Македонија
Крмов: Секогаш кога треба да се направи шверцерај, тоа се прави итно, нè фаќаат на препад поради „Бехтел и Енка“
Борислав Крмов од Левицата го предупреди претседателот на Собранието, Талат Џафери, дека седницата со предлози за измени на девет закони во корист на изведувачот на автопатските делници „Бехтел и Енка“ ниту смеела ниту требало да се одржи. Тој се повика на Деловникот, кој, според него, не бил почитуван оти пратениците немале доволно време да ги разгледаат материјалите за вака сериозни измени на девет закони. Крмов ја даде забелешката откога беа повлечени предложените измени на Законот за заштита на културното наследство, но некои од другите предлози за измени на законите добија поддршка.
„Оваа седница во суштина не смее и не треба да се одржи. Најгрубо е прекршен член 68, кој вели ‘решението за свикување седница на Собранието со предлогот на дневниот ред и материјалите по прашањата што се предлагаат на дневниот ред на седницата на пратениците им се доставуваат најмалку десет работни дена пред денот определен за одржување на седницата’. Овие материјали ни се доставени на трети, тоа е максимум пет дена, а седницата е закажана на шести, тоа се максимум два работни дена. Вие можете по став 2 да си го толкувате како итен случај, ама не може секогаш кога треба нешто да се истурка на сила и да се направи шверцерај, да биде итен случај“, рече пратеникот Крмов.
Тој потсети дека изведувачот „Бехтел и Енка“ го следат коруптивни скандали и во другите земји во регионот и рече дека материјалите за измените на законите не биле никаде објавени.
„Материјали за вакви битни закони не беа ставени ни на ЕНЕР, не беа ставени никаде. Ги фаќате и јавноста и опозицијата на препад. И тоа за што, за еден конзорциум ‘Бехтел и Енка’, кој не само во Македонија туку и во Косово, во Албанија, во Хрватска, во Романија има исти вакви криминални случаи. Со овие девет закони или сега осум ние целиот правен систем го превртуваме на глава. За ‘Бехтел и Енка’ не важат никакви закони. Тие ќе газат преку шуми, преку земјоделски земјишта, требаше да газат преку археолошки наоѓалишта, ќе кршат работнички права, што сакаат ќе прават, само да се истурка овој криминал, што без анекси треба да вреди милијарда и седумстотини милиони евра, а којзнае каде ќе го дотерате со анексите“, рече Крмов.
На пратениците од мнозинството што гласаат против на дневен ред да бидат ставени точките што ги предвидуваат измените на деветте закони за „Бехтел и Енка“, Крмов им порача да излезат доколку навистина се против.
„Тројца до петмина колеги од мнозинството, баш забележав, се против. Не перете се со гласање против. Моментно кворумот е 62-63, излезете. Ве повикувам, ако вие навистина сте против овие предлог-закони – излезете, срушете го кворумот и оваа седница ќе застане. Ние другите, јас можам да зборувам за партијата Левица, ние ќе дадеме сè од себе да ве спречиме“, рече пратеникот Крмов.
Претседателот на Собранието, Талат Џафери, објасни дека на ЕНЕР се објавуваат измените на законите кога ги предлага Владата, но не и кога ги предлагаат пратеници, како во овој случај, а во однос на пократкиот период за разгледување на материјалите и свикувањето на седницата рече дека го искористил правото што го има како претседател на Собранието.
„Кога цитирате дел од Деловникот, кажете го до крај. Став 2 не зборува за итна постапка, зборува за правото на претседателот на Собранието во рок пократок од десет дена да може да свикува седница и врз основа на ова е свикана седницата. Не е итно свикувањето седница, за итни постапки се други членови од Деловникот, ова за коректност кога веќе комуницирате со јавноста. На ЕНЕР не одат предлозите од пратениците, доколку не сте занеле, еве можност да разберете. Таму одат нацртите, драфт-верзиите од Владата како овластена институција за предлагање закони. Значи, предлозите на пратениците не одат на ЕНЕР“, рече претседателот Џафери.
Откога пратениците изгласаа сите измени на законите за „Бехтел и Енка“ да бидат ставени на дневен ред, освен измената на Законот за заштита на културното наследство, кој беше повлечен, Џафери ја прекина седницата и најави дека за нејзино продолжува пратениците ќе бидат дополнително известени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Центар, Сопиште и Бутел
Од ЕВН Македонија АД известуваат дека денеска без електрична енергија ќе останат:
· во периодот од 07:30 до 15:00 часот, корисниците на блокот на згради од булеварот Партизански Одреди бр.17 кон улица Максим Горки, општина Центар.
· во периодот од 07:45 до 15:30 часот, корисниците на селата Јаболци, Ново Брезница, Патишка Река, Држилово, Малчиште, Црн Врв, Елово, Осинчани, Карст с.Јаболци Викендици Држилово, Сателитски Центар, Ново Брезница, Рудпроект, Јаболци, Патишка Река, општина Сопиште.
· во периодот од 08:30 до 10:30 часот, корисниците на улицата Тале Христов, Поликлиника ВФВ и Објектите околу ВРВ Поликлиник, општина Бутел.
· во периодот од 09:00 до 12:00 часот, дел од корисниците на улицата Елисие Поповски – Марко бр.21,47 и други корисници во непосредна близина, општина Центар.
Македонија
Делови од Центар и Аеродром денеска без вода
Од ЈП Водовод и Канализација известуваат дека денеска:
– поради изведување на водоводен приклучок ф-80 мм на улицата Франклин Рузвелт бб, прекинато водоснабдување ќе имаат корисниците на дел од истата улица, односно потегот од Орце Николов до Благој Давков, општина Центар.
Водоснабдувањето ќе биде прекинато од 10:00 часот до завршување со работните активности.
– поради промена на вентил во шахта ф-2“ на улицата Венијамин Мачуковски бб, прекинато водоснабдување ќе имаат корисниците од истата улица, општина Аеродром.
Водоснабдувањето ќе биде прекинато од 09:00 часот до завршување со работните активности.
Македонија
Утрото претежно ведро и студено, преку денот сончево со мала до умерена облачност
Утрото претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Времето во наредните денови
Следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

