста да го видиме, гледаме дека како амбасадор на Македонија уживал во удопствата кои му ги обезбедил Зоран Заев со именувањето, а во исто време нема отчет како се трошеле народните пари, односно парите биле трошени на непознат начин“, истакна Лефков.
Лефков посочи дека секој треба да биде повикан на одговорност за тоа како ја извршувал својата должност без разлика за кој човек се работи или на која функција бил.
Македонија
Премиерот и министрите со набиена агенда: почнува официјалната посета на САД
![](https://makfax.com.mk/wp-content/uploads/2024/07/Screenshot-2024-07-07-115952.jpg)
Претседателот на Владата Христијан Мицкоски, заедно со делегација од Владата во чиј состав се министерот за одбрана Владо Мисајловски, министерот за надворешни работи и трговија Тимчо Муцунски како и министерот за внатрешни работи Панче Тошковски ја започнува официјалната посета на САД, каде што ќе учествува на Самитот на НАТО и ќе оствари бројни билатерални средби со високи американски и меѓународни лидери.
Премиерот Мицкоски ќе одржи говор на реномираниот Johns Hopkins University- School of Advanced International Studies, по што ќе следуваат средби со претставници од бизнис заедницата во САД.Премиерот ќе има и средби со високи претставници на IRI, конгресмени и сенатори, односно Брендон Бојл и сенаторката Џин Шахин – копретседавачи на Македонската група за пријателство во Конгресот на САД. Во вечерните часови, пак, тој ќе учествува на свечениот настан по повод 75-годишнината на НАТО, што ќе се одржи во Andrew W. Mellon Auditorium.
Македонската делегација исто така ќе учествува и на отворањето на НАТО форумот и ќе присуствува на состаноците на Северно – атлантскиот совет, каде што Мицкоски ќе има прилика за средби со други лидери и изјави за медиуми.
Мицкоски ќе присуствува и на вечерата во Белата куќа организирана за лидерите, а министерот за надворешни работи и надворешна трговија Тимчо Муцунски и министерот за одбрана Владо Мисајловски ќе присуствуваат на специјални вечери организирани од државниот секретар Етони Блинкен и секретарот за одбрана Лојд Остин.
Посетата на премиерот Мицкоски има за цел да ги зајакне билатералните односи со САД, да ја афирмира Македонија како стабилен партнер и да ги промовира економските можности на нашата земја пред американските инвеститори.